၂.၅။ ပဥ္စမသံဃာဒိသေသ်သိက္ခာပိုဒ်

699) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴသုန္ဒရဳနန္ဒာဂှ် ရုပ်သာ်ကျေဝ်ဂေါဝ်ရ၊ ထေက်ကဵုဗဵုသ္ၚေဝ်ရ၊ ထေက်ကဵုလျုၚ်ဇြုၚ်သ္ဍိုက်ရ၊ မၞိဟ်ဂမၠိုၚ် ညာတ်ဒးခမဳဗြဴသုန္ဒရဳနန္ဒာ ပ္ဍဲဇြပ်ကဵုပိုဉ်တုဲ ဍုက်ဍေက်တဴနရာဂဒှ်တုဲ ကဵုဒါန်ဘောဇိုန်မခိုဟ်ပြဲလောန် ကုခမဳဗြဴသုန္ဒရဳနန္ဒာ မဍုက်ဍေက်တဴ နရာဂအိုတ်ရ။ ခမဳဗြဴသုန္ဒရဳနန္ဒာ ၜိုတ်နွံပၟိက် သ္ဂောံသ္ပပြဘိုဂ်တုဲ ခမဳဗြဴသအာၚ်ဂမၠိုၚ်တုန် ဟွံကလိဂွံအတိုၚ်ပၟိက်စိုတ်အိုတ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴသုန္ဒရဳနန္ဒာ သီုမဍုက်ဍေက်တဴနရာဂ နတဲဇကု ဒုၚ်ဂိုၚ်ကေတ် စၞစဘောဇိုန် နူတဲပူဂိုလ်တြုံမၞိဟ် မဍုက်ဍေက်နရာဂတုဲ သ္ၚာဲတဴရော? စတဴရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴသုန္ဒရဳနန္ဒာ သီုမဍုက်ဍေက်တဴနရာဂ နဲတဲဇကု ဒုၚ်ဂိုၚ်ကေတ် စၞစဘောဇိုန် နူတဲပူဂိုလ်တြုံမၞိဟ် မဍုက်ဍေက်နရာဂတုဲ သ္ၚာဲတဴရ စတဴရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် ခမဳဗြဴသုန္ဒရဳနန္ဒာ သီုမဍုက်ဍေက်တဴနရာဂ နတဲဇကု ဒုၚ်ဂိုၚ်ကေတ် စၞစဘောဇိုန် နူတဲပူဂိုလ်တြုံမၞိဟ် မဍုက်ဍေက်နရာဂတုဲ သ္ၚာဲတဴရော? စတဴရော? ယွံခမဳတအ် (ကမၠောန်ပွမသုန္ဒရဳနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။

700) “ယြဴခမဳဗြဴမွဲ ဍုက်ဍေက်တဴနရာဂဒှ်တုဲ နတဲဇကု ဒုၚ်ဂိုၚ်ကေတ် စၞစဘောဇိုန် နူတဲပူဂိုလ်တြုံမၞိဟ် မဍုက်ဍေက်နရာဂတုဲ သ္ၚာဲလေဝ်သ္ၚာဲတဴမ္ဂး၊ စလေဝ်စတဴမ္ဂး၊ ခမဳဗြဴဝွံလေဝ် ဒးအာပတ် ပ္ဍဲချိုန်ခဏမကလိလောန်ကၠေံဗွဲကိုပ်ကၠာဒှ်တုဲ အာစိုပ်အာပတ်သံဃာဒိသေသ် မလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။