၃.၅၁။ သိက္ခာပိုဒ်ပဥ္စမ
753) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ ဂိယဲဒၟံၚ်ရ။ ပ္ဍဲအခိၚ်ဂှ် ဥပးမွဲတၠ ပြာပ်အာဇရေၚ် ခမဳဗြဴထုလ္လနန္ဒာတုဲမ္ဂး “ယွံနာဲဗြဴ ထတ်ယုက်ဒၟံၚ်ဟာ၊ ယိုပ်ယာပ်ဒၟံၚ်ဟာ” ရဴဝွံ သၟာန်ခမဳဗြဴထုလ္လနန္ဒာရ။ ယွံဒကာ အဲ ဟွံထတ်ယုက်ရ၊ ဟွံယိုပ်ယာပ်ရ ရဴဝွံ (သ္ဂးရ)။ ယွံနာဲဗြဴ ကြက်စွံလဝ်ကဵုကသာပ် ပ္ဍဲသ္ၚိတၠဖျာမၞုံယၟုဝွံရ၊ နူသ္ၚိတၠဖျာဂှ် ဩဝ်ကဵုရၚ်တၠုၚ်ဂိုၚ်ကေတ် အရာဝတ္ထုနွံပၟိက်ဂှ်ညိ ရဴဝွံ (သ္ဂးရ)။ ခမဳဗြဴထုလ္လနန္ဒာဂှ် “ယွံသိက္ခမာန်ဗြဴ ဩဝ်အာညိ၊ နူသ္ၚိတၠဖျာမၞုံယၟုဝွံ ဩဝ်ရၚ်တၠုၚ်ကေတ်နၚ်ကၠေၚ် နကဵုကသာပ်ညိ” ရဴဝွံ ဖအောဝ်ဗလးဏာ သိက္ခမာန်ဗြဴမွဲရ။ ပ္ဍဲအခိၚ်ဂှ် သိက္ခမာန်ဗြဴဂှ် ရၚ်တၠုၚ်ကေတ်နၚ်ကၠေၚ် နကဵုကသာပ် နူသ္ၚိဖျာဂှ်တုဲ ကဵုကုခမဳဗြဴထုလ္လနန္ဒာရ။ ခမဳဗြဴထုလ္လနန္ဒာဂှ် “ယွံသိက္ခမာန်ဗြဴ အဲ ဟွံမွဲပၟိက်ကဵုကၠေၚ်ရ၊ နွံပၟိက်ကဵုကၠေၚ်သွဟ်ရ” ရဴဝွံ ဟီုသ္ဂးပၠန်ရ။ ပ္ဍဲအခိၚ်ဂှ် သိက္ခမာန်ဗြဴဂှ် ပြာပ်အာဇရေၚ် တၠဖျာဂှ်တုဲ “ယွံဒကာ နာဲဗြဴထုလ္လနန္ဒာဂှ် ဟွံမွဲပၟိက်ကဵုကၠေၚ်ရ၊ နွံပၟိက်ကဵုကၠေၚ်သွဟ်ဟေၚ်ရဂး၊ ဩဝ်ကလေၚ်ကေတ် ကၠေၚ်တၠအဲညိ၊ ဩဝ်ကဵုကၠေၚ်သွဟ် ကုအဲညိ” ရဴဝွံ သ္ဂးကဵုတၠဖျာဂှ်ရ။ ယွံနာဲဗြဴ ဂြပ်သွံလဝ်တုဲဂှ် ယဝ်ပိုဲညးဂမၠိုၚ် ကလေၚ်ဂိုၚ်ကေတ်မွဲလှေ်ပၠန်မ္ဂး၊ မုရဴပ္ဍဲအခိၚ်မွဲ ကြက်သ္ဂောံသွံဂြပ်ဂှ်ရော? နကဵုၚုဟ်ကၠေၚ်ဂှ် ဂိုၚ်ကေတ်ကၠေၚ်တုဲရ၊ ဩဝ်ကေၚ်နၚ် ၚုဟ်ကၠေၚ်သွဟ်ညိ၊ ကြက်ကလိဂွံကၠေၚ်သွဟ်ရ ရဴဝွံ (တၠဖျာ) ဟီုရ။ ပ္ဍဲအခိၚ်ဂှ် သိက္ခမာန်ဗြဴဂှ် ဒတူလရိုအ်ယာံဒၟံၚ်ရ၊ ခမဳဗြဴဂမၠိုၚ် “ယွံသိက္ခမာန်ဗြဴ တၠအဲ မုဟိုတ် လရိုအ်ယာံဒၟံၚ်ရော?” ရဴဝွံ သၟာန်သိက္ခမာန်ဗြဴဂှ်အိုတ်ရ။ ပ္ဍဲအခိၚ်ဂှ် သိက္ခမာန်ဗြဴဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ ဖအောဝ်ကဵုရာန်ဝတ္ထုသအာၚ်တုဲမှ ဖအောဝ်ကဵုရာန်ဝတ္ထုသအာၚ်ပၠန်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ ဖအောဝ်ကဵုရာန်ဝတ္ထုသအာၚ်တုဲမှ ဖအောဝ်ကဵုရာန်ဝတ္ထုသအာၚ်ပၠန်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ ဖအောဝ်ကဵုရာန်ဝတ္ထုသအာၚ်တုဲမှ ဖအောဝ်ကဵုရာန်ဝတ္ထုသအာၚ်ပၠန်ရော? ယွံခမဳတအ် (ကမၠောန်ခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
754) “ယြဴခမဳဗြဴမွဲ ဖအောဝ်ကဵုရာန်ဝတ္ထုသအာၚ်တုဲမှ ဖအောဝ်ကဵုရာန်ဝတ္ထုသအာၚ်မ္ဂး၊ (ကုခမဳဗြဴဂှ်) ဒးအာပတ်နိဿဂ္ဂိပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
