၄.၂.၄။ သိက္ခာပိုဒ်စတုတ္ထ
850) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ ပ္ဍဲသဗာန်ဍာန်ဇၞော်ကီု ပ္ဍဲဂၠံၚ်တရဴ ဟွံခၠၚ်သာတ်ကီု ပ္ဍဲဂၠံၚ်တရဴသွာၚ်ကီု ညးမွဲကေုာံညးမွဲ ဒတူဒၟံၚ်မွဲစွံလေဝ် ဒတူဒၟံၚ်မွဲဟာန်ကေုာံတြုံရ၊ ဂလာန်လေဝ်ဟီုဒၟံၚ်မွဲစွံရ၊ ပြာပ်အာတမ်ကတောဝ်တုဲလေဝ် ကသေဲဟီုသာသာရ၊ ခမဳဗြဴမဒှ်သကအ်ပွံၚ်လေဝ် ကလေၚ်ဗလးထောံရ။ ခမဳဗြဴပၟိက်အောန်ဂမၠိုၚ်ဂှ် “နာဲဗြဴထုလ္လနန္ဒာ ပ္ဍဲသဗာန်ဍာန်ဇၞော်ကီု ပ္ဍဲဂၠံၚ်တရဴဟွံခၠၚ်သာတ်ကီု ပ္ဍဲဂၠံၚ်တရဴသွာၚ်ကီု မုဟိုတ် ညးမွဲကေုာံညးမွဲ ဒတူဒၟံၚ်မွဲစွံလေဝ် ဒတူဒၟံၚ် မွဲဟာန်ကေုာံတြုံရော? ဂလာန်လေဝ်ဟီုဒၟံၚ်မွဲစွံရော? ပြာပ်အာတမ်ကတောဝ်တုဲလေဝ် ကသေဲဟီုသာသာရော? ခမဳဗြဴသကအ်ပွံၚ်လေဝ် ကလေၚ်ဗလးထောံရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ ပ္ဍဲသဗာန်ဍာ်ဇၞော်ကီု ပ္ဍဲဂၠံၚ်တရဴဟွံခၠၚ်သာတ်ကီု ပ္ဍဲဂၠံၚ်တရဴသွာၚ်ကီု ညးမွဲကေုာံညးမွဲ ဒတူဒၟံၚ်မွဲစွံလေဝ် ဒတူဒၟံၚ်မွဲဟာန်ကေုာံတြုံရ၊ ဂလာန်လေဝ် ဟီုဒၟံၚ်မွဲစွံရ၊ ပြာပ်အာတမ်ကတောဝ်တုဲလေဝ် ကသေဲဟီုသာသာရ၊ ခမဳဗြဴမဒှ်သကအ်ပွံၚ်လေဝ် ကလေၚ်ဗလးထောံရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴ ထုလ္လနန္ဒာ ပ္ဍဲသဗာန်ဍာ်ဇၞော်ကီု ပ္ဍဲဂၠံၚ်တရဴဟွံခၠၚ်သာတ်ကီု ပ္ဍဲဂၠံၚ်တရဴသွာၚ်ကီု ညးမွဲကေုာံညးမွဲ ဒတူဒၟံၚ်မွဲစွံလေဝ် ဒတူဒၟံၚ် မွဲဟာန်ကေုာံတြုံရော? ဂလာန်လေဝ်ဟီုဒၟံၚ်မွဲစွံရော? ပြာပ်အာတမ်ကတောဝ်တုဲလေဝ် ကသေဲဟီုသာသာရော? ခမဳဗြဴမဒှ်သကအ်ပွံၚ်လေဝ် ကလေၚ်ဗလးထောံရော? ယွံခမဳတအ် (ကမၠောန်ပွမခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
851) “ယြဴခမဳဗြဴမွဲ ပ္ဍဲသဗာန်ဍာ်ဇၞော်ကီု ပ္ဍဲဂၠံၚ်တရဴဟွံခၠၚ်သာတ်ကီု ပ္ဍဲဂၠံၚ်တရဴသွာၚ်ကီု ညးမွဲကေုာံညးမွဲ ဒတူဒၟံၚ်မွဲစွံလေဝ် ဒတူဒၟံၚ်မွဲဟာန်ကေုာံတြုံမ္ဂး၊ ဂလာန်လေဝ် ဟီုဒၟံၚ်မွဲစွံမ္ဂး၊ ပြာပ်အာတမ်ကတောဝ်တုဲလေဝ် ကသေဲဟီုသာသာမ္ဂး၊ ခမဳဗြဴမဒှ်သကအ်ပွံၚ်လေဝ် ကလေၚ်ဗလးထောံမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
