၄.၉.၅.၁။ ပွံက်သိက္ခာပိုဒ်ပဉ္စမ

812) မသအးဇ္ၚးနကဵုဍာ် စဵုကဵုမသအးဇ္ၚး မ္ဂးဂှ် သ္ဂးတဴ ပွမကြဴကြာတ် ပထောၚ်တရဴသၟတ် (သၞိၚ်ဇကု) ရ။ ခမဳဗြဴ မသအးဇ္ၚး မ္ဂးဂှ် ပွမကြဴကြာတ်ဍာ်ရောၚ်။ သ္ဒးကြဴကြာတ် စဵုကဵုဌာန်မၞုံဗၞတ်ၜါတၚ်လပုဟ်တဲ ၜါတၞုၚ်ဟေၚ်ရ မ္ဂးဂှ် သ္ဒးကြဴကြာတ် စဵုကဵုဌာန်မၞုံဗၞတ်ၜါတၚ်လပုဟ်တဲ ပ္ဍဲတဲဂမၠိုၚ်ၜါတၞုၚ်ဟေၚ်ရ။ ကုခမဳဗြဴ မကဵုကလိလောန်အာ ဗၞတ်ဗ္ၜတ်ဂှ် မ္ဂးဂှ် သာယျေန်တဴတၟတ်ဒွံဒှ်တုဲ ဗွဲတွဵုမယုတ် အယာံမာတ်မွဲတၞုၚ်သောဲလေဝ် ကဵုကလိလောန်အာမ္ဂး၊ ဒးအာပတ်ပဲါစိုတ်ရ။

813) ပ္ဍဲမကလိလောန်ၜါတၚ်လပုဟ်တဲ မၞုံကဵုစၟတ်သမ္တီကလိလောန်ဒှ်တုဲ ကြဴကြာတ်မ္ဂး၊ ဒးအာပတ်ပဲါစိုတ်ရ။ ပ္ဍဲမကလိလောန်ၜါတၚ်လပုဟ်တဲ မၞုံကဵုသၠေဟ်ပၟာဒှ်တုဲ ကြဴကြာတ်မ္ဂး၊ ဒးအာပတ်ပဲါစိုတ်ရ။ ပ္ဍဲမကလိလောန်ၜါတၚ်လပုဟ်တဲ မၞုံကဵုစၟတ်သမ္တီဟွံကလိလောန်ဒှ်တုဲ ကြဴကြာတ်မ္ဂး၊ ဒးအာပတ်ပဲါစိုတ်ရ။ ပ္ဍဲမယုတ်ဒေက် သၟဝ်ၜါတၚ်လပုဟ်တဲ မၞုံကဵုစၟတ်သမ္တီကလိလောန်မ္ဂး၊ ဒးအာပတ်ဒုက္ကဋ်ရ။ ပ္ဍဲမယုတ်ဒေက် သၟဝ်ၜါတၚ်လပုဟ်တဲ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲမယုတ်ဒေက် သၟဝ်ၜါတၚ်လပုဟ်တဲ မၞုံကဵုစၟတ်သမ္တီယုတ်ဒေက်မ္ဂး၊ ဟွံဒးအာပတ်ရ။

814) ကြဴကြာတ် စဵုကဵုဗၞတ်သၟဝ်ၜါတၚ်လပုဟ်တဲမ္ဂး၊ ကြဴကြာတ် မယုတ်ဒေက်သၟဝ်ၜါတၚ်လပုဟ်တဲမ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ပဉ္စမတုဲရ။