၃.၆.၁။ သိက္ခာပိုဒ်ဆဋ္ဌ
758) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ဥပးဂမၠိုၚ် တၞဟ်နသွက်သ္ၚာဘိက္ခုနဳသၚ်ပၟိက်ဂၞပ်တုပ် ပကောံပကေဝ်ကေတ်တုဲ စွံပတန်လဝ် ပရိက္ခရာ ပ္ဍဲသ္ၚိညးဗၞိက်ယာတ်မွဲတၠတုဲမ္ဂး ပြာပ်အာဇရေၚ် ခမဳဗြဴဂမၠိုၚ်တုဲ “ယွံနာဲဗြဴတအ် ပ္ဍဲသ္ၚိညးဗၞိက်ယာတ် မၞုံယၟုဝွံ တၞဟ်နသွက်သ္ၚာ စွံပတန်လဝ်ကဵု ပရိက္ခာရာတုဲရ၊ နူသ္ၚိဂှ် ကဵုရၚ်တၠုၚ်နၚ်သ္ၚာတုဲ ဩဝ်ပါ်ပရအ်ကေတ်အိုတ်ညိ ရဴဝွံ ဂရၚ်ပတီအိုတ်ရ။ ခမဳဗြဴဂမၠိုၚ် နကဵုပရိက္ခရာဂှ် ဖအောဝ်ကဵုရာန်ဂဥုဲတုဲမ္ဂး သ္ပပြဘိုဂ်အိုတ်ရ။ ဥပးဂမၠိုၚ်တီတုဲ “မုဟိုတ် ခမဳဗြဴဂမၠိုၚ် နကဵုပရိက္ခရာသၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ် သ္ဂောံဖအောဝ်ကဵုရာန်ဝတ္ထုသအာၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဗြဴဂမၠိုၚ် သ္ဂောံမိၚ်ကေတ် ဂလာန်ဥပးဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂမၠိုၚ် နကဵုပရိက္ခရာသၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ် သ္ဂောံဖအောဝ်ကဵုရာန်ဝတ္ထုသအာၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ “ယွံခမဳတအ် ခမဳဗြဴဂမၠိုၚ် နကဵုပရိက္ခရာသၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ် ဖအောဝ်ကဵုရာန်ဝတ္ထုသအာၚ်အိုတ်ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴဂမၠိုၚ် နကဵုပရိက္ခရာသၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ် သ္ဂောံဖအောဝ်ကဵုရာန်ဝတ္ထုသအာၚ်အိုတ်ရော? ယွံခမဳတအ် (ကမၠောန်ပွမခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
759) “ယြဴခမဳဗြဴမွဲ နကဵုပရိက္ခရာသၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ် ဖအောဝ်ကဵုရာန်ဝတ္ထုသအာၚ်မ္ဂး၊ (ကုခမဳဗြဴဂှ်) ဒးအာပတ်နိဿဂ္ဂိပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
