၄.၉.၇။ သိက္ခာပိုဒ်သတ္တမ

820) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ် ပ္ဍဲအခိၚ်သီသြောံ အာတ်ကေတ်သြောံထၞေက်တုဲ ရၚ်တၠုၚ်ကေတ်နၚ် ဍုၚ်အိုတ်ရ၊ ပ္ဍဲဌာန်တြၚ်တန်တဴဂှ် “(ပၟၚ်တြၚ်ဂမၠိုၚ်ဂှ် ယွံနာဲဗြဴတအ် ဩဝ်ကဵုသွက် ‘ဘိုအ်’ အိုတ်ညိ” ရဴဝွံ ဟီုပယှုက်ပထုဲတုဲ ဗထးထောံအိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် က္ညအာဘာတုဲ ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် အာတ်တဴ သြောံထၞေက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် အာတ်တဴ သြောံထၞေက်အိုတ်ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် အာတ်တဴ သြောံထၞေက်အိုတ်ရော? ယွံခမဳတအ် (ကမၠောန်ပွခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

821) “ယြဴခမဳဗြဴမွဲ အာတ်တဴ သြောံထၞေက်တုဲကီု ဖအောဝ်ကဵုအာတ်တုဲကီု နှာတုဲကီု ဖအောဝ်ကဵု နှာတုဲကီု ထၞက်တုဲကီု ဖအောဝ်ကဵုထၞက်တုဲကီု ဖျိန်တုဲကီု ဖအောဝ်ကဵုဖျိန်တုဲကီု သ္ပပြဘိုဂ်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။