၂.၇။ သတ္တမသံဃာဒိသေသ်သိက္ခာပိုဒ်
709) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴစဏ္ဍကာဠဳ ကတဵုဒှ်သေက်ဇဵု ကေုာံခမဳဗြဴဂမၠိုၚ်တုဲမ္ဂး၊ ထေဲပၞတ်တုဲ ဟိုတ်မၞုံစိုတ်ဟွံမိပ်ဂှ်ရ “သၠးကၠေံ ကျာ်ရ၊ သၠးကၠေံ ဓရ်ရ၊ သၠးကၠေံ သၚ်ရ၊ သၠးကၠေံ ဒ္ဂေတ်သိက္ခာရ၊ ခမဳဗြဴဂမၠိုၚ် မဒှ်တၞောဝ်ကျာ်ကောန်သၟိၚ်ဗြဴသာကျဝၚ်ဝွံဟေၚ် ဒှ်ခမဳဗြဴဂမၠိုၚ်ဟာ၊ ခမဳဗြဴသအာၚ်လေဝ်ဂွဂၠေံတုဲ မၞုံကဵုကုက္ကုစ္စ မၞုံကဵုဒ္ဂေတ်သိက္ခာဂမၠိုၚ်လေဝ် နွံအိုတ်ဏီရ၊ အဲ ကြက်ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဗြဴဂမၠိုၚ်ဂှ်ရ” ရဴဝွံ သ္ဂးရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴစဏ္ဍကာဠဳဂှ် ထေဲပၞတ်တုဲ ဟိုတ်မၞုံစိုတ်ဟွံမိပ်ဂှ်ရ ‘သၠးကၠေံ ကျာ်ရ၊ သၠးကၠေံ ဓရ်ရ၊ သၠးကၠေံ သၚ်ရ၊ သၠးကၠေံ ဒ္ဂေတ်သိက္ခာရ၊ ခမဳဗြဴဂမၠိုၚ် မဒှ်တၞောဝ်ကျာ်ကောန်သၟိၚ်ဗြဴသာကျဝၚ်ဝွံဟေၚ် ဒှ်ခမဳဗြဴဂမၠိုၚ်ဟာ၊ ခမဳဗြဴသအာၚ်လေပ်ဂွဂၠေံတုဲ မၞုံကဵုကုက္ကုစ္စ မၞုံကဵုဒ္ဂေတ်သိက္ခာဂမၠိုၚ်လေဝ် နွံအိုတ်ဏီရ၊ အဲ ကြက်ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဗြဴဂမၠိုၚ်ဂှ်ရ’ ရဴဝွံ ဟီုသ္ဂးရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေတ်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴစဏ္ဍကာဠဳဂှ် ထေဲပၞတ်တုဲ ဟိုတ်မၞုံစိုတ်ဟွံမိပ်ဂှ်ရ ‘သၠးကၠေံ ကျာ်ရ ။ ပ ။ သၠးကၠေံ ဒ္ဂေတ်သိက္ခာရ၊ ခမဳဗြဴဂမၠိုၚ် မဒှ်တၞောဝ်ကျာ်ကောန်သၟိၚ်ဗြဴသာကျဝၚ်ဝွံဟေၚ် ဒှ်ခမဳဗြဴဂမၠိုၚ်ဟာ၊ ခမဳဗြဴသအာၚ် လေပ်ဂွဂၠေံတုဲ မၞုံကဵုကုက္ကုစ္စ မၞုံကဵုဒ္ဂေတ်သိက္ခာဂမၠိုၚ်လေဝ် နွံအိုတ်ဏီရ၊ အဲ ကြက်ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဗြဴဂမၠိုၚ်ဂှ်ရ’ ရဴဝွံ ဟီုသ္ဂးရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် မုဟိုတ် ခမဳဗြဴစဏ္ဍကာဠဳဂှ် ထေဲပၞတ်တုဲ ဟိုတ်မၞုံစိုတ်ဟွံမိပ်ဂှ်ရ “သၠးကၠေံ ကျာ်ရ ။ ပ ။ သၠးကၠေံ ဒ္ဂေတ်သိက္ခာရ၊ ခမဳဗြဴဂမၠိုၚ် မဒှ်တၞောဝ်ကျာ်ကောန်သၟိၚ်ဗြဴသာကျဝၚ်ဝွံဟေၚ် ဒှ်ခမဳဗြဴဂမၠိုၚ်ဟာ၊ ခမဳဗြဴသအာၚ် လေပ်ဂွဂၠေံတုဲ မၞုံကဵုကုက္ကုစ္စ မၞုံကဵုဒ္ဂေတ်သိက္ခာဂမၠိုၚ်လေဝ် နွံအိုတ်ဏီရ၊ အဲ ကြက်ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဗြဴဂမၠိုၚ်ဂှ်ရ” ရဴဝွံ ဟီုသ္ဂးရော? ယွံခမဳတအ် (ကမၠောန်ပွစဏ္ဍကာဠဳ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
