၃.၃.၁။ သိက္ခာပိုဒ်တတိယ
743) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ လှာဲဂတးသ္ၚာ မွဲဟာန်ကေုာံခမဳဗြဴ မွဲသအာၚ်တုဲ သ္ပပြဘိုဂ်ရ။ ပ္ဍဲအခိၚ်ဂှ် ခမဳဗြဴဂှ် ထပ်လဝ်သ္ၚာဂှ်တုဲ စွံပတန်လဝ်ရ။ ခမဳဗြဴထုလ္လနန္ဒာ “ယွံနာဲဗြဴ သ္ၚာအဲကေုာံတၠအဲ လှာဲဂတးလဝ်ဂှ် ညးဍေံရော?” ရဴဝွံ သ္ဂးရ။ ပ္ဍဲအခိၚ်ဂှ် ခမဳဗြဴဂှ် ပတိတ်နၚ်သ္ၚာဂှ်တုဲ ထ္ၜးကဵုကုခမဳဗြဴထုလ္လနန္ဒာရ။ ခမဳဗြဴထုလ္လနန္ဒာ “ယွံနာဲဗြဴ ဟေအ် ဩဝ်ဂိုၚ်ကေတ် သ္ၚာတၠအဲညိ၊ ဩဝ်ရၚ်တၠုၚ်နၚ် သ္ၚာအဲညိ၊ သ္ၚာတၠအဲဂှ် ဒှ်ဂြပ်တၠအဲဟေၚ်တုဲ သ္ၚာအဲလေဝ် ဒှ်ဂြပ်အဲဟေၚ်ရ၊ ဩဝ်ရၚ်တၠုၚ်နၚ် သ္ၚာအဲညိ၊ ဩဝ်ကလေၚ်ကေတ်သ္ၚာဇကုညိ” ရဴဝွံ ဟီုသ္ဂးတုဲ ပၠံၚ်ၜးကေတ် (သ္ၚာ) ဂှ်ရ။ ပ္ဍဲကြဴနူဂှ် ခမဳဗြဴဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴသအာၚ်ဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ လှာဲဂတးသ္ၚာ မွဲဟာန်ကေုာံခမဳဗြဴမွဲသအာၚ်တုဲ သ္ဂောံပၠံၚ်ၜးကေတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ် ဂရၚ်ပတီဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ၊ ခမဳတြုံဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် နာဲဗြဴထုလ္လနန္ဒာ လှာဲဂတးသ္ၚာ မွဲဟာန်ကေုာံခမဳဗြဴသအာၚ်တုဲမှ ပၠံၚ်ၜးကေတ်ရဟီုဂှ် ဍာံပြရဟ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ လှာဲဂတးသ္ၚာ မွဲဟာန်ကေုာံခမဳဗြဴသအာၚ်တုဲမှ သ္ဂောံပၠံၚ်ၜးကေတ်ရော? ယွံခမဳတအ် (ကမၠောန်ပွမခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
744) “ယြဴခမဳဗြဴမွဲ လှာဲဂတးသ္ၚာ မွဲဟာန်ကေုာံခမဳဗြဴသအာၚ်တုဲ ပ္ဍဲကြဴ ‘ယွံနာဲဗြဴ ဟေအ် ဩဝ်ဂိုၚ်ကေတ်သ္ၚာတၠအဲညိ၊ ဩဝ်ရၚ်တၠုၚ်နၚ် သ္ၚာအဲညိ၊ သ္ၚာတဲအဲဂှ် ဒှ်ဂြပ်တၠအဲဟေၚ်တုဲ သ္ၚာအဲလေဝ် ဒှ်ဂြပ်အဲဟေၚ်ရ၊ ဩဝ်ရၚ်တၠုၚ်နၚ် သ္ၚာအဲညိ၊ ဩဝ်ကလေၚ်ကေတ်သ္ၚာဇကုညိ’ ရဴဝွံ ဟီုသ္ဂးတုဲ ပၠံၚ်ၜးလေဝ် ပၠံၚ်ၜးကေတ် (သ္ၚာ) ဂှ်မ္ဂး၊ ဖအောဝ်လေဝ်ဖအောဝ်ကဵုပၠံၚ်ၜးကေတ်မ္ဂး၊ (ကုခမဳဗြဴဂှ်) ဒးအာပတ်နိဿဂ္ဂိပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
