၂.၉.၁။ ပွံက်နဝမသံဃာဒိသေသ်သိက္ခာပိုဒ်
723) ခမဳဗြဴဂမၠိုၚ်ဟေၚ် မ္ဂးဂှ် ဂပ်ဝ်သ္ဂးတဴ ခမဳဗြဴဂမၠိုၚ်မဒှ်ပယျၚ်အိုတ်ရ။ ပ္ဍဲအရာ နှဴရဴကေုာံခရှ်ဂမၠိုၚ်တုဲ ပဒတဴအိုတ်ရ ဂှ် နှဴရဴ မ္ဂးဂှ် နှဴရဴနပွကာယ ပွပါၚ် မဟွံဗဗွဲကုခမဳဂမၠိုၚ်တုဲ ပဒတဴအိုတ်ရ။ သီုမၞုံကဵုဒ္ဂေတ်မယုတ်မာ မ္ဂးဂှ် ဍိုက်ပေၚ်ကေုာံဒ္ဂေတ်မယုတ်မာအိုတ်ရ။ သီုဗရုဒယှ်တှ်မယုတ်မာ မ္ဂးဂှ် ဒယှ်တှ်ဗျာပ်တြးအာ နဗရုဒယှ်တှ်မယုတ်မာ ‘ပရိုၚ်ဟွံခိုဟ်’ အိုတ်ရ။ သီုမၞုံကဵုပွမဂယိုၚ်လမျီုမယုတ်မာ မ္ဂးဂှ် သ္ပတဴပွမဂယိုၚ်လမျီု နပွမဂယိုၚ်လမျီုမယုတ်မာ မမှာရာအိုတ်ရ။ သီုမဂြောပ်ဗ္ဒန်ဒုဟ် ကေုာံရၚ်သကအ် မ္ဂးဂှ် သီုမဂြောပ်ဗ္ဒန်ဒုဟ် ကေုာံရၚ်သကအ်အိုတ်ရ။ ခမဳဗြဴဂမၠိုၚ်ဂှ် မ္ဂးဂှ် ခမဳဗြဴမနှဴရဴကေုာံခရှ်တုဲ ပဒတဴဂမၠိုၚ်ဂှ်။ ခမဳဗြဴဂမၠိုၚ် မ္ဂးဂှ် ခမဳဗြဴသအာၚ်ဂမၠိုၚ်။ ခမဳဗြဴမဆဵုညာတ်မမိၚ်ဂမၠိုၚ် “ဒေံဗြဴ, ၝဲတအ်ညးဂမၠိုၚ် နှဴရဴကေုာံခရှ်ဂမၠိုၚ်တုဲ သီုမၞုံကဵုဒ္ဂေတ်မယုတ်မာ ဗရုဒယှ်တှ်မယုတ်မာ ပွမဂယိုၚ်လမျီုမယုတ်မာဂှ် ပြိုက်ဖ္ဍောၚ်ကုဘိက္ခုနဳသၚ်တုဲမ္ဂး သီုမဂြောပ်ဗ္ဒန်ဒုဟ် ကေုာံရၚ်သကအ်ဂှ် ပဒတဴအိုတ်ရ၊ ယွံနာဲဗြဴတအ် ဩဝ်ပဒတဴဗွဲလ္ၚုအာအိုတ်ညိ၊ ပွမပဒတဴ ဗွဲမလ္ၚုအာ ဒေံဗြဴ, ၝဲတအ်ညးဂမၠိုၚ်ဟေၚ် သၚ်ထိုၚ်သးရ” ရဴဝွံ သ္ဒးဟီု ဒၠောံဗတောန်ရ။ မရနုက်ကဵုၜါဝါလေဝ် သ္ဒးဟီုဒၠောံဗတောန်ရ၊ မရနုက်ကဵုပိဝါလေဝ် သ္ဒးဟီုဒၠောံဗတောန်ရ။ ယဝ်သၠးကၠေံကွေတ်ဂှ်အိုတ်မ္ဂး၊ ပွမသၠးကၠေံဂှ် ခိုဟ်သန်ရ၊ ယဝ်ဟွံသၠးကၠေံအိုတ်မ္ဂး၊ ဒးအာပတ်ဒုက္ကဋ်ရ။ မိၚ်တုဲ ဟွံဟီုသ္ဂးအိုတ်မ္ဂး၊ ဒးအာပတ်ဒုက္ကဋ်ရ။ ခမဳဗြဴဂှ် တံၚ်ဓဇက်ဏာလဒေါဝ်သၚ်တုဲလေဝ် “ဒေံဗြဴ, ၝဲတအ်ညးဂမၠိုၚ် နှဴရဴကေုာံခရှ်ဂမၠိုၚ်တုဲ သီုမၞုံကဵုဒ္ဂေတ်မယုတ်မာ ဗရုဒယှ်တှ်မယုတ်မာ ပွမဂယိုၚ်လမျီုမယုတ်မာဂှ် ပြိုက်ဖ္ဍောၚ်ကုဘိက္ခုနဳသၚ်တုဲမ္ဂး