၂.၂.၁။ ပွံက်ဒုတိယသံဃဒိဃာဒိသေသ်သိက္ခာပိုဒ်
684) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳဗြဴရ။ တီရ မ္ဂးဂှ် အလဵုဇကုလေဝ် တီရ၊ ညးသအာၚ်ဂမၠိုၚ်လေဝ် ဟီုလဴကုခမဳဗြဴဂှ်အိုတ်ရ၊ ခမဳဗြဴဂှ်လေဝ် ဟီုလဴရ။ ကမၠတ်ဗြဴ မ္ဂးဂှ် နဗွဝ်စိုတ်မမိက်ကၠတ် ဗြဴဂိုၚ်ကၠတ်ကေတ်မသုန်ၜဲ ဂြပ်မထေက်တန်ၚုဟ်မး လောန်လတူမသုန်ၜဲဂှ် ကမၠတ်ဗြဴမ္ဂးရ။ ညးမထေက်ကဵုဂစိုတ် မ္ဂးဂှ် လတူမၞိဟ်သအာၚ်ဂမၠိုၚ် “ဗြဴဂှ် ထေက်ကဵုဂစိုတ်ရ” ရဴဝွံ ပြာကဋ်ရ။ ဟွံဂရၚ်ပတီလဴဗ္စတုဲ မ္ဂးဂှ် ဟွံဟီုလဴထ္ၜးတုဲ။ သၟိၚ် မ္ဂးဂှ် ယြဴပ္ဍဲဌာန်မွဲ သၟိၚ်ဂှ် ဒၠောံဗတောန်အုပ်ဓုပ်ရ၊ ပ္ဍဲဌာန်ဂှ် သ္ဒးဂရၚ်ပတီလဴဗ္စသၟိၚ်ဂှ်ရ။ သၚ် မ္ဂးဂှ် သ္ဂးတဴဘိက္ခုနဳသၚ်ရ၊ သ္ဒးဂရၚ်ပတီလဴဗ္စ ဘိက္ခုနဳသၚ်ဂှ်ရ။ ဂိုဏ် မ္ဂးဂှ် ယြဴပ္ဍဲဌာန်မွဲ ဂိုဏ် ဒၠောံဗတောန်အုပ်ဓုပ်ရ၊ ပ္ဍဲဌာန်ဂှ် သ္ဒးဂရၚ်ပတီလဴဗ္စဂိုဏ်ဂှ်ရ။ ဂကောံ မ္ဂးဂှ် ယြဴပ္ဍဲဌာန်မွဲ အစန်အဒက် ဒၠောံဗတောန်အုပ်ဓုပ်ရ၊ ပ္ဍဲဌာန်ဂှ် သ္ဒးဂရၚ်ပတီလဴဗ္စ အစန်အဒက်ဂှ်ရ။ ဝေၚ်ကၠေံ ဗြဴမကေၚ်သ္ပခမဳတုဲ မ္ဂးဂှ် ပါဲကၠေံ ဗြဴမကေၚ်သ္ပခမဳတုဲ။ ဗြဴမကေၚ်သ္ပခမဳတုဲ မ္ဂးဂှ် ဗွဲအစောံ ဗြဴမကေၚ်သ္ပခမဳ ပ္ဍဲဗော်တဳဂမၠိုၚ် ဗြဴမကေၚ်သ္ပခမဳ ပ္ဍဲဗော်ခမဳဗြဴသအာၚ်ဂမၠိုၚ် မၞုံၜါဂကူအိုတ်ရ။ ဝေၚ်ကၠေံ ဗြဴမကေၚ်သ္ပခမဳတုဲ ကြက်သ္ပကဵုခမဳရ ရဴဝွံ ဂၠာဲသ္ၚေဝ် ဂိုဏ်ကီု အ္စာဗြဴကီု ဗဗေၚ်ကီု သ္ၚာကီုမ္ဂး၊ သိမ်လေဝ် သၟိတ်တဴမ္ဂး၊ ဒးအာပတ်ဒုက္ကဋ်ရ၊ စွံပတန်ဉတ်မ္ဂး၊ ဒးအာပတ် ဒုက္ကဋ်ရ။ ပ္ဍဲကမ္မဝါစ်ဂမၠိုၚ်ၜါဝါ ဒးအာပတ်ထုလ္လစ္စယ်ရ၊ ပ္ဍဲလအိတ်ကမ္မဝါစ် ကုအ္စာဥပဇ္ၛာယ်ဗြဴဂှ် ဒးအာပတ်သံဃာဒိသေသ်ရ၊ ကုဂိုဏ်ကီု ကုအ္စာကမ္မဝါစ်ဗြဴကီု ဒးအာပတ်ဒုက္ကဋ်ရ။ ခမဳဗြဴလေဝ် မ္ဂးဂှ် ထံက်ရံၚ်ကဵုခမဳဗြဴ မဒးအာပတ်သံဃာဒိသေသ်မဒှ်ကိုပ်ကၠာတုဲ ဂပ်ဝ်သ္ဂးရ။ ဒးအာပတ် ပ္ဍဲချိုန်ခဏမကလိလောန်ကၠေံဗွဲကိုပ်ကၠာဒှ်တုဲ မ္ဂးဂှ် မွဲဒမြိပ်ကေုာံပွမကလိလောန် ဒ္ဂေတ်သ္ပဝတ္ထုဂှ် ဒးအာပတ်ရ၊ ဟိုတ်နူပွမဒၠောံဗတောန် နဉတ်ကမ္မဝါစ်ဂှ် ဒးအာပတ်ဟွံသေၚ်ရ။ မလေပ်ကဵုဗက်ပတိတ် မ္ဂးဂှ် မလေပ်ကဵုဗက်ပတိတ် နူဂကောံသၚ်ရ။ သံဃာဒိသေသ် မ္ဂးဂှ် ။ ပ ။ ဟိုတ်ဂှ်လေဝ် ကော်ခဴဂး ရဴဝွံမ္ဂး “သံဃာဒိသေသ်” ရ။
685) ပ္ဍဲကမၠတ်ဗြဴ မၞုံကဵုစၟတ်သမ္တီ ကမၠတ်ဗြဴတုဲ ဝေၚ်ကၠေံဗြဴမကေၚ်သ္ပခမဳတုဲ သ္ပကဵုပယျၚ်မ္ဂး၊ ဒးအာပတ်သံဃာဒိသေသ်ရ။ ပ္ဍဲကမၠတ်ဗြဴ မၞုံကဵုသၠေဟ်ပၟာတုဲ ဝေၚ်ကၠေံဗြဴမကေၚ်သ္ပခမဳတုဲ သ္ပကဵုပယျၚ်မ္ဂး၊ ဒးအာပတ်ဒုက္ကဋ်ရ။ ပ္ဍဲကမၠတ်ဗြဴ မၞုံကဵုစၟတ်သမ္တီ ကမၠတ်ဗြဴဟွံသေၚ်တုဲ ဝေၚ်ကၠေံဗြဴမကေၚ်သ္ပခမဳတုဲ သ္ပကဵုပယျၚ်မ္ဂး၊ ဟွံဒးအာပတ်ရ။ ပ္ဍဲဟွံသေၚ်ကဵုကမၠတ်ဗြဴ မၞုံကဵုစၟတ်သမ္တီ ဟွံသေၚ်ကဵုကမၠတ်ဗြဴမ္ဂး၊ ဒးအာပတ်ဒုက္ကဋ်ရ။ ပ္ဍဲဟွံသေၚ်ကဵုကမၠတ်ဗြဴ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲဟွံသေၚ်ကဵုကမၠတ်ဗြဴ မၞုံကဵုစၟတ်သမ္တီ ကမၠတ်ဗြဴဟွံသေၚ်တုဲ သ္ပကဵုပယျၚ်မ္ဂး၊ ဟွံဒးအာပတ်ရ။
686) ဟွံတီတုဲ သ္ပကဵုပယျၚ်မ္ဂး၊ ဂရၚ်ပတီလဴဗ္စတုဲ သ္ပကဵုပယျၚ်မ္ဂး၊ သ္ပကဵုပယျၚ် ဗြဴမကေၚ်သ္ပခမဳတုဲမ္ဂး၊ ဟွံဒးအာပတ်ရ၊ ကုခမဳဗြဴမကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ ဒုတိယသံဃာဒိသေသ် သိက္ခာပိုဒ် တုဲရ။
