၃.၁၀.၁.၂။ ပွံက်သိက္ခာပိုဒ်ဒသမ
780) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ နကဵုပရိက္ခရာ မၞုံကဵုပွမရန်တၟံ သွက်ပစ္စယ်မွဲသအာၚ် မ္ဂးဂှ် နကဵုပရိက္ခရာမဂပ်ဝ်ကဵုလဝ်ဒါန် တၞဟ်နဖဵုသွက်ဝတ္ထုပစ္စယ်မွဲသအာၚ်။ ဂြပ်ဇကုပိုၚ် မ္ဂးဂှ် ဂြပ်မကဵုလဝ်ဒါန် ကုခမဳဗြဴမွဲဇကု။ ဂြပ်မကဵုလဝ်ဒါန် ကုသၚ်ဟွံသေၚ်၊ ဂြပ်မကဵုလဝ်ဒါန် ကုဂိုဏ် ဟွံသေၚ်ရ။ ဍေံမအာတ်ကေတ်အလဵုဇကု မ္ဂးဂှ် အာတ်ကေတ်အလဵုဇကုတုဲ။ ဖအောဝ်ကဵုရာန်ဝတ္ထုသအာၚ် မ္ဂးဂှ် ပဲါကၠေံဝတ္ထုပစ္စယ် မရန်တၟံလဝ်ကဵုဒါန်တုဲ ဖအောဝ်ကဵုရာန်ဝတ္ထုသအာၚ်မ္ဂး၊ ဟိုတ်နူပယောဂလွဳပရာ ဒးအာပတ်ဒုက္ကဋ်ရ။ ဟိုတ်ပွမကလိဂွံ မၞုံကဵုဝိနယ်ကမ် ပွမဒးသၠးကၠေံရ၊ သ္ဒးသၠးကၠေံ ကုသၚ်ကီု ကုဂိုဏ်ကီု ကုခမဳဗြဴမွဲမွဲဇကုကီုရ။ ယွံခမဳတအ် ရဴဝွံ သ္ဒးသၠးကၠေံရ ။ ပ ။ “ယွံနာဲဗြဴတအ် နကဵုပရိက္ခရာဇကုပိုၚ် မၞုံကဵုပွမရန်တၟံ သွက်ပစ္စယ်မွဲသအာၚ်ကီု နကဵုပရိက္ခရာ မအာတ်ကေတ်အလဵုဇကုကီု အဲဍိက် ဂပ်ဝ်ဖအောဝ်ကဵုရာန်ဝတ္ထုသအာၚ်ဒှ်တုဲ ဂပ်ဝ်ဒးသၠးကၠေံရ၊ ဝတ္ထုဝွံ အဲဍိက် သၠးကဵုကုသၚ်ရ” ။ ပ ။ ရဴဝွံ ဒးကဵုရ ။ ပ ။ ရဴဝွံ ဒးကဵုအိုတ်ရ ။ ပ ။ ကဵုကုနာဲဗြဴရ ရဴဝွံ (ဒးကလေၚ်ကဵုရ)။
781) ပ္ဍဲဝတ္ထုမဒှ်သွက်ပစ္စယ်မွဲသအာၚ် မၞုံကဵုစၟတ်သမ္တီ ဝတ္ထုမဒှ်သွက်ပစ္စယ်မွဲသအာၚ်ဒှ်တုဲ ဖအောဝ်ကဵုရာန်ဝတ္ထုသအာၚ်မ္ဂး၊ ဒးအာပတ်နိဿဂ္ဂိပဲါစိုတ်ရ။ ပ္ဍဲဝတ္ထုမဒှ်သွက်ပစ္စယ်မွဲသအာၚ် မၞုံကဵုသၠေဟ်ပၟာဒှ်တုဲ ဖအောဝ်ကဵုရာန်ဝတ္ထုသအာၚ်မ္ဂး၊ ဒးအာပတ်နိဿဂ္ဂိပဲါစိုတ်ရ။ ပ္ဍဲဝတ္ထုမဒှ်သွက်ပစ္စယ်မွဲသအာၚ် မၞုံကဵုစၟတ်သမ္တီ ဝတ္ထုမဒှ်သွက်မွဲသအာၚ်ဟွံသေၚ်ဒှ်တုဲ ဖအောဝ်ကဵုရာန်ဝတ္ထုသအာၚ်မ္ဂး၊ ဒးအာပတ်နိဿဂ္ဂိပဲါစိုတ်ရ။ အခိၚ်မကလိဂွံ ဝတ္ထုမသၠးကၠေံတုဲဂှ် သ္ဒးကလေၚ်ရၚ်တၠုၚ်ပလံၚ်ဏာ အတိုၚ်မကဵုဒါန်တမ်ဂှ်ရ။ ပ္ဍဲအရာဟွံသေၚ်ကဵုဝတ္ထု မဒှ်သွက်ပစ္စယ်သအာၚ် မၞုံကဵုစၟတ်သမ္တီ ဝတ္ထုမဒှ်သွက်ပစ္စယ်သအာၚ်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံသေၚ်ကဵုဝတ္ထု မဒှ်သွက်ပစ္စယ်သအာၚ် မၞုံကဵုစၟတ်သမ္တီ ဟွံသေၚ်ကဵုဝတ္ထု မဒှ်သွက်ပစ္စယ်သအာၚ်မ္ဂး၊ ဟွံဒးအာပတ်ရ။
782) ရၚ်တၠုၚ်ဏာ မသှေ်သၟေဟ်ရ၊ ဂရၚ်ပတီလဴဗ္စကဵု တၠဂြပ်ဂမၠိုၚ်တုဲ ရၚ်တၠုၚ်ဏာမ္ဂး၊ ဟိုတ်နူပရိုက်ဘဲဂမၠိုၚ် ရၚ်တၠုၚ်ဏာမ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ်ဒသမတုဲရ။
