၂.၃။ တတိယသံဃာဒိသေသ်သိက္ခာပိုဒ်
687) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴကွးပဒတဴဇရေၚ် ဘဒ္ဒါကာပိလာနဳဂှ် ဒှ်သေက်ဇဵုကယျာန်ဓဝါတ် ကေုာံခမဳဗြဴသအာၚ်ဂမၠိုၚ်တုဲ က္ညအာကွာန် ဌာန်ကလောမသနွံရ။ ဘဒ္ဒါကာပိလာနဳ ဟွံညာတ်ခမဳဗြဴဂှ်တုဲ “ခမဳဗြဴမဟိမုဝွံ ဣလဵုရော? ဟွံညာတ်ကေတ်ရသွံ” ရဴဝွံ သၟာန်ခမဳဗြဴဂမၠိုၚ်ရ၊ ယွံနာဲဗြဴ ဒှ်သေက်ဇဵုကယျာန်ဓဝါတ် ကေုာံခမဳဗြဴသအာၚ်ဂမၠိုၚ်တုဲ ပ္ဍဲကြဴ ဟဂွံညာတ်ကေတ်ရ ရဴဝွံ သ္ဂးတဴမ္ဂး ယွံမိနာဲတအ် ပ္ဍဲကွာန်မဟိမုဝွံ ကလောမသခမဳဗြဴဂှ်နွံရ၊ က္ညအာကွာန်ဂှ်တုဲ ဩဝ်စမ်ၜတ်ဂၠိုက်ဂၠာဲအိုတ်ညိ ရဴဝွံ သ္ဂးရ။ ခမဳဗြဴသအာၚ်ဂမၠိုၚ် က္ညအာကွာန်ဂှ်တုဲ အခိၚ်မဂွံညာတ်ကေတ် ခမဳဗြဴဂှ် “ယွံနာဲဗြဴ တၠအဲ မုဟိုတ် ကၠုၚ်တဴညးမွဲဓဝ်ရော? ပသာ်ရော? ဟွံဒးဒုၚ်ပလီုပလာ်ဟာ” ရဴဝွံ သၟာန်အိုတ်ရ။ ယွံနာဲဗြဴတအ် ဒးဒုၚ်ပလီုပလာ်ရ ရဴဝွံ (သ္ဂးရ)။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ညးမွဲဓဝ် အာတဴကွာန်သအာၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ခမဳဗြဴဂှ် ညးမွဲဓဝ်အာတဴကွာန်သအာၚ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရာ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် ခမဳဗြဴဂှ် ညးမွဲဓဝ် အာတဴကွာန်သအာၚ်ရော? ယွံခမဳတအ် (ကမၠောန်ပွခမဳဗြဴဂှ်သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳဗြဴမွဲ ညးမွဲဓဝ် အာတဴကွာန်သအာၚ်မ္ဂး၊ ခမဳဗြဴဝွံလေဝ် ဒးအာပတ် ပ္ဍဲချိုန်ခဏမကလိလောန်ကၠေံဗွဲကိုပ်ကၠာဒှ်တုဲ အာစိုပ်အာပတ်သံဃာဒိသေသ် မလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဗြဴဂမၠိုၚ်ရ။
