၂.၆။ ဆဋ္ဌသံဃာဒိသေသ်သိက္ခာပိုဒ်
704) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴသုန္ဒရဳနန္ဒာဂှ် ရုပ်သာ်ကျေဝ်ဂေါဝ်ရ၊ ထေက်ကဵု ဗဵုသ္ၚေဝ်ရ၊ ထေက်ကဵုလျုၚ်ဇြုၚ်သ္ဍိုက်ရ၊ မၞိဟ်ဂမၠိုၚ် ညာတ်ဒးခမဳဗြဴသုန္ဒရဳနန္ဒာ ပ္ဍဲဇြပ်ကဵုပိုဉ်တုဲ ဍုက်ဍေက်တဴနရာဂဒှ်တုဲ ကဵုဒါန် ဘောဇိုန်မခိုဟ်ပြဲလောန် ကုခမဳဗြဴသုန္ဒရဳနန္ဒာအိုတ်ရ။ ခမဳဗြဴ သုန္ဒရဳနန္ဒာတုန် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာရဴဝွံမ္ဂး ဟွံဂပ်ဝ်ဒှ်တုဲ ဟွံဒုၚ်ဂိုၚ်ရ။ ခမဳဗြဴမၞုံကာတ်ဒၟံၚ် (ပ္ဍဲဇရေၚ်) ဂှ် “ယွံနာဲဗြဴ မုဟိုတ် ဟွံဒုၚ်ဂိုၚ်ကေတ်ရော?” ရဴဝွံ သ္ဂးရ။ ယွံနာဲဗြဴ ညးဍုက်ဍေက်တဴနရာဂဂမၠိုၚ်ရ ရဴဝွံ (သ္ဂးရ)။ ယွံနာဲဗြဴ တၠအဲလေဝ် ဍုက်ဍေက်တဴနရာဂဟာ ရဴဝွံ (အခိၚ်မသၟာန်တိုန်ဂှ်)— အဲတုန် ဟွံဍုက်ဍေက်တဴနရာဂရ ရဴဝွံ (သ္ဂးရ)။ ယွံနာဲဗြဴ တြုံဂှ် အဲဗတိုက်ဖအောဝ်ရ၊ တၠအဲ ဟိုတ်မဟွံဍုက်ဍေက်တဴနရာဂဂှ်ရ စၞစဘောဇိုန် တြုံဂှ် ကဵုဒါန်ကုတၠအဲဂှ် ဒုၚ်ဂိုၚ်ကေတ် နတဲဇကုတုဲ ဩဝ်သ္ၚာဲလေဝ်သ္ၚာဲညိ ဩဝ်စလေဝ်စညိ ရဴဝွံ (သ္ဂးရ)။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ‘ယွံနာဲဗြဴ တြုံဂှ် ဍုက်ဍေက်တဴနရာဂကဵုဒှ် ဟွံဍုက်ဍေက်ကဵုဒှ် ပသာ်ကြက်သ္ပမာန် ကုတၠအဲရော? ယွံနာဲဗြဴ အဲဗတိုက်ဖအောဝ်ရ၊ တၠအဲ ဟိုတ်မဟွံဍုက်ဍေက်တဴနရာဂဂှ်ရ စၞစဘောဇိုန် တြုံဂှ် ကဵုဒါန်ကုတၠအဲဂှ် ဒုၚ်ဂိုၚ်ကေတ် နတဲဇကုတုဲ ဩဝ်သ္ၚာဲလေဝ်သ္ၚာဲညိ ဩဝ်စလေဝ်စညိ’ ရဴဝွံ ဟီုသ္ဂးရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် ‘ယွံနာဲဗြဴ တြုံဂှ် ဍုက်ဍေက်တဴနရာဂကဵုဒှ် ဟွံဍုက်ဍေက်ကဵုဒှ် ပသာ်ကြက်သ္ပမာန် ကုတၠအဲရော? ယွံနာဲဗြဴ အဲဗတိုက်ဖအောဝ်ရ၊ တၠအဲ ဟိုတ်မဟွံဍုက်ဍေက်တဴနရာဂဂှ်ရ စၞစဘောဇိုန် တြုံဂှ် ကဵုဒါန်ကုတၠအဲဂှ် ဒုၚ်ဂိုၚ်ကေတ် နတဲဇကုတုဲ ဩဝ်သ္ၚာဲလေဝ်သ္ၚာဲညိ ဩဝ်စလေဝ်စညိ’ ရဴဝွံ ဟီုသ္ဂးရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် ခမဳဗြဴဂှ် မုဟိုတ် “ယွံနာဲဗြဴ တြုံဂှ် ဍုက်ဍေက်တဴနရာဂကဵုဒှ် ဟွံဍုက်ဍေက်ကဵုဒှ် ပသာ်ကြက်သ္ပမာန် ကုတၠအဲရော? ယွံနာဲဗြဴ အဲဗတိုက်ဖအောဝ်ရ၊ တၠအဲ ဟိုတ်မဟွံဍုက်ဍေက်တဴနရာဂဂှ်ရ စၞစဘောဇိုန်တြုံဂှ် ကဵုဒါန်ကုတၠအဲဂှ် ဒုၚ်ဂိုၚ်ကေတ် နတဲဇကုတုဲ ဩဝ်သ္ၚာဲလေဝ်သ္ၚာဲညိ ဩဝ်စလေဝ်စညိ” ရဴဝွံ ဟီုသ္ဂးရော? ယွံခမဳတအ် (ကမၠောန်ပွသုန္ဒရဳနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
705) “ယြဴခမဳဗြဴမွဲ ‘ယွံနာဲဗြဴ တြုံဂှ် ဍုက်ဍေက်တဴနရာဂကဵုဒှ် ဟွံဍုက်ဍေက်ကဵုဒှ် မသာ်ကြက်သ္ပမာန် ကုတၠအဲရော? ယွံနာဲဗြဴ အဲဗတိုက်ဖအောဝ်ရ၊ တၠအဲ ဟိုတ်မဟွံဍုက်ဍေက်တဴနရာဂရ စၞစဘောဇိုန် တြုံဂှ် ကဵုဒါန်ကုတၠအဲဂှ် ဒုၚ်ဂိုၚ်ကေတ် နတဲဇကုတုဲ ဩဝ်သ္ၚာဲလေဝ်သ္ၚာဲညိ ဩဝ်စလေဝ်စညိ’ ရဴဝွံ ဟီုသ္ဂးမ္ဂး၊ ခမဳဗြဴဝွံလေဝ် ဒးအာပတ် ပ္ဍဲချိုန်ခဏမကလိလောန်ကၠေံ ဗွဲကိုပ်ကၠာဒှ်တုဲ အာစိုပ်အာပတ်သံဃာဒိသေသ် ပလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
