၃.၂.၁။ သိက္ခာပိုဒ်ဒုတိယ
738) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴဂမၠိုၚ်ဗွဲမဂၠိုၚ် ဒၠိုက်ကတဵုနူဝသ် ပ္ဍဲဘာကွာန်တုဲအိုတ်မ္ဂး သီုမဍိုက်ပေၚ်တဴကေုာံဒ္ဂေတ်ဝတ် ဣရိယာပိုထ်ဂမၠိုၚ် ယာတ်ၚေတ်ပေတ် သ္ၚာလေဝ်ကြဳဂမၠိုၚ်ဒှ်တုဲ အာဍုၚ်သာရဝှ်အိုတ်ရ။ ဒကာဂမၠိုၚ် ညာတ်ဒးခမဳဗြဴဂမၠိုၚ်တုဲ “ခမဳဗြဴဂမၠိုၚ်ဝွံ ကေုာံဒ္ဂေတ်ဝတ်လေဝ် ဍိုက်ပေၚ်အိုတ်ရ၊ ကေုာံဣရိယာပိုထ်လေဝ် ဍိုက်ပေၚ်အိုတ်ရ၊ ယာတ်လေဝ်ၚေတ် ပေတ်အိုတ်ရ၊ သ္ၚာလေဝ်ကြဳအိုတ်ရ၊ ခမဳဗြဴဂမၠိုၚ်ဝွံ ဒှ်ညးဒးဒုၚ်ပၠံၚ်ၜးဂမၠိုၚ်အိုတ်ရ” ရဴဝွံ (ပၠုပ်စိုတ်တုဲ) ကဵုဒါန် သ္ၚာဟွံသေၚ်ကဵုအခိၚ် ကုခမဳဗြဴဂမၠိုၚ်အိုတ်ရ။ ခမဳဗြဴထုလ္လနန္ဒာဂှ် “ကုပိုဲညးဂမၠိုၚ် လလးလဝ်ကထိုန်တုဲဒှ်တုဲ ဒှ်သ္ၚာအပ္ဍဲအခိၚ်ရောၚ်” ရဴဝွံ သှ်ပတူတုဲ ကဵုပါ်ပရအ်ရ။ ဒကာဂမၠိုၚ် ညးဒးခမဳဗြဴဂမၠိုၚ်တုဲ “နာဲဗြဴတအ်ညးဂမၠိုၚ် ကလိဂွံသ္ၚာကီုဟာ” ရဴဝွံ သၟာန်အိုတ်ရ။ ယွံဒကာတအ် ပိုဲညးဂမၠိုၚ် ဟွံကလိဂွံသ္ၚာအိုတ်ရ၊ နာဲဗြဴထုလ္လနန္ဒာဂှ် “ကုပိုဲညးဂမၠိုၚ် လလးလဝ်ကထိုန်တုဲဒှ်တုဲ ဒှ်သ္ၚာအပ္ဍဲအခိၚ်ရောၚ်” ရဴဝွံ သှ်ပတူတုဲ ကဵုပါ်ပရအ်တုဲရ ရဴဝွံ ဟီုသ္ဂးအိုတ်ရ။ ဒကာဂမၠိုၚ် “မုဟိုတ် နာဲဗြဴထုလ္လနန္ဒာ သ္ၚာ ဟွံသေၚ်ကဵုအခိၚ်ဂှ် သှ်ပတူ ရဴဝွံမ္ဂး ‘သ္ၚာအပ္ဍဲအခိၚ်’ တုဲ ကဵုပါ်ပရအ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဗြဴဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ သ္ၚာဟွံသေၚ်ကဵုအခိၚ်ဂှ် သှ်ပတူရဴဝွံမ္ဂး ‘သ္ၚာအပ္ဍဲအခိၚ်’ တုဲ ကဵုပါ်ပရအ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ် ဂရၚ်ပတီဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ၊ ခမဳတြုံဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ သ္ၚာဟွံသေၚ်ကဵုအခိၚ်ဂှ် သှ်ပတူ ရဴဝွံမ္ဂး ‘သ္ၚာအပ္ဍဲအခိၚ်’ တုဲ ကဵုပါ်ပရအ်ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိတု် ခမဳဗြဴထုလ္လနန္ဒာ သ္ၚာဟွံသေၚ်ကဵုအခိၚ်ဂှ် သှ်ပတူ ရဴဝွံမ္ဂး ‘သ္ၚာအပ္ဍဲအခိၚ်’ တုဲ ကဵုပါ်ပရအ်ရော? ယွံခမဳတအ် (ကမၠောန်ပွမခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
739) “ယြဴခမဳဗြဴမွဲ သ္ၚာဟွံသေၚ်ကဵုအခိၚ်ဂှ် သှ်ပတူ ရဴဝွံမ္ဂး ‘သ္ၚာအပ္ဍဲအခိၚ်’ တုဲ ကဵုပါ်ပရအ်မ္ဂး၊ (ကုခမဳဗြဴဂှ်) ဒးအာပတ်နိဿဂ္ဂိပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
