၂.၂။ ဒုတိယသံဃဒိဃာဒိသေသ်သိက္ခာပိုဒ်
682) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ပ္ဍဲဍုၚ်ဝေသာလဳ သမ္ဘာသၟိၚ်လိစ္ဆဝဳမွဲတၠဂှ် ကလိလောန် တြုံတၠသ္ၚိတုဲဒ္ဂေတ်ရ ‘ဒေပ်တြုံဍောတ်တုဲ ဒ္ဂေတ်သ္ပမိပ်ဇြိပ်ဒၟံၚ်’ ရ။ ပ္ဍဲအခိၚ်ဂှ် သၟိၚ်လိစ္ဆဝဳဂှ် “ဩဝ်ဝေၚ်ပဲါကၠေံ နူပွဂှ်ညိ၊ ကြက်ဒးသ္ပဟွံမွဲကဵုဖဵု ကုတၠအဲရ” ရဴဝွံ သ္ဂးကဵုဗြဴဂှ်ရ။ ရဴဝွံ ၜိုန်ဟီုသ္ဂးလေဝ် ဟွံကလၚ်စရ။ ပ္ဍဲအဃောအခိၚ်ဂှ် ပ္ဍဲဍုၚ်ဝေသာလဳ ဂကောံသၟိၚ်လိစ္ဆဝဳဂမၠိုၚ် ကောံဓရီုတဴ နကဵုကိစ္စကေၚ်ကာထေက်ကဵုသ္ပမမိက်ကဵုမွဲမွဲရ။ ပ္ဍဲအခိၚ်ဂှ် သၟိၚ်လိစ္ဆဝဳဂှ် “ယွံနာဲတအ် ဩဝ်ကဵုအခေါၚ်ကုအဲ ဗြဴမွဲညိ” ရဴဝွံ သ္ဂးကဵုသၟိၚ်လိစ္ဆဝဳဂမၠိုၚ်ရ။ ဗြဴဂှ် မၞုံယၟုသာ်လဵုရော? ရဴဝွံ (သၟာန်အိုတ်ရ)။ သမ္ဘာအဲဂှ် ကလိလောန် (အဲ) တုဲ ဒ္ဂေတ်ဒၟံၚ်ရ၊ ကြက်ဂစိုတ်ကၠေံ ဗြဴဂှ်ရ ရဴဝွံ (သ္ဂးရ)။ (သမ္ဘာတၠအဲဂှ် တၠအဲဟေၚ်) ဩဝ်တီကေတ်ညိ ရဴဝွံ (သ္ဂးအိုတ်ရ)။ ဗြဴဂှ် “တြုံတၠသ္ၚိအဲ ကြက်ဂစိုတ်အဲရဂး” ရဴဝွံ ဟိုတ်မဂွံမိၚ်ကေတ်ဂှ်ရ ဂိုၚ်ကေတ်ဂြပ်ကသပ်မၞုံကဵုၚုဟ်မးတုဲ အာဍုၚ်သာရဝှ်တုဲမ္ဂး ပြာပ်အာဇရေၚ်တဳဂမၠိုၚ်တုဲ အာတ်တဴဒဒှ်ခမဳရ၊ တဳဂမၠိုၚ် ဟွံမွဲပၟိက်ကဵု တၞဟ်နပွမသ္ပကဵုခမဳအိုတ်ရ။ ပြာပ်အာဇရေၚ်ခမဳဗြဴဂမၠိုၚ်တုဲ အာတ်တဴဒဒှ်ခမဳရ၊ ခမဳဗြဴဂမၠိုၚ်လေဝ် ဟွံမွဲပၟိက်ကဵု တၞဟ်နပွမသ္ပကဵုခမဳအိုတ်ရ။ ပြာပ်အာဇရေၚ်ခမဳဗြဴထုလ္လနန္ဒာတုဲ ထ္ၜးကဵုဂြပ်ကသပ်တုဲမ္ဂး အာတ်တဴဒဒှ်ခမဳရ၊ ခမဳဗြဴထုလ္လနန္ဒာတုန် ဂိုၚ်ကေတ်ဂြပ်ကသပ်တုဲ သ္ပကဵုခမဳရ။ ပ္ဍဲအထိုက်အတန်ဂှ် သၟိၚ်လိစ္ဆဝဳ ဂၠာဲသ္ၚေဝ်တဴဗြဴဂှ်မ္ဂး အာဍုၚ်သာရဝှ်တုဲ အခိၚ်မဂွံညာတ်ကေတ် သ္ပဒၟံၚ်ခမဳ ပ္ဍဲဇရေၚ်ခမဳဗြဴဂမၠိုၚ်ဂှ် ပြာပ်အာဇရေၚ် သၟိၚ်ဇၞော်ပသေနဒဳကောသလတုဲ— “ယွံသၟိၚ်မပြဲ သမ္ဘာအဲဍိက်ဂှ် ဂိုၚ်ကေတ်ဂြပ်ကသပ်မၞုံကဵုၚုဟ်မးတုဲ စိုပ်ဒၟံၚ်ဍုၚ်သာရဝှ်ရ၊ သၟိၚ်မပြဲ ဩဝ်ကဵုအခေါၚ် ဗြဴဂှ်ညိ” ရဴဝွံ ဂရၚ်ပတီတိုန်ရ။ ယွံအမာံ ဒှ်သာ်ဂှ်မ္ဂး စမ်ၜတ်ဂၠိုက်ဂၠာဲတုဲ ဩဝ်ဟီုလဴထ္ၜးညိ ရဴဝွံ (သ္ဂးရ)။ ယွံသၟိၚ်မပြဲ ဂွံညာတ်ကေတ် သ္ပဒၟံၚ်ခမဳ ပ္ဍဲဇရေၚ်ခမဳဗြဴဂမၠိုၚ်ရ ရဴဝွံ (ဂရၚ်ပတီတိုန်ရ)။ ယွံအမာံ ယဝ်သ္ပဒၟံၚ်ခမဳ ပ္ဍဲဇရေၚ်ခမဳဗြဴဂမၠိုၚ်မ္ဂး အခေါၚ်ကၠောန်သ္ပဗြဴဂှ် မမိက်ကဵုမွဲမွဲဟွံမွဲရ၊ တဳလမၞုံပိုဉ်ကျာ်တြဲ ဂပ်ဝ်တွံဓရ်ဗွဲမဒးရးရ၊ သွက်ဂွံသ္ပကၠေံလအိတ်ဒဒိုခ်ဝဋ် ကဵုဂွံဒ္ဂေတ်တဴ ဒ္ဂေတ်မပြဲဗွဲမဒးရးညိ ရဴဝွံ (သ္ဂးရ)။ ပ္ဍဲအခိၚ်ဂှ် သၟိၚ်လိစ္ဆဝဳဂှ် “မုဟိုတ် ခမဳဗြဴဂမၠိုၚ် သ္ပကဵုခမဳ ကမၠတ်ဗြဴအိုတ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဗြဴဂမၠိုၚ် သ္ဂောံမိၚ်ကေတ် ဂလာန်သၟိၚ်လိစ္ဆဝဳဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳဗြဴပၟိက်အောန်ဂမၠိုၚ်ဂှ် “မုဟိုတ် နာဲဗြဴထုလ္လနန္ဒာ သ္ပကဵုခမဳ ကမၠတ်ဗြဴရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ ။ ပ ။ “ယွံခမဳတအ် ခမဳဗြဴထုလ္လနန္ဒာ သ္ပကဵုခမဳကမၠတ်ဗြဴရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် ခမဳဗြဴ ထုလ္လနန္ဒာသ္ပကဵုခမဳ ကမၠတ်ဗြဴရော? ယွံခမဳတအ် (ကမၠောန်ပွခမဳဗြဴထုလ္လနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ်စၞောန်ထ္ၜး သိက္ခာပိုဒ်ဝွံအိုတ်ညိ။
683) “ယြဴခမဳဗြဴမွဲ သီုကဵုမတီတဴ ကမၠတ်ဗြဴ မပြာကဋ်ရဴဝွံမ္ဂး ညးမထေက်ကဵုဂစိုတ်ဂှ် ဟွံဂရၚ်ပတီလဴစ သၟိၚ်ကီု သၚ်ကီု ဂိုဏ်ကီု ဂကောံမၞိဟ် (ညးသ္ပကဵုသီုမွဲစွံ) ကီု အစန်အဒက် (ဂကောံညးဗၞိက်) ကီုတုဲ ဝေၚ်ကၠေံ ဗြဴမကေၚ်သ္ပခမဳတုဲ သ္ပကဵုခမဳမ္ဂး၊ ခမဳဗြဴဝွံလေဝ် ဒးအာပတ် ပ္ဍဲချိုန်ခဏမကလိလောန်ကၠေံဗွဲကိုပ်ကၠာဒှ်တုဲ အာစိုပ်အာပတ်သံဃာဒိသေသ် မလေပ်ကဵုဗက်ပတိတ် (နူဂကောံသၚ်) ရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
