၄.၉.၅။ သိက္ခာပိုဒ်ပဉ္စမ
810) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် မဟာပဇာပတိဂေါတမ ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး တန်တဴဒၟံၚ်ပ္ဍဲဌာန်သၟဝ်ကျာ်ရ။ “ယွံတဳလမၞုံပိုဉ်ကျာ်တြဲ ညးဗြဴမ္ဂးဂှ် မၞုံကဵုသၟူအမြာဲပသပသောန်ရ” ရဴဝွံ ဂရၚ်ပတီရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် “ခမဳဗြဴဂမၠိုၚ် ဩဝ်ကဵုသအးဇ္ၚး နဍာ် စဵုကဵုမသအးဇ္ၚးအိုတ်ညိ” ရဴဝွံ သ္ဂးတုဲ နကဵုဂလာန်ဓရ်တဳလမၞုံပိုဉ်ကျာ်တြဲ ကဵုမဟာပဇာပတိဂေါတမဳ တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုကေက်သကာမြဟ်မြာတုဲမ္ဂး မဟာပဇာပတိဂေါတမဳဂှ် လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ သ္ပရှေ်သှေ်ရဴဂဴတုဲမ္ဂး ပဲါစ္ဍးအာရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ “ယွံခမဳတအ် ကဵုအခေါၚ် တၞဟ်နကဵုသအးဇ္ၚးကဵုဍာ် ကုခမဳဗြဴဂမၠိုၚ်ရ” ရဴဝွံ သ္ဂးကဵုခမဳဂမၠိုၚ်ရ။ ပ္ဍဲအဃောအခိၚ်ဂှ် ခမဳဗြဴမွဲဇကုဂှ် “တဳလမၞုံပိုဉ်ကျာ်တြဲ ကဵုအခေါၚ် ပွမသအးဇ္ၚးနကဵုဍာ်ရ” ရဴဝွံ ဟိုတ်နူပွမသအးဇ္ၚးနကဵုဍာ် စဵုကဵုမသအးဇ္ၚး ဗွဲမဇြိုဟ်လောန်ဂှ်ရ ပ္ဍဲပထောၚ်တရဴသၟတ် (သၞိၚ်ဇကု) ဒှ်အာသရရ။ ပ္ဍဲအခိၚ်ဂှ် ခမဳဗြဴဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ကဵုသအးဇ္ၚးနကဵုဍာ် စဵုကဵုမသအးဇ္ၚး ဗွဲမဇြိုဟ်လောန်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂှ် ကဵုသအးဇ္ၚးနကဵုဍာ် စဵုကဵုမသအးဇ္ၚး ဗွဲမဇြိုဟ်လောန်ရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ်စၞောန်ထ္ၜး သိက္ခာပိုဒ်ဝွံအိုတ်ညိ။
811) “ခမဳဗြဴ မသအးဇ္ၚးနကဵုဍာ် စဵုကဵုမသအးဇ္ၚးဂှ် သ္ဒးကြဴကြာတ် စဵုကဵုဌာန်မၞုံဗၞတ် ၜါတၚ်လပုဟ်တဲ ၜါတၞုၚ်ဟေၚ်ရ၊ ကုခမဳဗြဴ မကဵုကလိလောန်အာ ဗၞတ်ဗ္ၜတ်ဂှ် ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂး)။