688) ပ္ဍဲအဃောအခိၚ်ဂှ် ခမဳဗြဴဂမၠိုၚ်ၜါဇကု နူဍုၚ်သာကေတ သွိုန်ဗပိုန်တဴ တရဴအဓာန်မဂၠိၚ်သ္ၚောဲ ဍုၚ်သာရဝှ်အိုတ်ရ၊ ပ္ဍဲအကြာဂၠံၚ်တရဴဂှ် သ္ဒးတတ်ကၠောံၜဳတုဲ ပြာပ်အာဇရေၚ်သၟာဂၠုၚ်ဂဒိုအ်ဂမၠိုၚ်တုဲမ္ဂး “ယွံဒကာတအ် အာတ်ပါန်အခေါၚ်ရ၊ ပလံၚ်ကဵုပိုဲညးဂမၠိုၚ် ဂဒိုအ်အိုတ်ညိရဴ” ရဴဝွံ သ္ဂးအိုတ်ရ။ “ယွံနာဲဗြဴတအ် မွဲလတုန်ဓဝ် တၞဟ်နပလံၚ်ဏာ သီုညးၜါတၠဂှ် ဟွံသၟဟ်အစောံရ” ရဴဝွံ သ္ဂးတုဲ သၟာဂၠုၚ်ဂဒိုအ်မွဲတၠဂှ် ပလံၚ်စၠောံဏာဂဒိုအ် ခမဳဗြဴမွဲတၠတုဲ သၟာဂၠုၚ်ဂဒိုအ် မပလံၚ်စၠောံဏာတုဲဂှ် ပလီုပလာ်ကၠေံ ခမဳဗြဴမကၠောံအာတုဲဂှ်တုဲ သၟာဂၠုၚ်ဂဒိုအ် မဟဂွံပလံၚ်စၠောံဏာဏီဂှ် ပလီုပလာ်ထောံ ခမဳဗြဴမဟဂွံကၠောံဏီရ။ ခမဳဗြဴဂမၠိုၚ်ၜါတၠဂှ် ပ္ဍဲကာလကြဴ အာမွဲစွံတုဲ သၟာန်တဴ (ရၚ်သကအ်) အိုတ်ရ။ “ယွံနာဲဗြဴ ဟွံဒးဒုၚ်ပလီုပလာ်ဟာ” ရဴဝွံ သၟာန်ရ။ ယွံနာဲဗြဴ ဒးဒုၚ်ပလီုပလာ်ရ ရဴဝွံ (သ္ဂးရ)။ “ယွံနာဲဗြဴ တၠအဲလေဝ် ဟွံပလီုပလာ်ဟာ” ရဴဝွံ သၟာန်ရ။ ယွံနာဲဗြဴ ပလီုပလာ်ရ ရဴဝွံ (သ္ဂးရ)။ ပ္ဍဲအခိၚ်ဂှ် ခမဳဗြဴဂမၠိုၚ် အာစိုပ်ဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ညးမွဲဓဝ် ကၠောဴအာ သြၚ်ကြုၚ်မွဲလပါ်ဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ ။ ပ ။ “ယွံခမဳတအ် ခမဳဗြဴဂှ် ညးမွဲဓဝ် ကၠောံအာ သြၚ်ကြုၚ်မွဲလပါ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် ခမဳဗြဴဂှ် ညးမွဲဓဝ် ကၠောံအာ သြၚ်ကြုၚ်မွဲလပါ်ရော? ယွံခမဳတအ် (ကမၠောန်ပွမခမဳဗြဴဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳဗြဴမွဲ ညးမွဲဓဝ် ကွာန်မွဲသအာၚ်လေဝ် အာမ္ဂး၊ ညးမွဲဓဝ် သြၚ်ကြုၚ်မွဲလပါ်တေံ ကၠောံအာမ္ဂး၊ ခမဳဗြဴဝွံလေဝ် ဒးအာပတ် ပ္ဍဲချိုန်ခဏ မကလိလောန်ကၠေံဗွဲကိုပ်ကၠာဒှ်တုဲ အာစိုပ်အာပတ်သံဃာဒိသေသ် မလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဗြဴဂမၠိုၚ်ရ။
689) ပ္ဍဲအဃောအခိၚ်ဂှ် ခမဳဗြဴဂမၠိုၚ်ဗွဲမဂၠိုၚ် အာတဴဍုၚ်သာရဝှ် ပ္ဍဲဇနပိုဒ်ကောသလရးဂမၠိုၚ်မ္ဂး ပ္ဍဲအခိၚ်သဝ်တ္ၚဲ စိုပ်အာကွာန်မွဲကွာန်အိုတ်ရ၊ ပၞောဝ်ခမဳဗြဴဂမၠိုၚ်ဂှ် ခမဳဗြဴမွဲဇကုဂှ် ရုပ်သာ်ကျေဝ်ဂေါဝ်ရ၊ ထေက်ကဵုဗဵုသ္ၚေဝ်ရ၊ ထေက်ကဵုလျုၚ်ဇြုၚ်သ္ဍိုက်ရ၊ တြုံမွဲတၠဂှ် မွဲဒမြိပ်ကေုာံပွမညာတ် ဒးခမဳဗြဴဂှ် စိုတ်ဆာန်မဒက်ဂြေန် ဒှ်ကၠုၚ်တုဲ လးကဵုဒၞဲါသတိက် သွက်ခမဳဗြဴဂမၠိုၚ်မ္ဂး သွက်ခမဳဗြဴ ရုပ်သာ်ကျေဝ်ဂေါဝ်ဂှ်တုန် လးလဝ်ကဵုဒၞဲါသတိက် ပ္ဍဲဒၞဲါမွဲရ။ ပ္ဍဲအခိၚ်ဂှ် ခမဳဗြဴဂှ် “တြုံဝွံ ရာဂရာန်သကိုတ် ထပက်ထပူဒၟံၚ်ရ၊ ယဝ်ကၠုၚ် ပ္ဍဲအခိၚ်ဗ္တံမ္ဂး၊ ဗရုရမျာၚ်မပၠန်ဂတး ကြက်ကတဵုဒှ်ကုတဲရ” ရဴဝွံ သမ္တီကေတ်တုဲ သီုဟွံဂရၚ်ပတီလဴဗ္စ ခမဳဗြဴသအာၚ်ဂမၠိုၚ် ပြာပ်အာသ္ၚိဒကာမွဲတၠတုဲ တိက်တဴရ။ ပ္ဍဲကြဴနူဂှ် တြုံဂှ် ကၠုၚ်အခိၚ်ဗ္တံတုဲ ဂၠာဲသ္ၚေဝ်တဴ ခမဳဗြဴရုပ်သာ်ကျေဝ်ဂေါဝ်ဂှ်မ္ဂး ထ္ဍိၚ်ဒးခမဳဗြဴသအာၚ်ဂမၠိုၚ်ရ။ ခမဳဗြဴသအာၚ်ဂမၠိုၚ် ဟိုတ်မဟွံညာတ်ကေတ် ခမဳဗြဴရုပ်သာ်ကျေဝ်ဂေါဝ်ဂှ်ရ “ခမဳဗြဴဂှ် အဆတ်ဨကန် တိတ်အာ မွဲဟာန်ကေုာံတြုံဂှ်ရ” ရဴဝွံ ဟီုသ္ဂးအိုတ်ရ။ ခမဳဗြဴဂှ် အခိၚ်မကလိလောန်အာဗ္တံဂှ် ပြာပ်ကၠုၚ်ဇရေၚ် ခမဳဗြဴသကအ်ပွံၚ်ဂမၠိုၚ်တုဲ ခမဳဗြဴသကအ်ပွံၚ်ဂမၠိုၚ်ဂှ် “ယွံနာဲဗြဴ မုဟိုတ် တိတ်အာ မွဲဟာန်ကေုာံတြုံရော?” ရဴဝွံ ဟီုသ္ဂးကဵု ခမဳဗြဴ ရုပ်သာ်ကျေဝ်ဂေါဝ်ဂှ်အိုတ်ရ။ “ယွံနာဲဗြဴတအ် အဲဍိက်တုန် တိတ်အာ မွဲဟာန်ကေုာံတြုံ ဟွံသေၚ်ရ” ရဴဝွံ (ဟီုသ္ဂးတုဲ) ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ပ္ဍဲအခိၚ်ဗ္တံ ညးမွဲဓဝ် စာ်စ္ဍးကေုာံသကအ်ပွံၚ်တုဲ ပဒတဴရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ၊ “ယွံခမဳတအ် ခမဳဗြဴဂှ် ပ္ဍဲအခိၚ်ဗ္တံ ညးမွဲဓဝ် စာ်စ္ဍးကေုာံသကအ်ပွံၚ်တုဲ ပဒတဴရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် ခမဳဗြဴဂှ် ပ္ဍဲအခိၚ်ဗ္တံ ညးမွဲဓဝ် စာ်စ္ဍးကေုာံသကအ်ပွံၚ်တုဲ ပဒတဴရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳဗြဴမွဲ ကွာန်မွဲသအာၚ်လေဝ် အာမ္ဂး၊ ညးမွဲဓဝ် သြၚ်ကြုၚ်မွဲလပါ်လေဝ် ကၠောံအာမ္ဂး၊ ညးမွဲဓဝ် ပ္ဍဲအခိၚ်ဗ္တံ စာ်စ္ဍးကေုာံသကအ်ပွံၚ်တုဲလေဝ် ပဒတဴမ္ဂး၊ ခမဳဗြဴဝွံလေဝ် ဒးအာပတ် ပ္ဍဲချိုန်ခဏပကလိလောန်ကၠေံဗွဲကိုပ်ကၠာဒှ်တုဲ အာစိုပ်အာပတ်သံဃာဒိသေသ် မလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဗြဴဂမၠိုၚ်ရ။
