၂.၄။ စတုတ္ထသံဃာဒိသေသ်သိက္ခာပိုဒ်
694) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴစဏ္ဍကာဠဳဂှ် လေပ်ကဵုဒှ်ကယျာန်ဓဝါတ်သေက်ဇဵု လေပ်ဟီုဂလာန်စှေ်စးသၟးဟွံက အရေဝ်ဂၠိုၚ်တုဲ အဓိကိုရ်သၚ်လေဝ် လေပ်သ္ပတဴရ။ သ္ပကမ် ကုခမဳဗြဴဂှ်မ္ဂး ခမဳဗြဴထုလ္လနန္ဒာ လေပ်ဆေဝ်ဒဝ်ကၠေံရ။ ပ္ဍဲအခိၚ်ဂှ် အဃောခမဳဗြဴထုလ္လနန္ဒာ အာဒၟံၚ်ကွာန်သၟတ် နကဵုကိစ္စကေၚ်ကာမမိက်ကဵုမွဲမွဲဂှ် ဘိက္ခုနဳသၚ် “ခမဳဗြဴထုလ္လနန္ဒာ စ္ဍးအာတုဲရ” ရဴဝွံ ဟိုတ်နူဟွံမၠာ်သ္ၚေဝ်အာပတ် ဗက်ပတိတ်ထောံ ခမဳဗြဴစဏ္ဍကာဠဳရ။ ခမဳဗြဴထုလ္လနန္ဒာ ကဵုစိုပ်ဒတုဲကၠေံ ကိစ္စကေၚ်ကာထေက်ကဵုသ္ပပ္ဍဲကွာန်သၟတ်ဂှ်တုဲ မွဲလှေ်ပၠန် ကလေၚ်ကၠုၚ်ဍုၚ်သာရဝှ်ရ။ ခမဳဗြဴစဏ္ဍကာလဳဂှ် ဒၞဲါလေဝ်ဟွံလးကဵုကုခမဳဗြဴထုလ္လနန္ဒာ မကလေၚ်စဴကၠုၚ်ရ၊ ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ်လေဝ် ဟွံဖျေံစွံပတန်လဝ်ဇရေၚ်ရ၊ ဒစးဒုၚ်တၠုၚ်တရဴတုဲ ဗဗေၚ်သ္ၚာလေဝ် ဟွံဟောဝ်ဒုၚ်ဂိုၚ်ကေတ်ရ၊ နကဵုဍာ်သုၚ်လေဝ် ဟွံသၟာန်ရ၊ ‘ဍာ်သုၚ်လေဝ် ဟွံဗဂိန်ကဵုရ’၊ ခမဳဗြဴထုလ္လနန္ဒာဂှ်_ “ယွံနာဲဗြဴ သီုအဲကလေၚ်စဴကၠုၚ်ဒၟံၚ်ဖိုဟ် မုဟိုတ် ဟွံလးကဵုဒၞဲါဂှ်ရော? ဟွံစွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ်ဂှ်ရော? ဒစးဒုၚ်တၠုၚ်တရဴတုဲ ဟွံဟောဝ်ဒုၚ်ဂိုၚ်ကေတ် ဗဗေၚ်သ္ၚာဂှ်ရော? နကဵုဍာ်သုၚ်လေဝ် ဟွံသၟာန်ရော? ‘ဍာ်သုၚ်လေဝ် ဟွံဗဂိန်ကဵုရော?’ ရဴဝွံ သၟာန်ခမဳဗြဴစဏ္ဍကာဠဳရ။ ယွံနာဲဗြဴ ကုအဲဍိက်ဂှ် ဟိုတ်သွက်ဂွံဒှ်မသက္ကုစ္ၜုဲစ္ၜော် ကတဵုဒှ်ဒၟံၚ်ရ ရဴဝွံ (ဂရၚ်ပတီရ)။ ယွံနာဲဗြဴ တၠအဲ မုဟိုတ် သ္ဂောံဒှ်မသက္ကုစ္ၜုဲစ္ၜော်ဂှ်ရော? ရဴဝွံ (အခိၚ်မသၟာန်တိုန်ဂှ်) ယွံနာဲဗြဴ ခမဳဗြဴဂမၠိုၚ်ဝွံ “ခမဳဗြဴစဏ္ဍကာဠဳဝွံ သွက်ဂွံစ္ၜုဲစ္ၜော်ဟွံမွဲရ၊ ညးပြာကဋ်ဟွံသေၚ်ရ၊ သွက်ခမဳဗြဴစဏ္ဍကာဠဳဝွံ ခမဳဗြဴမဆေဝ်ဒဝ် မမိက်ကဵုမွဲမွဲ ဟွံမွဲရ” ရဴဝွံ (စွံစိုတ်တုဲ) ဟိုတ်နူဟွံမၠာ်သ္ၚေဝ်အာပတ် ဗက်ပတိတ်ထောံအဲဍိက်ရ ရဴဝွံ (ဂရၚ်ပတီရ)။ ခမဳဗြဴထုလ္လနန္ဒာဂှ် “ခမဳဗြဴဂမၠိုၚ်ဝွံ ဓီုၜီုအိုတ်ရ၊ ဟွံစဳကၠးဆိုက်ဗ္ဒက်အိုတ်ရ၊ ဟွံတီကေတ်ကမ်ကီု ဒုဟ်ကမ်ကီု ပွမကမ်လီုလာ်ကီု ပွမကမ်ဍိုက်ပေၚ်ကီုအိုတ်ရ၊ ပိုဲညးဂမၠိုၚ်တုန် တီကေတ်ကမ်ကီု ပွမကမ်လီုလာ်ကီု ပွမကမ်ဍိုက်ပေၚ်ကီုအိုတ်ရ၊ ပိုဲညးဂမၠိုၚ် ကမ်မဟဂွံသ္ပဏီလေဝ် ကဵုသ္ပအိုတ်ရ၊ ကမ်မသ္ပလဝ်တုဲလေဝ် ကဵုပလီုထောံအိုတ်ရ” ရဴဝွံ ဟီုသ္ဂးတုဲ ဗွဲမပြဟ်သန်ဟေၚ် ကဵုဘိက္ခုနဳသၚ် ကောံဓရီုတုဲမ္ဂး ကော်ပၠုပ်ခမဳဗြဴစဏ္ဍကာဠဳရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ ဟွံဂရၚ်ပတီလဴဗ္စ ကုသၚ်မသ္ပကမ်ကဵုခမဳဗြဴ မိန်သၚ်မညဳသာသၟဟ်သၟန် မဗက်ပတိတ်လဝ် နသဘဴဓရ်မဍာံစၟတ် နဝိနယ် န ‘ဉတ်ဥမ္မဝါစ်’ မဒှ်ဒၠောံဗတောန်ကျာ်တုဲ ဟွံသ္ပစဵုကဵုမတီပၟိက်ဂိုဏ်တုဲ ကော်သပၠုပ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ ဟွံဂရၚ်ပတီလဴဗ္စ ကုသၚ်မသ္ပကမ်ကဵုခမဳဗြဴ မိန်သၚ်မညဳသာသၟဟ်သၟန် မဗက်ပတိတ်လဝ် နသဘဴဓရ်မဍာံစၟတ် နဝိနယ် န ‘ဉတ်ကမ္မဝါစ်’ မဒှ်ဒၠောံဗတောန်ကျာ်တုဲ ဟွံသ္ပစဵုကဵုမတီပၟိက်ဂိုဏ်တုဲ ကော်သပၠုပ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် ခမဳဗြဴထုလ္လနန္ဒာ ဟွံဂရၚ်ပတီလဴဗ္စ ကုသၚ်မသ္ပကမ်ကဵုခမဳဗြဴ မိၚ်သၚ်မညဳသာသၟဟ်သၟန် မဗက်ပတိတ်လဝ် နသဘဴဓရ်မဍာံစမတ် နဝိနယ် န ‘ဉတ်ကမ္မဝါစ်’ မဒှ်ဒၠောံဗတောန်ကျာ်တုဲ ဟွံသ္ပစဵုကဵုမတီပၟိက်ဂိုဏ်တုဲ ကော်သပၠုပ်ရော? ယွံခမဳတအ် (ကမၠောန်ပွထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ် စၞောန်ထ္ၜးသိက္ခာပိုဒ်ဝွံအိုတ်ညိ။
695) “ယြဴခမဳဗြဴမွဲ ဟွံဂရၚ်ပတီလဴဗ္စ ကုသၚ်မသ္ပကမ်ကဵုခမဳဗြဴ မိၚ်သၚ်မညဳသာသၟဟ်သၟန် မဗက်ပတိတ်လဝ် နသဘဴဓရ်မဍာံစၟတ် နဝိနယ် န ‘ဉတ်ကမ္မဝါစ်’ မဒှ်ဒၠောံဗတောန်ကျာ်တုဲ ဟွံသ္ပစဵုကဵု မတီပၟိက်ဂိုဏ်တုဲ ကော်သပၠုပ်မ္ဂး၊ ခမဳဗြဴဝွံလေဝ် ဒးအာပတ်ပ္ဍဲချိုန်ခဏ မကလိလောန်ကၠေံဗွဲကိုပ်ကၠာဒှ်တုဲ အာစိုပ်အာပတ်သံဃာဒိသေသ် မလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
