၄.၉.၁၀.၁။ ပွံက်သိက္ခာပိုဒ်ဒသမ

835) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ ပွမလှေ် မ္ဂးဂှ် ပွမလှေ်အိုတ်သီုရောၚ်။ ပွမဂယှ်ေ မ္ဂးဂှ် ပွမဂယှ်ေအိုတ်သီုရောၚ်။ ပွမတိၚ်တိုက် မ္ဂးဂှ် ပွမတိၚ်တိုက်အိုတ်သီုရောၚ်။

836) အာတဴ တၞဟ်နပွမဗဵုသ္ၚေဝ်ကလၚ်မ္ဂး၊ ဒးအာပတ်ဒုက္ကဋ်ရ။ ယြဴပ္ဍဲဌာန်မွဲဒတူဒၟံၚ်တုဲ ဗဵုသ္ၚေဝ်လေဝ်ဗဵုသ္ၚေဝ်မ္ဂး၊ ကလၚ်လေဝ်ကလၚ်မ္ဂး၊ ဒးအာပတ်ပဲါစိုတ်ရ။ သၠးကၠေံ ဌာန်မထေက်ကဵုညာတ်မိၚ်တုဲ ဂၠိုၚ်ဂၠိုၚ်ကဵုဝါ ဗဵုသ္ၚေဝ်လေဝ်ဗဵုသ္ၚေဝ်မ္ဂး၊ ကလၚ်လေဝ်ကလၚ်မ္ဂး၊ ဒးအာပတ်ပဲါစိုတ်ရ။ အာတဴ တၞဟ်နပွမဗဵုသ္ၚေဝ်ကလၚ်မွဲမွဲဂကူမ္ဂး၊ ဒးအာပတ်ဒုက္ကဋ်ရ။ ယြဴပ္ဍဲဌာန်မွဲဒတူဒၟံၚ်တုဲ ဗဵုသ္ၚေဝ်လေဝ်ဗဵုသ္ၚေဝ်မ္ဂး၊ ကလၚ်လေဝ်ကလၚ်မ္ဂး၊ ဒးအာပတ်ပဲါစိုတ်ရ။ သၠးကၠေံ ဌာန်မထေက်ကဵုညာတ်မိၚ်တုဲ ဂၠိုၚ်ဂၠိုၚ်ကဵုဝါ ဗဵုသ္ၚေဝ်လေဝ်ဗဵုသ္ၚေဝ်မ္ဂး၊ ကလၚ်လေဝ်ကလၚ်မ္ဂး၊ ဒးအာပတ်ပဲါစိုတ်ရ။

837) တန်တဴဒၟံၚ်ပ္ဍဲအာရှာမ်တုဲ ဗဵုသ္ၚေဝ်လေဝ်ဗဵုသ္ၚေဝ်မ္ဂး၊ ကလၚ်လေဝ်ကလၚ်မ္ဂး၊ ကၠုၚ်တဴ ဌာန်တန်တဴ ဌာန်ဂဇအ် ဌာန်တိက် ခမဳဗြဴတုဲ လှေ်လေဝ်လှေ်အိုတ်မ္ဂး၊ ဂယှ်ေလေဝ်ဂယှ်ေအိုတ်မ္ဂး၊ တိၚ်တိုက်လေဝ်တိၚ်တိုက်မ္ဂး၊ ဃောအာဒၟံၚ်ဒစးတရဴ ဗဵုသ္ၚေဝ်လေဝ်ဗဵုသ္ၚေဝ်မ္ဂး၊ ကလၚ်လေဝ်ကလၚ်မ္ဂး၊ ဟိုတ်ကိစ္စကေၚ်ကာနွံမ္ဂး အာတုဲ ဗဵုသ္ၚေဝ်လေဝ်ဗဵုသ္ၚေဝ်မ္ဂး၊ ကလၚ်လေဝ်ကလၚ်မ္ဂး၊ ဟွံဒးအာပတ်ရ။ ဟိုတ်နူပရိုက်ဘဲဂမၠိုၚ် ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ဒသမတုဲရ။ လသုဏဝဂ် ပဌမတုဲရ။