690) ပ္ဍဲအဃောအခိၚ်ဂှ် ခမဳဗြဴဂမၠိုၚ်ဗွဲမဂၠိုၚ် သွိုန်ဗပိုန်တဴ တရဴအဓာန်မဂၠိၚ်သ္ၚောဲ ဍုၚ်သာရဝှ် ပ္ဍဲဇနပိုဒ်ကောသလရးဂမၠိုၚ်အိုတ်ရ၊ ပၞောဝ်ခမဳဗြဴဂမၠိုၚ်ဂှ် ခမဳဗြဴမွဲဇကုဂှ် ဟိုတ်မၞုံကဵုတရဴဇၞော် မပ္ဍဵုပ္ဍိုက်ဂှ်ရ ညးမွဲဓဝ် သှေ်ၜက်ဒၟံၚ်တုဲ ဗက်ကၠုၚ်နူလက်ကရဴရ။ မၞိဟ်ဂမၠိုၚ် ညာတ်ဒးခမဳဗြဴဂှ်တုဲ ပလီုပလာ်ထောံအိုတ်ရ။ ပ္ဍဲအခိၚ်ဂှ် ခမဳဗြဴဂှ် ပြာပ်ကၠုၚ်ဇရေၚ် ခမဳဗြဴသကအ်ပွံၚ်ဂမၠိုၚ်တုဲ ခမဳဗြဴသကအ်ပွံၚ်ဂမၠိုၚ်ဂှ် “ယွံနာဲဗြဴ တၠအဲ မုဟိုတ် ညးမွဲဓဝ် သှေ်ၜက်ဒၟံၚ် လက်ကရဴရော? တၠအဲ ဟွံဒးဒုၚ်ပလီုပလာ်ဟာ” ရဴဝွံ သၟာန်ခမဳဗြဴဂှ်အိုတ်ရ။ ယွံနာဲဗြဴတအ် ဒးဒုၚ်ပလီုပလာ်ရ ရဴဝွံ (သ္ဂးရ)။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် ခမဳဗြဴဂှ် ညးမွဲဓဝ် သှေ်ၜက်ဒၟံၚ်သကအ်ပွံၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ “ယွံခမဳတအ် ခမဳဗြဴဂှ် ညးမွဲဓဝ် သှေ်ၜက်ဒၟံၚ် နူသကအ်ပွံၚ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် ခမဳဗြဴဂှ် ညးမွဲဓဝ် သှေ်ၜက်ဒၟံၚ်နူသကအ်ပွံၚ်ရော? ယွံခမဳတအ် (ကမၠောန်ပွခမဳဗြဴဂှ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ်စၞောန်ထ္ၜး သိက္ခာပိုဒ်ဝွံအိုတ်ညိ။
691) “ယြဴခမဳဗြဴမွဲ ညးမွဲဓဝ် ကွာန်မွဲသအာၚ်လေဝ် အာမ္ဂး၊ ညးမွဲဓဝ် သြၚ်ကြုၚ်မွဲလပါ်လေဝ် ကၠောံအာမ္ဂး၊ ညးမွဲဓဝ် ပ္ဍဲအခိၚ်ဗ္တံ စာ်စ္ဍးကေုာံသကအ်ပွံၚ်တုဲလေဝ် ပဒတဴမ္ဂး၊ ညးမွဲစဓဝ်နူသကအ်ပွံၚ်လေဝ် သှေ်ၜက်ဒၟံၚ်မ္ဂး၊ ခမဳဗြဴဝွံလေဝ် ဒးအာပတ် ပ္ဍဲချိုန်ခဏမကလိလောန်ကၠေံ ဗွဲကိုပ်ကၠာဒှ်တုဲ အာစိုပ်အာပတ်သံဃာဒိသေသ် မလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜး အိုတ်ညိ ရဴဝွံ သ္ဂးရ)။