သီုမဂြောပ်ဗ္ဒန်ဒုဟ် ကေုာံရၚ်သကအ်ဂှ် ပဒတဴအိုတ်ရ၊ ယွံနာဲဗြဴတအ် ဩဝ်ပဒတဴဗွဲလ္ၚုအာအိုတ်ညိ၊ ပွမပဒတဴ ဗွဲမလ္ၚုအာ ဒေံဗြဴ, ၝဲတအ်ညးဂမၠိုၚ်ဟေၚ် သၚ်ထိုၚ်သးရ” ရဴဝွံ သ္ဒးဟီု ဒၠောံဗတောန်ရ။ မရနုက်ကဵုၜါဝါလေဝ် သ္ဒးဟီုဒၠောံဗတောန်ရ၊ မရနုက်ကဵုပိဝါလေဝ် သ္ဒးဟီုဒၠောံဗတောန်ရ။ ယဝ်သၠးကၠေံကွေတ်ဂှ်အိုတ်မ္ဂး၊ ပွမသၠးကၠေံဂှ် ခိုဟ်သန်ရ၊ ယဝ်ဟွံသၠးကၠေံအိုတ်မ္ဂး၊ ဒးအာပတ်ဒုက္ကဋ်ရ။ ဒးဒၠောံဗတောန် ခမဳဗြဴဂမၠိုၚ်ဂှ် နဉတ်ကမ္မဝါစ် ဗွဲမဒးရးရ၊ ယွံခမဳတအ် ရဴဝွံဟေၚ် သ္ဒးဒၠောံဗတောန်ဗွဲမဒးရးရ၊ ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
724) ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴဂမၠိုၚ် မၞုံယၟုဝွံမၞုံယၟုဝွံ နှဴရဴကေုာံခရှ်ဂမၠိုၚ်တုဲ သီုမၞုံကဵုဒ္ဂေတ်မယုတ်မာ ဗရုဒယှ်တှ်မယုတ်မာ ပွမဂယိုၚ်လမျီုမယုတ်မာဂှ် ပြိုက်ဖ္ဍောၚ်ကုဘိက္ခုနဳသၚ်တုဲမ္ဂး သီုမဂြောပ်ဗ္ဒန်ဒုဟ် ကေုာံရၚ်သကအ်ဂှ် ပဒတဴအိုတ်ရ၊ ခမဳဗြဴဂမၠိုၚ်ဂှ် ဟွံသၠးကၠေံဝတ္ထုဂှ်အိုတ်ရ၊ ကမ်မၞုံကဵုအခိၚ်မဗဗွဲ ယဝ်ဒှ်မ္ဂး၊ တၞဟ်နကဵုသၠးကၠေံဝတ္ထုဂှ် သၚ် သ္ဒးဒၠောံဗတောန် ခမဳဗြဴမၞုံယၟုဝွံ မၞုံယၟုဝွံ နဉတ်ကမ္မဝါစ် ဗွဲမဒးရးရ၊ ဣဝွံတုန် ပွမကဵုတီရောၚ်။ ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴဂမၠိုၚ် မၞုံယၟုဝွံ မၞုံယၟုဝွံ နှဴရဴကေုာံခရှ်ဂမၠိုၚ်တုဲ သီုမၞုံကဵုဒ္ဂေတ်မယုတ်မာ ဗရုဒယှ်တှ်မယုတ်မာ ပွမဂယိုၚ်လမျီုမယုတ်မာဂှ် ပြိုက်ဖ္ဍောၚ်ကုဘိက္ခုနဳသၚ်တုဲမ္ဂး သီုမဂြောပ်ဗ္ဒန်ဒုဟ် ကေုာံရၚ်သကအ်ဂှ် ပဒတဴအိုတ်ရ၊ ခမဳဗြဴဂမၠိုၚ်ဂှ် ဟွံသၠးကၠေံဝတ္ထုဂှ်အိုတ်ရ၊ တၞဟ်နကဵုသၠးကၠေံဝတ္ထုဂှ် သၚ် ဒၠောံဗတောန် ခမဳဗြဴမၞုံယၟုဝွံမၞုံယၟုဝွံ (နဉတ်ကမ္မဝါစ်) ဗွဲမဒးရးရ၊ ယြဴကုနာဲဗြဴမွဲ တၞဟ်နကဵုသၠးကၠေံဝတ္ထုဂှ် သ္ဍိုက်မၠိုက် ပွမဒၠောံဗတောန် ခမဳဗြဴမၞုံယၟုဝွံ မၞုံယၟုဝွံ ဗွဲမဒးရးရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ ။ ပ ။ တၞဟ်နကဵုသၠးကၠေံဝတ္ထုဂှ် သၚ် ဂပ်ဝ်ဒၠောံဗတောန် ခမဳဗြဴမၞုံယၟုဝွံမၞုံယၟုဝွံ ဗွဲမဒးရးတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။ ပ္ဍဲလအိတ်ဉတ် ဒးအာပတ်ဒုက္ကဋ်ရ၊ ပ္ဍဲလအိတ်ကမ္မဝါစ်ဂမၠိုၚ်ၜါဝါ ဒးအာပတ်ထုလ္လစ္စယ်ရ၊ ပ္ဍဲလအိတ်ကမ္မဝါစ် ဒးအာပတ်သံဃာဒိသေသ်ရ။ ကုခမဳဗြဴဂမၠိုၚ် မဒးအာပတ်သံဃာဒိသေသ်ဂှ် အာပတ်ဒုက္ကဋ် မ္ဒးပ္ဍဲလအိတ်ဉတ် ထုလ္လစ္စယ်မ္ဒးပ္ဍဲလအိတ်ကမ္မဝါစ်ဂမၠိုၚ် ၜါဝါဂမၠိုၚ်ဂှ် လလမ်အိုတ်ရ။ ခမဳဗြဴဂမၠိုၚ် ၜါဇကု ပိဇကု ဂပ်ဝ်ဒၠောံဗတောန် မွဲဂကောံဓဝ်အိုတ်ရ၊ လောန်လတူ (ၜါဇကုပိဇကုဂမၠိုၚ်ဂှ်) ဟဂပ်ဝ်ဒၠောံဗတောန်အိုတ်ရ။ ခမဳဗြဴဝွံတုန် မ္ဂးဂှ် ထံက်ရံၚ်ကဵုခမဳဗြဴ မဒးအာပတ်မဒှ်ကိုပ်ကၠာဂမၠိုၚ်တုဲ ဂပ်ဝ်သ္ဂးရ။ စဵုကဵုပေၚ်ပိဝါ မ္ဂးဂှ် မလေပ်ကဵုဗက်ပတိတ် နူဂကောံသၚ်ရ။ သံဃာဒိသေသ် မ္ဂးဂှ် ။ ပ ။ ဟိုတ်ဂှ်လေဝ် ကော်ခဴဂး ရဴဝွံမ္ဂး “သံဃာဒိသေသ်” ရ။
725) ပ္ဍဲဓမ္မကမ် မၞုံကဵုစၟတ်သမ္တီ ဓမ္မကမ်ဒှ်တုဲ ဟွံသၠးကၠေံကွေတ်မ္ဂး၊ ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံသၠေဟ်ပၟာဒှ်တုဲ ဟွံသၠးကၠေံကွေတ်မ္ဂး၊ ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံကဵုစၟတ်သမ္တီ အဓမ္မကမ်ဒှ်တုဲ ဟွံသၠးကၠေံမ္ဂး၊ ဟွံသၠးကၠေံကွေတ်မ္ဂး၊ ဒးအာပတ်သံဃာဒိသေသ်ရ။ ပ္ဍဲအမ္မကမ် မၞုံကဵုစၟတ်သမ္တီ ဓမ္မကမ်မ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုစၟတ်သမ္တီ အဓမ္မကမ်မ္ဂး၊ ဒးအာပတ်ဒုက္ကဋ်ရ။
726) ကုခမဳဗြဴ မဟွံဒးဒၠောံဗတောန်ဗွဲမဒးရး (နဉတ်ကမ္မဝါစ်) ခမဳဗြဴသၠးကၠေံကွေတ် ခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂမၠိုၚ်ဂှ် ဟွံဒးအာပတ်ရ။ နဝမသံဃာဒိသေသ် သိက္ခာပိုဒ်တုဲရ။
