၃.၁၁.၁။ သိက္ခာပိုဒ်ဨကာဒသမ
783) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ လမိၚ်လညာတ်ဂၠိုၚ်တုဲ ဟီုတွံခိုဟ်ရ၊ တၞဟ်နတွံဓရ်လေဝ် ဂံၚ်သကာတုဲ မၞုံကဵုအစောံသတ္တိရ။ ပ္ဍဲအခိၚ်ဂှ် သၟိၚ်ဇၞော်ပသေနဒဳကောသလ ပ္ဍဲအခိၚ်မၜိုဟ်ဂံက် ဓလီုလတက်နၚ်ယာတ်ကၟဝ် မထေက်တန်ကဵုၚုဟ်မးမဂၠိုၚ်တုဲ ပြာပ်အာဇရေၚ်ခမဳဗြဴထုလ္လနန္ဒာတုဲ လ္ၚောဝ်သ္ပဝတ်တုဲမ္ဂး ဂဇအ်ဒၟံၚ်ပ္ဍဲဒၞဲါမွဲရ၊ သၟိၚ်ဇၞော်ပသေနဒဳကောသလ မဂဇအ်ဒၟံၚ်ပ္ဍဲဒၞဲါမွဲတုဲဂှ် နကဵုဂလာန်ဓရ် ခမဳဗြဴထုလ္လနန္ဒာ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုကေက်သကာမြဟ်မြာရ။ ပ္ဍဲအခိၚ်ဂှ် နကဵုဂလာန်ဓရ် ခမဳဗြဴထုလ္လနန္ဒာဂှ် ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုကေက်သကာမြဟ်မြာတုဲမ္ဂး သၟိၚ်ဇၞော်ပသေနဒဳကောသလဂှ် “ယွံနာဲဗြဴ အရာဝတ္ထုနွံပၟိက်ဂှ် ဟီုသ္ဂးညိ” ရဴဝွံ ဂရၚ်ပတီ ခမဳဗြဴထုလ္လနန္ဒာရ။ ယွံသၟိၚ်မပြဲ တၠအဲ ယဝ်မိက်ကဵုဒါန် ကုအဲမ္ဂး ဩဝ်ကဵုဒါန်ယာတ်ကၟဝ်ဝွံညိ ရဴဝွံ ဟီုသ္ဂးဂှ်ရ ကဵုထောံဒါန်တုဲပ္ဍဲကြဴ ဒၠိုက်ကတဵုနူဒၞဲါတုဲမ္ဂး လ္ၚောဝ်သ္ပဝတ်တုဲ သ္ပရှေ်သှေ်ရဴဂဴကၠာ ပဲါစ္ဍးအာရ။ မၞိဟ်ဂမၠိုၚ် “ခမဳဗြဴဂမၠိုၚ်ဝွံ ပၟိက်ဇၞော်အိုတ်ရ၊ ဟွံတရိုပ်စိုတ်အိုတ်ရ၊ မုဟိုတ် သ္ဂောံအာတ်တဴယာတ်ကၟဝ်သၟိၚ်ဇၞော်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဗြဴဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ သ္ဂောံအာတ်တဴ ယာတ်ကၟဝ်သၟိၚ်ဇၞော်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ အာတ်တဴ ယာတ်ကၟဝ် သၟိၚ်ဇၞော်ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ အာတ်တဴယာတ်ကၟဝ်သၟိၚ်ဇၞော်ရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
784) “ခမဳဗြဴ မအာတ်ယာတ်လတက်မဇြိုၚ် (တီု) ဂှ် သ္ဒးအာတ် ယာတ်လတက်မထေက်ကဵုၚုဟ် ပန်ကံသမလောန်ရ၊ အာတ်တဴ ယာတ်လတက်မထေက်ကဵုၚုဟ် လောန်လတူဂှ်မ္ဂး၊ (ကုခမဳဗြဴဂှ်) ဒးအာတပ်နိဿဂ္ဂိပဲါစိုတ်ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
