၃.၁၁.၁.၂။ ပွံက်သိက္ခာပိုဒ်ဨကာဒသမ

785) ယာတ်လတက်မဇြိုၚ် မ္ဂးဂှ် ယာတ်လတက်မွဲမွဲဂတှေ် (မထေက်ကဵုသုၚ်စောဲ) ပ္ဍဲအခိၚ်ၜိုဟ်ဂံက်ရောၚ်။ ခမဳဗြဴ မအာတ် မ္ဂးဂှ် ခမဳဗြဴ မကဵုတီကေတ်။ သ္ဒးအာတ် ယာတ်လတက်မထေက်ကဵုၚုဟ်ပန်ကံသမလောန်ရ မ္ဂးဂှ် သ္ဒးအာတ်ယာတ်လတက် မထေက်ကဵုၚုဟ်မးစှ်တြဴကသပ်ရ။ အာတ်တဴ ယာတ်လတက်မထေက်ကဵုၚုဟ်မး လောန်လတူဂှ် မ္ဂးဂှ် ကဵုတီကေတ် ယာတ်လတက်မထေက်ကဵုၚုဟ် လောန်လတူဂှ်မ္ဂး၊ ဟိုတ်နူပယောဂလွဳပရာ ဒးအာပတ်ဒုက္ကဋ်ရ။ ဟိုတ်ပွမကလိဂွံ မၞုံကဵုဝိနယ်ကမ် ပွမဒးသၠးကၠေံရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုခမဳဗြဴမွဲမွဲဇကုကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံနာဲဗြဴတအ် ယာတ်လတက်ဝွံ အဲဍိက် ဂပ်ဝ်အာတ်လောန်လတူပန်ကံသ ‘စှ်တြဴကသာပ်’ ဒှ်တုဲ ဂပ်ဝ်ဒးသၠးကၠေံရ၊ ယာတ်လတက်ဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကဵုရ ။ ပ ။ ရဴဝွံ ဒးကဵုအိုတ်ရ ။ ပ ။ ကဵုကုနာဲဗြဴရ ရဴဝွံ (ဒးကလေၚ်ကဵုရ)။

786) ပ္ဍဲလောန်လတူပန်ကံသ မၞုံကဵုစၟတ်သမ္တီလောန်မ္ဂး၊ ဒးအာပတ်နိဿဂ္ဂိပဲါစိုတ်ရ၊ ပ္ဍဲလောန်လတူပန်ကံသ မၞုံကဵုသၠေဟ်ပၟာမ္ဂး၊ ဒးအာပတ်နိဿဂ္ဂိပဲါစိုတ်ရ၊ ပ္ဍဲလောန်လတူပန်ကံသ မၞုံကဵုစၟတ်သမ္တီဟွံလောန်မ္ဂး၊ ဒးအာပတ်နိဿဂ္ဂိပဲါစိုတ်ရ။ ပ္ဍဲမယုတ်ဒေက်သၟဝ်ပန်ကံသ မၞုံကဵုစၟတ်သမ္တီလောန်မ္ဂး၊ ဒးအာပတ်ဒုက္ကဋ်ရ၊ ပ္ဍဲမယုတ်ဒေက်သၟဝ်ပန်ကံသ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ၊ ပ္ဍဲမယုတ်ဒေက်သၟဝ်ပန်ကံသ မၞုံကဵုစၟတ်သမ္တီယုတ်ဒေက်မ္ဂး၊ ဟွံဒးအာပတ်ရ။

787) အာတ် ယာတ်လတက်မၞုံဗၞတ်ပန်ကံသမ္ဂး၊ အာတ် ယာတ်လတက်မၞုံဗၞတ်မယုတ်ဒေက် သၟဝ်ပန်ကံသမ္ဂး၊ အာတ် ကလောမသဂမၠိုၚ်မ္ဂး၊ အာတ်ညးဘိက်နိမန်လဝ်ဂမၠိုၚ်မ္ဂး၊ အာတ် တၞဟ်နဖဵုညးသအၚ်မ္ဂး၊ ဖအောဝ်ကဵုရာန် နဂြပ်ဇကုမ္ဂး၊ ပ္ဍဲဇရေၚ်ညးမမိက်ကဵုအာတ် ယာတ်လတက် မထေက်ကဵုၚုဟ်မဂၠိုၚ်ဂှ် အာတ်ယာတ်လတက် မထေက်ကဵုၚုဟ်မအောန်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ဨကာဒသမတုဲရ။