၂.၃.၁။ ပွံက်တတိယသံဃာဒိသေသ်သိက္ခာပိုဒ်

692) ယြဴ မ္ဂးဂှ် ယြဴဍေံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျ နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳဗြဴရ။ ညးမွဲဓဝ် ကွာန်မွဲသအာၚ်လေဝ် အာ မ္ဂးဂှ် ကုခမဳဗြဴမကဵုကလိလောန်အာ အာစဵုဗိုၚ်ဒပ်ကွာန်မၞုံကဵုအစဵုဗိုၚ်ဒပ် လဂါမ်ဇိုၚ်ပဌမဂှ် ဒးအာပတ်ထုလ္လစ္စယ်ရ၊ ကုခမဳဗြဴမကဵုကလိလောန်အာလဂါမ်ဇိုၚ်ဒုတိယဂှ် ဒးအာပတ်သံဃာဒိသေသ်ရ။ ကုခမဳဗြဴမကဵုကလိလောန်အာ ဥပစာကွာန် မဟွံမွဲကဵုအစဵုဗိုၚ်ဒပ် လဂါမ်ဇိုၚ်ပဌမဂှ် ဒးအာပတ်ထုလ္လစ္စယ်ရ၊ ကုခမဳဗြဴမကဵုကလိလောန်အာလဂါမ်ဇိုၚ်ဒုတိယဂှ် ဒးအာပတ်သံဃာဒိသေသ်ရ။ ပ္ဍဲအရာ ညးမွဲဓဝ် သြၚ်ကြုၚ်မွဲလပါ်လေဝ် ကၠောံအာ မ္ဂးဂှ် ကြုၚ် မ္ဂးဂှ် ဂြောပ်ဗ္ဒန်လဝ်ဗၞဳအဝဏ်ပိပြကာတုဲ သပိုၚ်မဗိုၚ်လဝ် ဒဒက်တဴခမဳဗြဴမတတ်ကၠောံ နူမွဲမွဲဒၞဲါဂှ်ဍေက်ဍာ်ရ၊ (ပ္ဍဲအရာဝွံ ကြုၚ်မ္ဂးရ)။ ကုခမဳဗြဴမကၠောံ နဇိုၚ်ပဌမမွဲလပါ်ဂှ် ဒးအာပတ်ထုလ္လစ္စယ်ရ၊ ကုခမဳဗြဴမကၠောံ နဇိုၚ်ဒုတိယမွဲလပါ်ဂှ် ဒးအာပတ်သံဃာဒိသေသ်ရ။ ညးမွဲဓဝ် ပ္ဍဲအခိၚ်ဗ္တံ စာ်စ္ဍးကေုာံသကအ်ပွံၚ်တုဲလေဝ် ပဒတဴ မ္ဂးဂှ် ကုခမဳဗြဴ မဒှ်ဃောသၠးကၠေံ ဌာန်ၜါဟတ်မွဲဍ ခမဳဗြဴသကအ်ပွံၚ် မွဲဒမြိပ်ကေုာံအရှိုဏ်တိုန်ဂှ် ဒးအာပတ်ထုလ္လစ္စယ်ရ၊ သၠးကၠေံတုဲမ္ဂး ဒးအာပတ်သံဃာဒိသေသ်ရ။ ညးမွဲဓဝ် နူသကအ်ပွံၚ်လေဝ် သှေ်ၜက်ဒၟံၚ် မ္ဂးဂှ် ပ္ဍဲဂြိုပ်မဟွံမွဲကဵုကွာန် ကုခမဳဗြဴ မဒှ်ဃောသၠးကၠေံ ဌာန်မထေက်ကဵုညာတ်မာန်မိၚ်မာန် ခမဳဗြဴသကအ်ပွံၚ် မွဲဒမြိပ်ကေုာံအရှိုဏ်တိုန်ဂှ် ဒးအာပတ်ထုလ္လစ္စယ်ရ၊ သၠးကၠေံတုဲမ္ဂး ဒးအာပတ်သံဃာဒိသေသ်ရ။ ခမဳဗြဴဝွံလေဝ် မ္ဂးဂှ် ထံက်ရံၚ်ကဵုခမဳဗြဴ မ္ဒးအာပတ်ကိုပ်ကၠာဂမၠိုၚ်တုဲ ဂပ်ဝ်သ္ဂးရ။ ဒးအာပတ် ပ္ဍဲချိုန်ခဏမကလိလောန်ကၠေံဗွဲကိုပ်ကၠာဒှ်တုဲ မ္ဂးဂှ် မွဲဒမြိပ်ကေုာံပွမကလိလောန် ဒ္ဂေတ်သ္ပဝတ္ထုဂှ် ဒအာပတ်ရ၊ ဟိုတ်နူပွမဒၠောံဗတောန် နဉတ်ကမ္မဝါစ်ဂှ် ဒးအာပတ်ဟွံသေၚ်ရ။ မလေပ်ကဵုဗက်ပတိတ် မ္ဂးဂှ် မလေပ်ကဵုဗက်ပတိတ် နူဂကောံသၚ်ရ။ သံဃာဒိသေသ် မ္ဂးဂှ် ။ ပ ။ ဟိုတ်ဂှ်လေဝ် ကော်ခဴဂး ရဴဝွံမ္၈း “သံဃာဒိသေသ်” ရ။

693) ခမဳဗြဴသကအ်ပွံၚ်ဂှ် စ္ဍးအာထောံကီု ရာမ်တိတ်အာခရှ်ကီု ချိုတ်အာကီု ပြံၚ်အာဘာတဳကီု ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ် ဟွံဒးအာပတ်ရ၊ ကုခမဳဗြဴမကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ တတိယသံဃာဒိသေသ် သိက္ခာပိုဒ် တုဲရ။