၄.၉.၈။ သိက္ခာပိုဒ်အဋ္ဌမ
824) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ဗဗၞးမွဲတၠ စွံလဝ်အခေါန်ကၚ်ၚာၚ်သၟိၚ် (ပ္ဍဲတဲ) တုဲ “ကြက်အာတ် ကဆံၚ်ဂုဏ်မစၚုဟ်ဂှ်ဟေၚ်ရ” ရဴဝွံ (ပၠုပ်စိုတ်တုဲ) ဟုမ်ဍာ်ဓလီုက္ဍိုပ်တုဲမ္ဂး ကာတ်အာဗ္ဒာဲဘာခမဳဗြဴဂမၠိုၚ်တုဲ အာသ္ၚိနန်သၟိၚ်ရ။ ခမဳဗြဴမွဲဇကု သၠးစုတ်လဝ်တရဴဇၞော်ပ္ဍဲကၠံက် (ထၟာဲဂဒိုအ်) တုဲ ကၠဟ်ထောံ ပ္ဍဲဗ္ဒၚ်မွဲလပါ်မ္ဂး ကိုဟ်ချာဲဒးက္ဍိုပ်ဗဗၞးဂှ်ရ။
ပ္ဍဲအခိၚ်ဂှ် ဗဗၞးဂှ် “ဗြဴက္ဍိုပ်တ္ၚာတ် ပလီုဂကူဂမၠိုၚ်ဝွံ ခမဳဗြဴဂမၠိုၚ် ဟွံသေၚ်အိုတ်ရ၊ မုဟိုတ် သ္ဂောံကိုပ်ချာဲစုတ် ထၟာဲဂဒိုအ် လတူက္ဍိုပ်အိုတ်ရော? ကြက်စံၚ်ထောံပၟတ် ဘာဗြဴပလီုဂကူဂမၠိုၚ်ဝွံရ” ရဴဝွံ ဂိုၚ်ကေတ်နၚ်ထၞိက်ပၟတ် (သၞပၟတ်) တုဲ လုပ်အာအပ္ဍဲဘာရ။ ဥပးမွဲတိတ်ကၠုၚ်နူဘာမ္ဂး ညာတ်ဒးဗဗၞးမလုပ်ကၠုၚ် အပ္ဍဲဘာ သီုမရပ်နၚ်ထၞိက်ပၟတ်တုဲ “ယွံသကအ် တၠအဲ မုဟိုတ် ရပ်နၚ်ထၞိက်ပၟတ်တုဲ လုပ်ကၠုၚ်အပ္ဍဲဘာရော?” ရဴဝွံ သၟာန်ရ။ ယွံသကအ် ဗြဴက္ဍိုပ်တ္ၚာတ် ပလီုဂကူဂမၠိုၚ်ဝွံ ကၠဟ်စုတ်အဲ နကဵုထၟာဲဂဒိုအ် လတူက္ဍိုပ်အိုတ်ရ၊ ကြက်စံၚ်ထောံပၟတ် ဘာဗြဴပလီုဂကူဂမၠိုၚ်ဝွံရ ရဴဝွံ (သ္ဂး) ရ၊ ယွံသကအ်ဗဗၞး ဩဝ်အာညိ ပွဝွံ ဒှ်မ္ၚဵုခိုဟ်ပြဲရ၊ ကြက်ကလိဂွံလာဘ်ဗဇဴ လ္ၚီကသာပ်ရ၊ ကဆံၚ်ဂုဏ်စၚုဟ်ဂှ်လေဝ် ကြက်ကလိဂွံရ ရဴဝွံ (သ္ဂးရ)။ ပ္ဍဲကြဴနူဂှ် ဗဗၞးဂှ် ဟုမ်ဍာ်ဓလီုက္ဍိုပ်တုဲ အာသ္ၚိနန်သၟိၚ်မ္ဂး ကလိဂွံလာဘ်ဗဇဴလ္ၚီကသာပ်ရ၊ ကဆံၚ်ဂုဏ်စၚုဟ်ဂှ်လေဝ် ကလိဂွံရ။ ပ္ဍဲအခိၚ်ဂှ် ဥပးဂှ် လုပ်အာဘာတုဲ ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်တုဲ လဗပ်ပကီုဟီုဗျိဒေါန်ရ။
ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် ကိုပ်ချာဲစုတ် တရဴဇၞော် ပ္ဍဲဗ္ဒၚ်မွဲလပါ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် ကိုဟ်ချာဲစုတ် တရဴဇၞော် ပ္ဍဲဗ္ဒၚ်မွဲလပါ်အိုတ်ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် ကိုဟ်ချာဲစုတ် တရဴဇၞော် ပ္ဍဲဗ္ဒၚ်မွဲလပါ်အိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
825) “ယြဴခမဳဗြဴမွဲ တရဴဇၞော်ကီု တရဴသၟတ်ကီု ခၟိက်ဟာန်ဗန်ကီု စၞဇမ္ၚးကီု ကိုပ်ချာဲလေဝ် ကိုဟ်ချာဲစုတ် ပ္ဍဲဗ္ဒၚ်မွဲလပါ်ကီု ပ္ဍဲကၟာၚ်မွဲလပါ်ကီုမ္ဂး၊ ဖအောဝ်လေဝ် ဖအောဝ်ကဵုကိုဟ်ချာဲစုတ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