710) “ယြဴခမဳဗြဴမွဲ ထေဲပၞတ်တုဲ ဟိုတ်မၞုံစိုတ်ဟွံမိပ်ဂှ်ရ ‘သၠးကၠေံ ကျာ်ရ၊ သၠးကၠေံ ဓရ်ရ။ သၠးကၠေံ သၚ်ရ၊ သၠးကၠေံ ဒ္ဂေတ်သိက္ခာရ၊ ခမဳဗြဴဂမၠိုၚ် မဒှ်တၞောဝ်ကျာ်ကောန်သၟိၚ်ဗြဴ သာကျဝၚ်ဝွံဟေၚ် ဒှ်ခမဳဗြဴဂမၠိုၚ်ဟာ၊ ခမဳဗြဴသအာၚ် လေပ်ဂွဂၠေံတုဲ မၞုံကဵုကုက္ကုစ္စ မၞုံကဵုဒ္ဂေတ်သိက္ခာဂမၠိုၚ်လေဝ် နွံအိုတ်ဏီရ၊ အဲ ကြက်ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဗြဴဂမၠိုၚ်ဂှ်ရ’ ရဴဝွံ ဟီုသ္ဂးမ္ဂး။ ခမဳဗြဴဂမၠိုၚ် ‘ယွံနာဲဗြဴ ထေဲပၞတ်တုဲ ဟိုတ်မၞုံစိုတ်ဟွံမိပ်ဂှ်ရ ‘သၠးကၠေံ ကျာ်ရ၊ သၠးကၠေံ ဓရ်ရ၊ သၠးကၠေံ သၚ်ရ၊ သၠးကၠေံ ဒ္ဂေတ်သိက္ခာရ၊ ခမဳဗြဴဂမၠိုၚ် မဒှ်တၞောဝ်ကျာ်ကောန်သၟိၚ်ဗြဴသာကျဝၚ်ဝွံဟေၚ် ဒှ်ခမဳဗြဴဂမၠိုၚ်ဟာ၊ ခမဳဗြဴသအာၚ် လေပ်ဂွဂၠေံတုဲ မၞုံကဵုကုက္ကုစ္စ မၞုံကဵုဒ္ဂေတ်သိက္ခာဂမၠိုၚ်လေဝ် နွံအိုတ်ဏီရ၊ အဲ ကြက်ဒ္ဂေတ်လ္ၚတ် ဒ္ဂေတ်မပြဲ ပ္ဍဲဇရေၚ်ခမဳဗြဴ ဂမၠိုၚ်ဂှ်ရ ရဴဝွံ လ္ပဟီုသ္ဂးညိ၊ ယွံနာဲဗြဴ ဩဝ်မိပ်လဟိၚ်ညိ၊ တဳလမၞုံပိုဉ်ကျာ်တြဲ ဂပ်ဝ်တွံဓရ် ဗွဲမဒးရးရ၊ တၞဟ်နသွက်ဂွံသ္ပကၠေံလအိတ်ဒဒိုခ်ဝဋ် ဩဝ်ဒ္ဂေတ်တဴ ဒ္ဂေတ်မပြဲဗွဲမဒးရးညိ ရဴဝွံ သ္ဒးဟီုဒၠောံဗတောန် ခမဳဗြဴဂှ်ရ၊ ရဴဝွံဟေၚ် ခမဳဗြဴဂှ် သီုကဵုခမဳဗြဴသအာၚ်ဂမၠိုၚ်ဟီုသ္ဂးတဴဂှ် တုပ်နဲကိုပ်ကၠာဟေၚ် ယိုက်ဒိုက်ဂိုၚ်ကေတ်မ္ဂး၊ တၞဟ်နကဵုသၠးကၠေံကွေတ်ဂှ် စဵုကဵုပေၚ်ပိဝါ ခမဳဗြဴသအာၚ်ဂမၠိုၚ် ဂပ်ဝ်ဒၠောံဗတောန်ခမဳဗြဴဂှ် ဗွဲမဒးရး (နဉတ်ကမ္မဝါစ်) ရ၊ စဵုကဵုပေၚ်ပိဝါ ဂပ်ဝ်ဒၠောံဗတောန်ဗွဲမဒးရးနေဝ် ယဝ်သၠးကၠေံမ္ဂး၊ ပွမသၠးကၠေံ ရဴဝွံ ခိုဟ်သန်ရ၊ ယဝ်ဟွံသၠးကၠေံမ္ဂး၊ ခမဳဗြဴဝွံလေဝ် ဒးအာပတ် ပ္ဍဲမသက္ကုခြာ မဒၠောံဗတောန် နဉတ်ကမ္မဝါစ်ပိလတုန်ဒှ်တုဲ အာစိုပ်အာပတ်သံဃာဒိသေသ် မလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ။)
