၃.၃.၁.၂။ ပွံက်သိက္ခာပိုဒ်တတိယ
745) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထိကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ မွဲဟာန်ကေုာံခမဳဗြဴ မ္ဂးဂှ် မွဲဟာန်ကေုာံခမဳဗြဴသအာၚ်။ သ္ၚာ မ္ဂးဂှ် ပၞောဝ်သ္ၚာဂမၠိုၚ်တြဴဂတှေ် ဗွဲတွဵုမယုတ် သ္ၚာမွဲမွဲဂတှေ် မရုပ်ဂပ်ကဵုဝိကပ္ပနရ။ လှာဲဂတး မ္ဂးဂှ် နကဵုသ္ၚာဗၞတ်ညိနာၚ်ဂှ် လှာဲဂတးကဵုသ္ၚာဂမၠိုၚ်ကီု နကဵုသ္ၚာမဂၠိုၚ်ဂှ် လှာဲဂတးကဵုသ္ၚာဗၞတ်ညိနာၚ်ကီုရ။ ပၠံၚ်ၜးကေတ် မ္ဂးဂှ် အလဵုဇကု ပၠံၚ်ၜးကတ်မ္ဂး၊ ဒးအာပတ်နိဿဂ္ဂိပဲါစိုတ်ရ။ ဖအောဝ်ကဵုပၠံၚ်ၜးကေတ် မ္ဂးဂှ် ဖအောဝ်ကဵုညးသအာၚ် ပၠံၚ်ၜးကေတ်မ္ဂး၊ ဒးအာပတ်ဒုက္ကဋ်ရ၊ သီုဂပ်ဝ်ဖအောဝ်စကာဗၞတ်မွဲဝါဂှ် ဗွဲမဂၠိုၚ်ကဵုဝါလေဝ် ပၠံၚ်ၜးမ္ဂး၊ မၞုံကဵုဝိနယ်ကမ်ပွမဒးသၠးရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုခမဳဗြဴမွဲဇကုကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံနာဲဗြဴတအ် သ္ၚာဝွံ လှာဲဂတးတဴ မွဲဟာန်ကေုာံခမဳဗြဴသအာၚ်တုဲ ဟိုတ်နူအဲဍိက် ပၠံၚ်ၜးကေတ်ဂှ်ရ ဂပ်ဝ်ဒးသၠးကၠေံရ၊ သ္ၚာဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကဵုရ ။ ပ ။ ရဴဝွံ ဒးကဵုအိုတ်ရ ။ ပ ။ ကဵုကုနာဲဗြဴရ ရဴဝွံ (ဒးကလေၚ်ကဵုရ)။
746) ပ္ဍဲခမဳဗြဴ မၞုံကဵုစၟတ်သမ္တီခမဳဗြဴဒှ်တုဲ လှာဲဂတးသ္ၚာတုဲမှ ပၠံၚ်ၜးလေဝ် ပၠံၚ်ၜးကေတ်မ္ဂး၊ ဖအောဝ်လေဝ် ဖအောဝ်ကဵုပၠံၚ်ၜးကေတ်မ္ဂး၊ ဒးအာပတ်နိဿဂ္ဂိပဲါစိုတ်ရ။ ပ္ဍဲခမဳဗြဴ မၞုံကဵုသၠေဟ်ပၟာတုဲ လှာဲဂတးသ္ၚာတုဲမှ ပၠံၚ်ၜးလေဝ် ပၠံၚ်ၜးကေတ်မ္ဂး၊ ဖအောဝ်လေဝ် ဖအောဝ်ကဵုပၠံၚ်ၜးကေတ်မ္ဂး၊ ဒးအာပတ်နိဿဂ္ဂိပဲါစိုတ်ရ။ ပ္ဍဲခမဳဗြဴ မၞုံကဵုစၟတ်သမ္တီဟွံသေၚ်ကဵုခမဳဗြဴဒှ်တုဲ လှာဲဂတးသ္ၚာတုဲမှ ပၠံၚ်ၜးလေဝ် ပၠံၚ်ၜးကေတ်မ္ဂး၊ ဖအောဝ်လေဝ်ဖအောဝ်ကဵုပၠံၚ်ၜးကေတ်မ္ဂး၊ ဒးအာပတ်နိဿဂ္ဂိပဲါစိုတ်ရ။ လှာဲဂတးပရိက္ခရာသအာၚ်တုဲမှ ပၠံၚ်ၜးကေတ်မ္ဂး၊ ဖအောဝ်ကဵုပၠံၚ်ၜးကေတ်မ္ဂး၊ ဒးအာပတ်ဒုက္ကဋ်ရ။ လှာဲဂတးသ္ၚာကီု ပရိက္ခရာသအာၚ်ကီု ကေုာံညးဟွံသေၚ်ကဵုခမဳဗြဴတုဲ ပၠံၚ်ၜးကေတ်မ္ဂး၊ ဖအောဝ်ကဵုပၠံၚ်ၜးကေတ်မ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳဗြဴ မၞုံကဵုစၟတ်သမ္တီခမဳဗြဴမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵု ခမဳဗြဴ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳဗြဴ မၞုံကဵုစၟတ်သမ္တီဟွံသေၚ်ကဵု ခမဳဗြဴမ္ဂး၊ ဟွံဒးအာပတ်ရ။
747) ခမဳဗြဴဂှ်လေဝ် (ကလေၚ်) ကဵုမ္ဂး၊ ကေုာံခမဳဗြဴဂှ်လေဝ် ဍုက်ကေဝ်ဒဒှ်ေဒယှ်တုဲ ဂိုၚ်ကေတ်မ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။
သိက္ခာပိုဒ်တတိယတုဲရ။
