၃.၉.၁။ သိက္ခာပိုဒ်နဝမ
773) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ် ပသ္ပဒတဴပ္ဍဲပြဝိုဏ် ဂကောံမွဲဂှ် ဍောၚ်ၜိုတ်တဴ နကဵုယာဂုအိုတ်ရ ‘ဝါတ်ယာဂုအိုတ်ရ’။ ပ္ဍဲအခိၚ်ဂှ် ဂကောံဂှ် တၞဟ်နသွက်ယာဂု ခမဳဗြဴဂမၠိုၚ် ပၟိက်ဂၞပ်တုပ် ပကောံပကေဝ်ကေတ်တုဲ စွံပတန်လဝ်ပရိက္ခရာ ပ္ဍဲသ္ၚိဖျာမွဲတၠတုဲမ္ဂး ပြာပ်အာဇရေၚ် ခမဳဗြဴဂမၠိုၚ်တုဲ “ယွံနာဲဗြဴတအ် ပ္ဍဲသ္ၚိဖျာမၞုံယၟုဝွံ တၞဟ်နသွက်ယာဂု စွံပတန်လဝ်ကဵုပရိက္ခရာတုဲရ၊ နူသ္ၚိဖျာဂှ် ကဵုရၚ်တၠုၚ်နၚ်သ္ၚုတုဲမ္ဂး ၜိုဟ်ယာဂုတုဲ ဩဝ်သ္ပပြဘိုဂ်အိုတ်ညိ” ရဴဝွံ ဂရၚ်ပတီရ။ ခမဳဗြဴဂမၠိုၚ် နကဵုပရိက္ခရာဂှ်ကီု နကဵုပရိက္ခရာ မအာတ်ကေတ်အလဵုဇကု ဖအောဝ်ကဵုရာန်ဂဥုဲတုဲ သ္ပပြဘိုဂ်အိုတ်ရ။ ဂကောံဂှ် တီတုဲ “မုဟိုတ် ခမဳဗြဴဂမၠိုၚ် နကဵုပရိက္ခရာညးဂမၠိုၚ်ပိုၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ်ကီု နကဵုပရိက္ခရာ မအာတ်ကေတ်အလဵုဇကုကီု သ္ဂောံဖအောဝ်ကဵုရာန်ဝတ္ထုသအာၚ်အိုတ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ ။ ပ ။ “ယွံခမဳတအ် ခမဳဗြဴဂမၠိုၚ် နကဵုပရိက္ခရာညးဂမၠိုၚ်ပိုၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ်ကီု နကဵုပရိက္ခရာ မအာတ်ကေတ်အလဵုဇကုကီု ဖအောဝ်ကဵုရာန်ဝတ္ထုသအာၚ်အိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရာ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် နကဵုပရိက္ခရာဂမၠိုၚ်ပိုၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ်ကီု နကဵုပရိက္ခရာ မအာတ်ကေတ်အလဵုဇကုကီု သ္ဂောံဖအောဝ်ကဵုရာန်ဝတ္ထုသအာၚ်အိုတ်ရော? ယွံခမဳတအ် (ကမၠောန်ပွမခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
774) “ယြဴခမဳဗြဴမွဲ နကဵုပရိက္ခရာညးဂမၠိုၚ်ပိုၚ် မၞုံကဵုပွမရန်တၟံ (စၞောန်ထ္ၜး)
သွက်ပစ္စယ်မွဲသအာၚ်ကီု နကဵုပရိက္ခရာ မအာတ်ကေတ်အလဵုဇကုကီု ဖအောဝ်ကဵုရာန်ဝတ္ထုသအာၚ်မ္ဂး၊ (ကုခမဳဗြဴဂှ်) ဒးအာပတ်နိဿဂ္ဂိပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
