၄.၉.၉။ သိက္ခာပိုဒ်နဝမ

828) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခံက် (ဝါ) ဗ္ၚသြောံယဴ ဗဗၞးမွဲဂှ် နိဿဲဗ္ဒာဲကဵုဘာ ခမဳဗြဴဂမၠိုၚ်တုဲ နွံဒၟံၚ်ရ။ ခမဳဗြဴဂမၠိုၚ် ကိုဟ်ချာဲစုတ် တရဴဇၞော်ကီု တရဴသၟတ်ကီု ခၟိက်ဟန်ဗန်ကီု စၞဇမ္ၚးကီု ပ္ဍဲခံက်ဝါဗ္ၚဂှ်အိုတ်ရ။ ပ္ဍဲအခိၚ်ဂှ် ဗဗၞးဂှ် “မုဟိုတ် ခမဳဗြဴဂမၠိုၚ် ပလီုပလာ်တဴ ခံက်သြောံယဴ ပိုဲညးဂမၠိုၚ်အိုတ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဗြဴဂမၠိုၚ် သ္ဂောံမိၚ်ကေတ်ဂလာန်ဗဗၞးဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် ကိုဟ်ချာဲစုတ် တရဴဇၞော်ကီု တရဴသၟတ်ကီု ခၟိက်ဟန်ဗန်ကီု စၞဇမ္ၚးကီု ပ္ဍဲဌာန်မၞုံကဵုဆုချောဲမလမ္စံက်ဍိုပ်ဍဴအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် ကိုဟ်ချာဲစုတ် တရဴဇၞော်ကီု တရဴသၟတ်ကီု ခၟိက်ဟန်ဗန်ကီု စၞဇမ္ၚးကီု ပ္ဍဲဌာန်မၞုံကဵုဆုချောဲမလမ္စံက်ဍိုပ်ဍဴအိုတ်ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် ကိုဟ်ချာဲစုတ် တရဴဇၞော်ကီု တရဴသၟတ်ကီု ခၟိက်ဟန်ဗန်ကီု စၞဇမ္ၚးကီု ပ္ဍဲဌာန်မၞုံကဵုဆုချောဲမလမ္စံက် ဍိုပ်ဍဴအိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

829) “ယြဴခမဳဗြဴမွဲ တရဴဇၞော်ကီု တရဴသၟတ်ကီု ခၟိက်ဟန်ဗန်ကီု စၞဇမ္ၚးကီု ကိုဟ်ချာဲလေဝ် ကိုဟ်ချာဲစုတ် ပ္ဍဲဌာန်မၞုံကဵုဆုချောဲမလမ္စံက်ဍိုပ်ဍဴမ္ဂး၊ ဖအောဝ်လေဝ် ဖအောဝ်ကဵုကိုဟ်ချာဲစုတမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။