၄.၉.၄။ သိက္ခာပိုဒ်စတုတ္ထ

806) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ဗြဴကမၠောၚ်မောၚ်မတြေံမွဲဂှ် သ္ပခမဳ ပ္ဍဲဇရေၚ်ခမဳဗြဴဂမၠိုၚ်ရ။ ခမဳဗြဴမွဲဂှ် ဟွံမိပ်လဟိၚ်တုဲ ပြာပ်အာဇရေၚ် ခမဳဗြဴဂှ်တုဲမ္ဂး “ယွံနာဲဗြဴ ဗွဲမလအ်လမှသၟိၚ် အာကၠုၚ်ပံက်ဖက်ကဵု မၞးတအ်ညးဂမၠိုၚ်ရ၊ မၞးတအ်ညးဂမၠိုၚ် (တၞဟ်နအေၚ်ဒုၚ်ရာဂ) မုရဴသာ်လဵု ဂွံသၟဟ်စောံမာန်အိုတ်ရော?” ရဴဝွံ သၟာန်ခမဳဗြဴဂှ်ရ။ ယွံနာဲဗြဴ နကဵုဆုတဝ်ကြေက် မကလိတ်ကလောတ်သၟဟ်စောံ (တၞဟ်နအေၚ်ဒုၚ်ရာဂ) အိုတ်ရ ရဴဝွံ သ္ဂးရ။ ယွံနာဲဗြဴ ဆုဝ်ကြေက်မကဠိတ်ကဠောတ်တုန် ပသာ်ရော? ရဴဝွံ (သၟာန်တဴမ္ဂး) ခမဳဗြဴဂှ် ဟီုလဴထ္ၜးကဵု ပရူပရာဆုတဝ်ကြေက်မကလိတ်ကလောတ်ကုခမဳဗြဴမကၠုၚ်သၟာန်ဂှ်ရ။ ပ္ဍဲအခိၚ်ဂှ် ခမဳဗြဴဂှ် ဂိုၚ်ကေတ် ‘သ္ပသုၚ်စောဲ’ ဆုတဝ်ကြေက်မကဠိတ်ကဠောတ်တုဲ ပ္ဍဲကြဴ သီုဟဂွံကြာတ်ကဵုဍာ်ဂှ် ကၠဟ်ထောံလဝ် ပ္ဍဲဌာန်မွဲရ။ ခမဳဗြဴဂမၠိုၚ် ညာတ်ဒးရုဲကောံကၠံၚ်ဒၟံၚ်ရူရူတုဲ “ပွဝွံ ဒှ်ပွ မုရဴခမဳဗြဴမွဲရော?” ရဴဝွံ သၟာန်တုဲ ခမဳဗြဴဂှ် “ပွဝွံ ဒှ်ပွ အဲဍိက်ရ” ရဴဝွံ (ဟီုသ္ဂးရ)။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ဂိုၚ်ကေတ် ‘သ္ပသုၚ်စောဲ’ ဆုတဝ်ကြေက်မကဠိတ်ကဠောတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် ဂိုၚ်ေတ် ‘သ္ပသုၚ်စောဲ’ ဆုတဝ်ကြေက်မကဠိတ်ကဠောတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂှ် ဂိုၚ်ကေတ် ‘သ္ပသုၚ်စောဲ’ ဆုတဝ်ကြေက်မကဠောတ်ကဠောတ်ရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

807) “ဟိုတ်နူပွမသ္ပသုၚ်စောဲ ဆုတဝ်ကြေက်မကလိတ်ကလောတ်ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။