၃.၄.၁။ သိက္ခာပိုဒ်စတုတ္ထ
748) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာဂိယဲဒၟံၚ်ရ၊ ပ္ဍဲအခိၚ်ဂှ် ဥပးမွဲတၠ ပြာပ်အာဇရေၚ် ခမဳဗြဴထုလ္လနန္ဒာတုဲမ္ဂး “ယွံနာဲဗြဴ မုရဴဟွံဒှ်တသိုခ်မွဲ ဒှ်ကုတၠအဲရော? သ္ဂောံရၚ်တၠုၚ်နၚ် မုမွဲရော?” ရဴဝွံ ဟီုသ္ဂးကဵုခမဳဗြဴထုလ္လနန္ဒာရ။ ယွံဒကာ အဲ နွံပၟိက်ကဵုကၠေၚ်သွဟ်ရ ရဴဝွံ (သ္ဂးရ)။ ပ္ဍဲအခိၚ်ဂှ် ဥပးဂှ် ရၚ်တၠုၚ်နၚ် (ရာန်နၚ်) ကၠေၚ်သွဟ် နကဵုကသာပ် (နကဵုသၠုဲ) နူသ္ၚိဖျာမွဲတၠတုဲ ကဵုဒါန်ကုခမဳဗြဴထုလ္လနန္ဒာရ။ ခမဳဗြဴထုလ္လနန္ဒာဂှ် “ယွံဒကာ အဲ ဟွံမွဲပၟိက်ကဵုကၠေၚ်သွဟ်ရ၊ နွံပၟိက်ကဵုကၠေၚ်ဟေၚ်ရ” ရဴဝွံ ဟီုသ္ဂးပၠန်ရ။ ပ္ဍဲအခိၚ်ဂှ် ဥပးဂှ် ပြာပ်အာဇရေၚ်တၠဖျာပၠန်တုဲ “ယွံကောန်နာဲ နာဲဗြဴထုလ္လနန္ဒာ ဟွံမွဲပၟိက်ကဵုကၠေၚ်သွဟ်ရ၊ နွံပၟိက်ကဵုကၠေၚ်ဟေၚ်ရဂး၊ ဩဝ်ကလေၚ်ကေတ် ကၠေၚ်သွဟ်တၠအဲညိ၊ ဩဝ်ကဵုကၠေၚ် ကုအဲညိ” ရဴဝွံ သ္ဂးကဵုတၠဖျာဂှ်ရ။ ယွံနာဲ ဂြပ်သွံလဝ်တုဲဂှ် ယဝ်ပိုဲညးဂမၠိုၚ် ကလေၚ်ဂိုၚ်ကေတ်မွဲလှေ်ပၠန်မ္ဂး၊ မုရဴမွဲအခိၚ်မွဲ ကြက်သ္ဂောံသွံဂြပ်ရော? နကဵုၚုဟ်ကၠေၚ်သွဟ်ဂှ် ဂိုၚ်ကေတ်ကၠေၚ်သွဟ်တုဲရ၊ ဩဝ်ကေတ်နၚ် ၚုဟ်ကၠေၚ်ညိ၊ ကြက်ကလိဂွံကၠေၚ်ရ ရဴဝွံ (တၠဖျာ) ဟီုရ။ ပ္ဍဲအခိၚ်ဂှ် ဥပးဂှ် “မုဟိုတ် နာဲဗြဴထုလ္လနန္ဒာ အာတ်ဝတ္ထုသအာၚ်တုဲမှ အာတ်ဝတ္ထုသအာၚ်ရော” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဗြဴဂမၠိုၚ် သ္ဂောံမိၚ်ကေတ် ဂလာန်ဥပးဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ အာတ်ဝတ္ထုသအာၚ်တုဲမှ အာတ်ဝတ္ထုသအာၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ် ဂရၚ်ပတီဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ၊ ခမဳတြုံဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ အာတ်ဝတ္ထုသအာၚ်တုဲမှ အာတ်ဝတ္ထုသအာၚ်ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ အာတ်ဝတ္ထုသအာၚ်တုဲမှ အာတ်ဝတ္ထုသအာၚ်ရော? ယွံခမဳတအ် (ကမၠောန်ခမဳဗြဴ ထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
749) “ယြဴခမဳဗြဴမွဲ အာတ်ဝတ္ထုသအာၚ်တုဲမှ အာတ်ဝတ္ထုသအာၚ်မ္ဂး၊ (ကုခမဳဗြဴဂှ်) ဒးအာပတ်နိဿဂ္ဂိပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
