၃.၁၀.၁။ သိက္ခာပိုဒ်ဒသမ
778) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴထုလ္လနန္ဒာ လမိၚ်လညာတ်ဂၠိုၚ်တုဲ ဟီုတွံခိုဟ်ရ၊ တၞဟ်နတွံဓရ်လေဝ် ဂံၚ်သကာတုဲ မၞုံကဵုအစောံသတ္တိရ၊ မၞိဟ်ဂမၠိုၚ်မဂၠိုၚ် ပြာပ်ခသဳကၠဳ ခမဳဗြဴထုလ္လနန္ဒာအိုတ်ရ။ ပ္ဍဲအဃောအခိၚ်ဂှ် ပြဝိုဏ်ခမဳဗြဴထုလ္လနန္ဒာ သရိုဟ်လီုလာ်အာတုဲ မၞိဟ်ဂမၠိုၚ် “ယွံနာဲဗြဴ မုဟိုတ် ပြဝိုဏ်တၠအဲ သရိုဟ်လီုလာ်ရော?” ရဴဝွံ သၟာန်ခမဳဗြဴထုလ္လနန္ဒာအိုတ်ရ။ ယွံဒကာတအ် ညးမကဵုဒါန်ဂမၠိုၚ်လေဝ် ဟွံမွဲအိုတ်ရ၊ ညးမပဠေဝ်ပဠေတ်ကဵုဂမၠိုၚ်လေဝ် ဟွံမွဲအိုတ်ရ ရဴဝွံ သ္ဂးရ။ ပ္ဍဲအဃောအခိၚ်ဂှ် မၞိဟ်ဂမၠိုၚ် တၞဟ်နသွက်ပြဝိုဏ် ခမဳဗြဴထုလ္လနန္ဒာ ပၟိက်ဂၞပ်တုပ် ပကောံပကေဝ်ကေတ်တုဲ ကဵုဒါန်ပရိက္ခာ ကုခမဳဗြဴထုလ္လနန္ဒာအိုတ်ရ။ ခမဳဗြဴထုလ္လနန္ဒာဂှ် နကဵုပရိက္ခရာဂှ်ဂှ်ကီု နကဵုပရိက္ခရာ မအာတ်ကေတ်အလဵုဇကုကီု ဖအောဝ်ကဵုရာန်ဂဥုဲတုဲ သ္ပပြဘိုဂ်ရ။ မၞိဟ်ဂမၠိုၚ်ဂှ် တီတုဲ “မုဟိုတ် နာဲဗြဴထုလ္လနန္ဒာ နကဵုပရိက္ခရာဇကုပိုၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ်ကီု နကဵုပရိက္ခရာ မအာတ်ကေတ်အလဵုဇကုကီု သ္ဂောံဖအောဝ်ကဵုရာန်ဝတ္ထုသအာၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ နကဵုပရိက္ခရာဇကုပိုၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ်ကီု နကဵုပရိက္ခရာ မအာတ်ကေတ်အလဵုဇကုကီု ဖအောဝ်ကဵုရာန်ဝတ္ထုသအာၚ် ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴထုလ္လနန္ဒာ နကဵုပရိက္ခရာဇကုပိုၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ်ကီု နကဵုပရိက္ခရာ မအာတ်ကေတ်အလဵုဇကုကီု သ္ဂောံဖအောဝ်ကဵုရာန်ဝတ္ထုသအာၚ်ရော? ယွံခမဳတအ် (ကမၠောန်ပွ ခမဳဗြဴထုလ္လနန္ဒာသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
779) “ယြဴခမဳဗြဴမွဲ နကဵုပရိက္ခရာဇကုပိုၚ် မၞုံကဵုပွမရန်တၟံ (စၞောန်ထ္ၜး) သွက်ပစ္စယ်မွဲသအာၚ်ကီု နကဵုပရိက္ခရာ မအာတ်ကေတ်အလဵုဇကုကီု ဖအောဝ်ကဵုရာန်ဝတ္ထုသအာၚ်မ္ဂး၊ (ကုခမဳဗြဴဂှ်) ဒးအာပတ်နိဿဂ္ဂိပဲါစိုတ်ရ” ရဴဝွံ (ဩဝ်ကဵုစၞောန်ထ္ၜး အိုတ်ညိ ရဴဝွံ သ္ဂးရ)။
