၂.၈.၁။ ပွံက်အဋ္ဌမသံဃာဒိသေသ်သိက္ခာပိုဒ်
717) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂးခမဳဗြဴရ။ ပ္ဍဲအရာ ပ္ဍဲအဓိကိုရ် မမိက်ကဵုမွဲမွဲဂှ် အဓိကိုရ် မ္ဂးဂှ် ဝိဝါဒါဓိကိုရ် အနုဝါဒါဓိကိုရ် အာပတ္တာဓိကိုရ် ကိစ္စာဓိကိုရ် ရဴဝွံ အဓိကိုရ်ပန်ဂကူဂမၠိုၚ်ရောၚ်။ ကျအာတုဲ မ္ဂး သ္ဂးတဴ ဟွံမာန်ရ။
ဟိုတ်မထေဲပၞတ်တုဲ မၞုံစိုတ်ဟွံမိပ်ဂှ်ရ မ္ဂးဂှ် မၞုံစိုတ်ဟွံမိပ်လဟိၚ်ဒှ်တုဲ မၞုံစိုတ်မဒွံလုက်စုက် (ထ္ဍိမြိ) ဒးဒှ်တုဲ မၞုံစိုတ်မကတဵုဒှ် ညံၚ်ကၞက်စရံၚ်ဒှ်တုဲ။ ရဴဝွံ ဟီုသ္ဂး မ္ဂးဂှ် “ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ ။ ပ ။ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ” ရဴဝွံ ဟီုသ္ဂးမ္ဂး။ ခမဳဗြဴဂှ် မ္ဂးဂှ် ခမဳဗြဴမၞုံအလေံဟီုသ္ဂးရဴဝွံ။ ခမဳဗြဴဂမၠိုၚ် မ္ဂးဂှ် ခမဳဗြဴသအာၚ်ဂမၠိုၚ်။
ခမဳဗြဴမဆဵုညာတ်မမိၚ်ဂမၠိုၚ် “ယွံနာဲဗြဴ ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံစိုတ်ဟွံမိပ်ဂှ်ရ ‘ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ ။ ပ ။ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ’ ရဴဝွံ လ္ပဟီုသ္ဂးညိ၊ နာဲဗြဴဟေၚ် ဆန္ဒာဂတိလေဝ် ဗက်စရ ။ ပ ။ ဘယာဂတိလေဝ် ဗက်စရ” ရဴဝွံ သ္ဒးကဵုဒၠောံဗတောန်ရ။ မရနုက်ကဵုၜါဝါလေဝ် သ္ဒးဟီုဒၠောံဗတောန်ရ၊ မရနုက်ကဵုပိဝါလေဝ် သ္ဒးဟီုဒၠောံဗတောန်ရ။ ယဝ်သၠးကၠေံကွေတ်ဂှ်မ္ဂး၊ ပွမသၠးကၠေံဂှ် ခိုဟ်သန်ရ၊ ယဝ်ဟွံသၠးကၠေံမ္ဂး၊ ဒးအာပတ်ဒုက္ကဋ်ရ။ မိၚ်တုဲ ဟွံဟီုသ္ဂးမ္ဂး၊ ဒးအာပတ်ဒုက္ကဋ်ရ။ ခမဳဗြဴဂှ် တံၚ်ဓဇက်ဏာ လဒေါဝ်သၚ်တုဲလေဝ် “ယွံနာဲဗြဴ ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံစိုတ်ဟွံမိပ်ဂှ်ရ ‘ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ ။ ပ ။ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ’ ရဴဝွံ လ္ပဟီုသ္ဂးညိ၊ နာဲဗြဴဟေၚ် ဆန္ဒာဂတိလေဝ် ဗက်စရ ။ ပ ။ ဘယာဂတိလေဝ် ဗက်စရ” ရဴဝွံ သ္ဒးဟီုဒၠောံဗတောန်ရ။ မရနုက်ကဵုၜါဝါလေဝ် သ္ဒးဟီုဒၠောံဗတောန်ရ၊ မရနုက်ကဵုပိဝါလေဝ် သ္ဒးဟီုဒၠောံဗတောန်ရ။ ယဝ်သၠးကၠေံကွေတ်ဂှ်မ္ဂး၊ ပွမသၠးကၠေံဂှ် ခိုဟ်သန်ရ၊ ယဝ်ဟွံသၠးကၠေံမ္ဂး၊ ဒးအာပတ်ဒုက္ကဋ်ရ။ ဒးဒၠောံဗတောန် ခမဳဗြဴဂှ် နဉတ်ကမ္မဝါစ် ဗွဲဒးရးရ၊ ယွံခမဳတအ် ရဴဝွံဟေၚ် သ္ဒးဒၠောံဗတောန်ဗွဲမဒးရးရ၊ ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
718) ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴမၞုံယၟုဝွံ ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံကဵုစိုတ်ဟွံမိပ်ဂှ်ရ ‘ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ ။ ပ ။ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ’ ရဴဝွံ လ္ပဟီုသ္ဂးညိ၊ နာဲဗြဴဟေၚ် ဆန္ဒာဂတိလေဝ် ဗက်စရ ။ ပ ။ ဘယာဂတိလေဝ် ဗက်စရ” ရဴဝွံ ဟီုသ္ဂးရ၊ ခမဳဗြဴဂှ် ဟွံသၠးကၠေံဝတ္ထုဂှ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ တၞဟ်နကဵုသၠးကၠေံဝတ္ထုဂှ် သၚ် သ္ဒးဒၠောံဗတောန် ခမဳဗြဴမၞုံယၟုဝွံ နဉတ်ကမ္မဝါစ် ဗွဲမဒးရးရ၊ ဣဝွံတုန် ပွမကဵုတီရောၚ်။
ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴမၞုံယၟုဝွံ ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံကဵုစိုတ်ဟွံမိပ်ဂှ်ရ ‘ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ ။ ပ ။ ခမဳဗြဴဂမၠိုၚ် ဘယာဂတိလေဝ် ဗက်စရ’ ရဴဝွံ လ္ပဟီုသ္ဂးညိ၊ နာဲဗြဴဟေၚ် ဆန္ဒာဂတိလေဝ် ဗက်စရ ။ ပ ။ ဘယာဂတိလေဝ် ဗက်စရ” ရဴဝွံ ဟီုသ္ဂးရ၊ ခမဳဗြဴဂှ် ဟွံသၠးကၠေံဝတ္ထုဂှ်ရ၊ တၞဟ်နကဵုသၠးကၠေံဝတ္ထုဂှ် သၚ် ဒၠောံဗတောန် ခမဳဗြဴမၞုံယၟုဝွံ (နဉတ်ကမ္မဝါစ်) ဗွဲမဒးရးရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။
မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ ။ ပ ။
တၞဟ်နကဵုသၠးကၠေံဝတ္ထုဂှ် သၚ် ဂပ်ဝ်ဒၠောံဗတောန် ခမဳဗြဴမၞုံယၟုဝွံ ဗွဲမဒးရးတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။ ပ္ဍဲလအိတ်ဉတ် ဒးအာပတ်ဒုက္ကဋ်ရ၊ ပ္ဍဲလအိတ်ကမ္မဝါစ်ဂမၠိုၚ်ၜါဝါ ဒးအာပတ်ထုလ္လစ္စယ်ရ၊ ပ္ဍဲလအိတ်ကမ္မဝါစ် ဒးအာပတ်သံဃာဒိသေသ်ရ။ ကုခမဳဗြဴ မ္ဒးအာပတ်သံဃာဒိသေသ်ဂှ် အာပတ်ဒုက္ကဋ် မ္ဒးပ္ဍဲလအိတ်ဉတ် ထုလ္လစ္စယ်မ္ဒးပ္ဍဲလအိတ်ကမ္မဝါစ်ဂမၠိုၚ်ၜါဝါဂမၠိုၚ်ဂှ် လလမ်အိုတ်ရ။
ခမဳဗြဴဝွံလေဝ် မ္ဂးဂှ် ထံက်ရံၚ်ကဵုခမဳဗြဴ မ္ဒးအာပတ်မဒှ်ကိုပ်ကၠာဂမၠိုၚ်တုဲ ဂပ်ဝ်သ္ဂးရ။ စဵုကဵုပေၚ်ပိဝါ မ္ဂးဂှ် ဒးအာပတ် ဟိုတ်နူပွမဒၠောံဗတောန် နဉတ်ကမ္မဝါစ် စဵုကဵုပေၚ်ပိဝါရ၊ မွဲဒမြိပ်ကေုာံပွမကလိလောန်ဝတ္ထုဂှ် ဒးဟွံသေၚ်ရ။ မလေပ်ကဵုဗက်ပတိတ် မ္ဂးဂှ် မလေပ်ကဵုဗက်ပတိတ် နူဂကောံသၚ်ရ။ သံဃာဒိသေသ် မ္ဂးဂှ် ။ ပ ။ ဟိုတ်ဂှ်လေဝ် ကော်ခဴဂး ရဴဝွံမ္ဂး “သံဃာဒိသေသ်” ရ။
719) ပ္ဍဲဓမ္မကမ် မၞုံကဵုစၟတ်သမ္တီ ဓမ္မကမ်ဒှ်တုဲ ဟွံသၠးကၠေံကွေတ်မ္ဂး၊ ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံကဵုသၠေဟ်ပၟာဒှ်တုဲ ဟွံသၠးကၠေံကွေတ်မ္ဂး၊ ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံကဵုစၟတ်သမ္တီ အဓမ္မကမ်ဒှ်တုဲ ဟွံသၠးကၠေံမ္ဂး၊ ဟွံသၠးကၠေံကွေတ်မ္ဂး၊ ဒးအာပတ် သံဃာဒိသေသ်ရ။ ပ္ဍဲအမ္မကမ် မၞုံကဵုစၟတ်သမ္တီ ဓမ္မကမ်မ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုစၟတ်သမ္တီ အဓမ္မကမ်မ္ဂး၊ ဒးအာပတ်ဒုက္ကဋ်ရ။
720) ကုခမဳဗြဴ မဟွံဒးဒၠောံဗတောန်ဗွဲမဒးရး (နဉတ်ကမ္မဝါစ်) ခမဳဗြဴသၠးကၠေံကွေတ် ခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ အဋ္ဌမသံဃာဒိသေသ် သိက္ခာပိုဒ် တုဲရ။
