၄.၉.၆။ သိက္ခာပိုဒ်ဆဋ္ဌ

815) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုည်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် အမာတ်ဇၞော်မၞုံယၟုအာရောဟန္တ သ္ပခမဳပ္ဍဲဇရေၚ် ခမဳတြုံဂမၠိုၚ်တုဲ သမ္ဘာတြေံအမာတ်ဇၞော်ဂှ်တုန် သ္ပခမဳဗြဴ ပ္ဍဲဇရေၚ်ခမဳဗြဴဂမၠိုၚ်ရ။ ပ္ဍဲအဃောအခိၚ်ဂှ် ခမဳဂှ် သ္ပပွမကဵုပိုဉ် ပ္ဍဲဇရေၚ်ခမဳဗြဴဂှ်ရ။ ပ္ဍဲအခိၚ်ဂှ် ခမဳဗြဴဂှ် ကုခမဳမဒှ်ဃောကဵုဒၟံၚ်ပိုဉ်ဂှ် ရပ်ကေတ်ခရော်ဍာ်သုၚ်တုဲ သီုမပိုက်ဒၟံၚ်ပၞိက်ဂှ် တန်တဴပ္ဍဲဇရေၚ်တုဲ ဟီုသ္ဂးကလိလောန်ၜက်စေဝ်ၜက်ပၞောန် ‘ဟီုတဴလဟီုကောန်ဗြဴ’ ရ။ ပ္ဍဲအခိၚ်ဂှ် ခမဳဂှ် “ယွံဒေံဗြဴ လ္ပသ္ပရဴဝွံညိ၊ ကမၠောန်ပွဝွံ ဟွံဂပ်ဝ်ရ” ရဴဝွံ ဟီုရာန်သကိုတ် ခမဳဗြဴဂှ်ရ၊ “တၠအဲ ပ္ဍဲကိုပ်ကၠာတေံ သီုမကၠောန်သ္ပကၠုၚ်ကဵုအဲ ရဴဝွံရဴဝွံဂှ် ပ္ဍဲအခိၚ်လၟုဟ်တုန် ဗၞတ်ဝွံဟေၚ် အေၚ်ဒုၚ်ဟွံမာန်ရဟာ” ရဴဝွံ နကဵုခရော်ဍာ်သုၚ် ခ္ဍံက်ၜုၚ်က္ဍိုပ်တုဲ နကဵုပၞိက်ဂှ် တက်ထဗးရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ကဵုဂွဵုဂွိုက်တက်ထဗး ကုခမဳတြုံရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် ကဵုဂွဵုဂွိုက်တက်ထဗး ကုခမဳတြုံရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂှ် ကဵုဂွဵုဂွိုက်တက်ထဗး ခမဳတြုံရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

816) “ယြဴခမဳဗြဴမွဲ ကၠောန်ၜိုတ် ကုခမဳတြုံ မဒှ်ဃောကဵုဒၟံၚ်ပိုဉ် နကဵုဍာ်သုၚ်ကီု နကဵုပၞိက်ကီုမ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။