၄.၉.၃။ သိက္ခာပိုဒ်တတိယ

802) ပ္ဍဲအခိၚ်တဳလမၞံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴၜါဇကု ဟွံမိပ်လဟိၚ်တုဲ လုပ်အာပ္ဍဲဂၠမ်သတိက်တုဲမ္ဂး တက်ဒါတ်ဝေၚ် ဂၠးပဿာဝမဂ် (သၞိၚ်ဇကုညးဗြဴ) အိုတ်ရ။ ခမဳဗြဴဂမၠိုၚ် ဟိုတ်မမိၚ်ဗရုဂှ်ရ ဂြိပ်ကၠုၚ်တုဲ “ယွံနာဲဗြဴတအ် မၞးတအ်ညးဂမၠိုၚ် မုဟိုတ် ကလိလောန်မိပ်ဇြိပ်လဟိၚ် မွဲဟာန်ကေုာံတြုံအိုတ်ရော?” ရဴဝွံ ဟီုသ္ဂးကဵုခမဳဗြဴဂမၠိုၚ်ဂှ်အိုတ်ရ။ “ယွံနာဲဗြဴတအ် ပိုဲညးဂမၠိုၚ် ဟဂွံကလိလောန်မိပ်ဇြိပ်လဟိၚ် မွဲဟာန်ကေုာံတြုံအိုတ်ရ” ရဴဝွံ (သ္ဂးတုဲ) ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် တက်ဒါတ်ဝေၚ် ဂၠးပဿာဝမဂ် (သၞိၚ်ဇကုညးဗြဴ) အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂမၠိုၚ် တက်ဒါတ်ဝေၚ် ဂၠးပဿာဝမဂ် (သၞိၚ်ဇကုညးဗြဴ) အိုတ်ရောရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် တက်ဒါတ်ဝေၚ် ဂၠးပဿာဝမ်ဂ် (သၞိၚ်ဇကုညးဗြဴ) အိုတ်ရော? ယွံခမဳတအ် (ကမၠောန်ပွမခဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

803) “ဟိုတ်နူပွမတက်ဒါတ်ဝေၚ် ဂၠးပဿာဝမဂ် (သၞိၚ်ဇကုညးဗြဴ) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။