၄.၂.၂။ သိက္ခာပိုဒ်ဒုတိယ
842) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တြုံမဒှ်ကလောမသ ခမဳဗြဴမဒှ်ကွးပဒတဴဇရေၚ် ဘဒ္ဒါကာပိလာနဳဂှ် နူကွာန်သၟတ် (ဇကုပဒတဴ) အာဍုၚ်သာရဝှ် နကဵုကမၠောန်ကေၚ်ကာ မထေက်ကဵုသ္ပမမိက်ကဵုမွဲမွဲရ။ ပ္ဍဲအခိၚ်ဂှ် ခမဳဗြဴဂှ် “ပ္ဍဲအခိၚ်ဗ္တံဒမၠု မဟွံမွဲကဵုလျးပၟတ် ညးမွဲကေုာံညးမွဲ ပွမဒတူဒၟံၚ်မွဲစွံ မွဲဟာန်ကေုာံတြုံ ပွမဟီုဂလာန်မွဲစွံဂှ် တဳလမၞုံပိုဉ်ကျာ်တြဲ ဆေဝ်ဒဝ်ကၠေံရ” ရဴဝွံ (ပၠုပ်စိုတ်တုဲ) မွဲဟာန်ကေုာံတြုံဂှ်ဟေၚ် ပ္ဍဲဌာန်မဂြောပ်ဗ္ဒန် ဒတူလေဝ်ဒတူဒၟံၚ်မွဲစွံရ၊ ဂလာန်လေဝ်ဟီုဒၟံၚ်မွဲစွံရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ပ္ဍဲဌာန်မဂြောပ်ဗ္ဒန် ညးမွဲကေုာံညးမွဲ ဒတူဒၟံၚ်မွဲစွံလေဝ် ဒတူဒၟံၚ်မွဲဟာန်ကေုာံတြုံရော? ဂလာန်လေဝ်ဟီုဒၟံၚ်မွဲစွံရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် ပ္ဍဲဌာန်မဂြောပ်ဗ္ဒန် ညးမွဲကေုာံညးမွဲ ဒတူဒၟံၚ်မွဲစွံလေဝ် ဒတူဒၟံၚ်မွဲဟာန်ကေုာံတြုံရ၊ ဂလာန်လေဝ်ဟီုဒၟံၚ်မွဲစွံရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂှ် ပ္ဍဲဌာန်မဂြောပ်ဗ္ဒန် ညးမွဲကေုာံညးမွဲ ဒတူဒၟံၚ်မွဲစွံလေဝ် ဒတူဒၟံၚ်မွဲဟာန်ကေုာံတြုံရော? ဂလာန်လေဝ်ဟီုဒၟံၚ်မွဲစွံရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
843) “ယြဴခမဳဗြဴမွဲ ပ္ဍဲဌာန်ဂြောပ်ဗ္ဒန် ညးမွဲကေုာံညးမွဲ ဒတူဒၟံၚ်မွဲစွံလေဝ် ဒတူဒၟံၚ်မွဲဟာန်ကေုာံတြုံမ္ဂး၊ ဟီုဂလာန်လေဝ်ဟီုမွဲစွံမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
