၃.၁၂.၁.၂။ ပွံက်သိက္ခာပိုဒ်ဒွါဒသမ
790) ယာတ်လတက်မသာ မ္ဂးဂှ် ယာတ်မလတက်မွဲမွဲဂတှေ် (မထေက်ကဵုသုၚ်စောဲ) ပ္ဍဲအခိၚ်မဂမ္တဴရောၚ်။ ခမဳဗြဴ မအာတ် မ္ဂးဂှ် ခမဳဗြဴ မကဵုတီကေတ်။ သ္ဒးအာတ် ယာတ်လတက်မထေက်ကဵုၚုဟ် ၜါကံသဘာ်မလောန်ရ မ္ဂးဂှ် သ္ဒးအာတ်ယာတ်လတက် မထေက်ကဵုၚုဟ်စှ်ကသာပ်ရ။ အာတ်တဴ ယာတ်လတက်မထေက်ကဵုၚုဟ် လောန်လတူဂှ် မ္ဂးဂှ် ကဵုတီကေတ် ယာတ်လတက်မထေက်ကဵုၚုဟ် လောန်လတူဂှ်မ္ဂး၊ ဟိုတ်နူပယောဂလွဳပရာ ဒးအာပတ်ဒုက္ကဋ်ရ။ ဟိုတ်ပွမကလိဂွံ မၞုံကဵုဝိနယ်ကမ် ပွမဒးသၠးကၠေံရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုခမဳဗြဴမွဲမွဲဇကုကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံနာဲဗြဴတအ် ယာတ်လတက်ဝွံ အဲဍိက် ဂပ်ဝ်အာတ်လောန်လတူ ၜါကံသဘာ် ‘စှ်ကသာပ်’ ဒှ်တုဲ ဂပ်ဝ်ဒးသၠးကၠေံရ၊ ယာတ်လတက်ဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကဵုရ ။ ပ ။ ရဴဝွံ ဒးကဵုအိုတ်ရ ။ ပ ။ ကဵုကုနာဲဗြဴရ ရဴဝွံ (ဒးကလေၚ်ကဵုရ)။
791) ပ္ဍဲလောန်လတူၜါကံသဘာ် မၞုံကဵုစၟတ်သမ္တီလောန်မ္ဂး၊ ဒးအာပတ်နိဿဂ္ဂိပဲါစိုတ်ရ၊ ပ္ဍဲလောန်လတူၜါကံသဘာ် မၞုံကဵုသၠေဟ်ပၟာမ္ဂး၊ ဒးအာပတ်နိဿဂ္ဂိပဲါစိုတ်ရ၊ ပ္ဍဲလောန်လတူၜါကံသဘာ် မၞုံကဵုစၟတ်သမ္တီဟွံလောန်မ္ဂး၊ ဒးအာပတ်နိဿဂ္ဂိပဲါစိုတ်ရ။ ပ္ဍဲမယုတ်ဒေက်သၟဝ်ၜါကံသဘာ် မၞုံကဵုစၟတ်သမ္တီလောန်မ္ဂး၊ ဒးအာပတ်ဒုက္ကဋ်ရ၊ ပ္ဍဲမယုတ်ဒေက်သၟဝ်ၜါကံသဘာ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ၊ ပ္ဍဲမယုတ်ဒေက်သၟဝ်ၜါကံသဘာ် မၞုံကဵုစၟတ်သမ္တီယုတ်ဒေက်မ္ဂး၊ ဟွံဒးအာပတ်ရ။
792) အာတ် ယာတ်လတက်မၞုံဗၞတ်ၜါကံသဘာ်မ္ဂး၊ အာတ် ယာတ်လတက်မၞုံဗၞတ်မယုတ်ဒေက် သၟဝ်ၜါကံသဘာ်မ္ဂး၊ အာတ် ကလောမသဂမၠိုၚ်မ္ဂး၊ အာတ်ညးဘိက်နိမန်လဝ်ဂမၠိုၚ်မ္ဂး၊ အာတ် တၞဟ်နဖဵုညးသအာၚ်မ္ဂး၊ ဖအောဝ်ကဵုရာန် နဂြပ်ဇကုမ္ဂး၊ ပ္ဍဲဇရေၚ်ညးမမိက်ကဵုအာတ် ယာတ်လတက် မထေက်ကဵုၚုဟ်မဂၠိုၚ်ဂဋ္ဌှ် အာတ်ယာတ်လတက် မထေက်ကဵုၚုဟ်မအောန်မ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ဒွါဒသမတုဲရ။ ယွံနာဲဗြဴတအ် ဂပ်ဝ်စၞောန်ထ္ၜးကဵု အာပတ်နိဿဂ္ဂိပဲါစိုတ်ဂမၠိုၚ်ပိစှော်ဝွံ ဗွဲသရုပ်တုဲအိုတ်ရ၊ ပ္ဍဲအာပတ်နိဿဂ္ဂိပဲါစိုတ်ဂမၠိုၚ်ပိစှော်ဂှ် သၟာန်နာဲဗြဴဂမၠိုၚ်ရ၊ သအးဇ္ၚးနူအာပတ်အိုတ်ရဟာ၊ မရနုက်ကဵုၜါဝါလေဝ် သၟာန်ရ၊ သအးဇ္ၚးနူအာပတ်အိုတ်ရဟာ၊ မရနုက်ကဵုပိဝါလေဝ် သၟာန်ရ၊ သအးဇ္ၚးနူအာပတ်အိုတ်ရဟာ၊ နာဲဗြဴတအ်ညးဂမၠိုၚ် ပ္ဍဲအာပတ်နိဿဂ္ဂိပဲါစိုတ်ဂမၠိုၚ်ဝွံ သအးဇ္ၚးနူအာပတ်အိုတ်ရ၊ ဟိုတ်ဂှ်ရ ဒၟံၚ်သ္ၚိတ်သ္ၚိတ်ဇြဇြအိုတ်ရ၊ ရဴဝွံ နမဒၟံၚ်သ္ၚိတ်သ္ၚိတ်ဇြဇြဂှ် ဂွံသမ္တီကေတ် ဒဒှ်မသအးဇ္ၚးနူအာပတ်ဝွံရ။
ဘိက္ခုနဳဝိဘၚ် ခဏ်နိဿဂ္ဂိတုဲရ။
