၂.၈။ အဋ္ဌမသံဃာဒိသေသ်သိက္ခာပိုဒ်
715) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴစဏ္ဍကာဠဳ ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံကဵုစိုတ်ဟွံမိပ်ရ “ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ၊ ခမဳဗြဴဂမၠိုၚ် ဒေါသာဂတိလေဝ် ဗက်စအိုတ်ရ၊ ခမဳဗြဴဂမၠိုၚ် မောဟာဂတိလေဝ် ဗက်စအိုတ်ရ၊ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ” ရဴဝွံ ဟီုသ္ဂးရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴစဏ္ဍကာဠဳဂှ် ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံစိုတ်ဟွံမိပ်ဂှ်ရ “ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ ။ ပ ။ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ ရဴဝွံ ဟီုသ္ဂးအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴစဏ္ဍကာဠဳဂှ် ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံစိုတ်ဟွံမိပ်ဂှ်ရ ‘ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ ။ ပ ။ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ’ ရဴဝွံ ဟီုသ္ဂးအိုတ်ရဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴစဏ္ဍကာဠဳဂှ် ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံစိုတ်ဟွံမိပ်ဂှ်ရ “ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ ။ ပ ။ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ” ရဴဝွံ ဟီုသ္ဂးအိုတ်ရော? ယွံခမဳတအ် (ကမၠောန်ပွစဏ္ဍကာဠဳ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
716) “ယြဴခမဳဗြဴမွဲ ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံစိုတ်ဟွံမိပ်ဂှ်ရ ‘ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ၊ ခမဳဗြဴဂမၠိုၚ် ဒေါသာဂတိလေဝ် ဗက်စအိုတ်ရ၊ ခမဳဗြဴဂမၠိုၚ် မောဟာဂတိလေဝ် ဗက်စအိုတ်ရ၊ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ’ ရဴဝွံ ဟီုသ္ဂးမ္ဂး၊ ခမဳဗြဴဂမၠိုၚ် ‘ယွံနာဲဗြဴ ပ္ဍဲအဓိကိုရ် မမိက်ကဵုမွဲမွဲ ကျအာတုဲ ဟိုတ်မထေဲပၞတ်တုဲ မၞုံစိုတ်ဟွံမိပ်ဂှ်ရ ‘ခမဳဗြဴဂမၠိုၚ် ဆန္ဒာဂတိလေဝ် ဗက်စအိုတ်ရ၊ ခမဳဗြဴဂမၠိုၚ် ဒေါသာဂတိလေဝ် ဗက်စအိုတ်ရ၊ ခမဳဗြဴဂမၠိုၚ် မောဟာဂတိလေဝ် ဗက်စအိုတ်ရ၊ ခမဳဗြဴဂမၠိုၚ် ဘယာဂတိလေဝ် ဗက်စအိုတ်ရ’ ရဴဝွံ လ္ပဟီုသ္ဂးညိ၊ နာဲဗြဴဟေၚ် ဆန္ဒာဂတိလေဝ် ဗက်စရ၊ ဒေါသာဂတိလေဝ် ဗက်စရ၊ မောဟာဂတိလေဝ် ဗက်စရ၊ ဘယာဂတိလေဝ် ဗက်စရ ရဴဝွံသ္ဒးဟီုဒၠောံဗတောန် ခမဳဗြဴဂှ်ရ၊ ရဴဝွံဟေၚ် ခမဳဗြဴဂှ် သီုကဵုခမဳဗြဴသအာၚ်ဂမၠိုၚ် ဟီုသ္ဂးတဴဂှ် တုပ်နဲကိုပ်ကၠာဟေၚ် ယိုက်ဒိုက်ဂိုၚ်ကေတ်မ္ဂး၊ တၞဟ်နကဵုသၠးကၠေံကွေတ်ဂှ် စဵုကဵုပေၚ်ပိဝါ ခမဳဗြဴသအာၚ်ဂမၠိုၚ် ဂပ်ဝ်ဒၠောံဗတောန် ခမဳဗြဴဂှ် ဗွဲမဒးရး (နဉတိကမ္မဝါစ်) ရ၊ စဵုကဵုပေၚ်ပိဝါ ဂပ်ဝ်ဒၠောံဗတောန်ဗွဲမဒးရးနေဝ် ယဝ်သၠးကၠေံမ္ဂး၊ ပွမသၠးကၠေံ ရဴဝွံ ခိုဟ်သန်ရ၊ ယဝ်ဟွံသၠးကၠေံမ္ဂး၊ ခမဳဗြဴဝွံလေဝ် ဒးအာပတ် ပ္ဍဲမသက္ကုခြာ မဒၠောံဗတောန် နဉတ်ကမ္မဝါစ် ပိလတုန်ဒှ်တုဲ အာစိုပ်အာပတ်သံဃာဒိသေသ် မလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
