၄.၉.၂။ သိက္ခာပိုဒ်ဒုတိယ

798) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဆဗ္ဗဂ္ဂဳဂမၠိုၚ် ကဵုပိုက်တသော် ပ္ဍဲဌာန်မက္ဍန်ဂြက် ပၞက်ဓလုက်တုဲ သီုမဂၞံၚ်ဂၞါတ်ဇကုသၟး (ဟၟဲကဵုဗွိုက်လတက်) ဟုမ်ဍာ်ပ္ဍဲကြုၚ်အစိရဝတဳ မွဲဟာန်ကေုာံဗြဴစရာဲဍုၚ်ဂမၠိုၚ် ပ္ဍဲမွဲသၞေဟ်ဓဝ်အိုတ်ရ။ ဗြဴစရာဲဍုၚ်ဂမၠိုၚ် “မုဟိုတ် ခမဳဗြဴဂမၠိုၚ် ညံၚ်ရဴမၞိဟ်ဗြဴမဒုၚ်စသိုၚ်ကာမဂုဏ်ဂမၠိုၚ်ကီု ကဵုပိုက်ကၠေံတသော် ပ္ဍဲဌာန်မက္ဍန်ဂြပ်ပၞက်ဓလုက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဗြဴဂမၠိုၚ် သ္ဂောံမိၚ်ကေတ် ဂလာန်ဗြဴစရာဲဍုၚ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဆဗ္ဗဂ္ဂဳဂမၠိုၚ် ကဵုပိုက်ကၠေံတသော် ပ္ဍဲဌာန်မက္ဍန်ဂြက်ပၞက်ဓလုက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဆဗ္ဗဂ္ဂဳဂမၠိုၚ် ကဵုပိုက်ကၠေံတသော် ပ္ဍဲဌာန်မက္ဍန်ဂြက်ပၞက်ဓလုက်အိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဆဗ္ဗဂ္ဂဳဂမၠိုၚ် ကဵုပိုက်ကၠေံတသော် ပ္ဍဲဌာန်မက္ဍန်ဂြက်ပၞက်ဓလုက်အိုတ်ရော? ယွံခမဳတအ် (ကမၠောန်ပွခမဳဗြဴဆဗ္ဗဂ္ဂဳဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

799) “ယြဴခမဳဗြဴမွဲ ကဵုပိုက်ကၠေံတသော် ပ္ဍဲဌာန်မက္ဍန်ဂြက်ပၞက်ဓလုက်မ္ဂး၊ (ကုခမဳဗြဴဂှ်) ဒးအာပတ်ပဲါစိုတ်ရ” ရဴဝွံ (ဩဝ်ကဵုစၞောန် ထ္ၜးအိုတ်ညိ ရဴဝွံ သ္ဂးရ)။