၄.၂.၁.၁။ ပွံက်သိက္ခာပိုဒ်ပဌမ

840) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ ပ္ဍဲအခိၚ်ဗ္တံဒမၠုၚ် မ္ဂးဂှ် ပ္ဍဲအခိၚ်တ္ၚဲပၠိုတ်။ မဟွံမွဲကဵုလျးပၟတ် မ္ဂးဂှ် မဟွံမွဲကဵုလျးတၟး။ တြုံ မ္ဂးဂှ် တြုံလကိုဟ်ဟွံသေၚ်၊ တြုံပြိုတ်ဟွံသေၚ်၊ တြုံတိရစ္ဆာန် မပတောံလဝ်မၞိဟ်ဟွံသေၚ်၊ တြုံမၞိဟ်မတီကၠိုဟ်ခၠၚ် မသၟဟ်စောံတၞဟ်နပွမဒတူ ပွမဟီုဂလာန်ရောၚ်။ မွဲဟာန်ကေုာံ မ္ဂးဂှ် မွဲဂကောံရောၚ်။ ညးမွဲကေုာံညးမွဲ မ္ဂးဂှ် တြုံကီု ခမဳဗြဴကီုဒှ်ရ။ ဒတူလေဝ်ဒတူမွဲစွံ မ္ဂးဂှ် တန်တဴပ္ဍဲအပ္ဍဲဟတ္ထပါသ် (ၜါဟတ်မွဲဍ) တြုံမ္ဂး၊ ဒးအာပတ်ပဲါစိုတ်ရ။ ဟီုဂလာန်လေဝ်ဟီုမွဲစွံ မ္ဂးဂှ် သီုမဒတူဒၟံၚ် ပ္ဍဲအပ္ဍဲဟတ္ထပါသ် (ၜါဟတ်မွဲဍ) တြုံဟီုဂလာန်မ္ဂး၊ ဒးအာပတ်ပဲါစိုတ်ရ။ သၠးကၠေံဟတ္ထပါသ်ၜါဟတ်မွဲဍတုဲ ဒတူလေဝ်ဒတူမ္ဂး၊ ဟီုဂလာန်လေဝ်ဟီုမ္ဂး၊ ဒးအာပတ်ဒုက္ကဋ်ရ။ ကေုာံလကိုဟ် ပြိုတ် ခမၞုဲ တိရစ္ဆာန်မပတောံလဝ်မၞိဟ် ဒတူလေဝ်ဒတူမ္ဂး၊ ဟီုဂလာန်လေဝ်ဟီုမ္ဂး၊ ဒးအာပတ်ဒုက္ကဋ်ရ။

841) သကအ်ပွံၚ် ညးမတီကၠိုဟ်ခၠၚ် မမိက်ကဵုမွဲမွဲနွံမ္ဂး၊ ဟွံသ္ၚေဝ်မဲ ကဵုပွမလ္ၚုဂြောပ်ဗ္ဒန်မ္ဂး၊ သ္ပအာရီုမွဲသအာၚ်တုဲဒတူလေဝ်ဒတူမ္ဂး၊ ဟီုဂလာန်လေဝ်ဟီုမ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ပဌမတုဲရ။