၂.၁၀.၁။ ပွံက်ဒသမသံဃာဒိသေသိက္ခာပိုဒ်
729) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳဗြဴရ။ ရဴဝွံ ဟီုသ္ဂး မ္ဂးဂှ် “ယွံနာဲဗြဴတအ် မၞးတအ်ဂမၠိုၚ် နှဴရဴကေုာံခရှ်ဂမၠိုၚ်ဟေၚ်တုဲ ဩဝ်ပဒတဴအိုတ်ညိ၊ မၞးတအ်ညးဂမၠိုၚ် ဩဝ်လ္ပပဒတဴတၞဟ်တၞဟ်အိုတ်ညိ၊ ခမဳဗြဴသအာၚ်ဂမၠိုၚ် သီုမၞုံကဵုဒ္ဂေတ်မြဴသာ်ဝွံ ဗရုဒယှ်တှ်မြဴသာ်ဝွံ ပွမဂယိုၚ်လမျီုမြဴသာ်ဝွံ ပြိုက်ဖ္ဍောၚ်ကုဘိက္ခုနဳသၚ်တုဲမ္ဂး မလေပ်ဂြောပ်ဗ္ဒန်ဒုဟ် ကေုာံရၚ်သကအ်လေဝ် နွံပ္ဍဲသၚ်အိုတ်ရ၊ သၚ် ဟွံဟီုသ္ဂး ကဵုခမဳဗြဴဂမၠိုၚ်ဂှ် မမိက်ကဵုညိညရ” ရဴဝွံ ဟီုသ္ဂးမ္ဂး။ မၞးတအ်ညးဂမၠိုၚ်ဟေၚ် ဗွဲမဗ္ဒေက်ဖျဝ်ဍဵုဖျေံ မ္ဂးဂှ် ဗွဲမထေၚ်သောဲ ‘ဗွဲမကဵုတီကေတ်ကဆံၚ်သဝ်’။ ဗွဲမဍဵုဍိုက်ရာန်သကိုတ် မ္ဂးဂှ် ဗွဲဒဒှ်မပ္ဍဵုပ္ဍိုက်။ ဗွဲမဟွံအေၚ်ဒုၚ် မ္ဂးဂှ် ဗွဲမပၞတ်မာန်ကဝ်စှေ်။ ဗွဲဒဒှ်ဂလာန်ဇကု ဇၞော်ကဵုဇြဟတ် မ္ဂးဂှ် ဗဗွဲဒဒှ်ဟီုဍိုက်ကဵုဇြဟတ်။ ဗွဲဒဒှ်ဍိုန်ကဵုဇြဟတ် မ္ဂးဂှ် ဗွဲဒဒှ်ဟွံမွဲကဵုဗော်သွး။ “ဒေံဗြဴ, ၝဲတအ်ဂမၠိုၚ်ဟေၚ် နှဴရဴကေုာံခရှ်ဂမၠိုၚ်တုဲ သီုမၞုံကဵုဒ္ဂေတ်မယုတ်မာ ဗရုဒယှ်တှ်မယုတ်မာ ပွမဂယိုၚ်လမျီုမယုတ်မာဂှ် ပြိုက်ဖ္ဍောၚ်ကုဘိက္ခုနဳသၚ်တုဲမ္ဂး လေပ်ဂြောပ်ဗ္ဒန်ဒုဟ် ကေုာံရၚ်သကအ်အိုတ်ရ၊ ယွံနာဲဗြဴတအ် ဩဝ်ပဒတဴ ဗွဲလ္ၚုအာအိုတ်ညိ၊ ပွမပဒတဴ ဗွဲမလ္ၚုအာ ဒေံဗြဴ, ၝဲတအ်ညးဂမၠိုၚ်ဟေၚ် သၚ်ထိုၚ်သးရ” ရဴဝွံ သၚ်ဟီုသ္ဂးရတုဲ ဟီုသ္ဂးရ။ ခမဳဗြဴဂှ် မ္ဂးဂှ် ခမဳဗြဴမၞုံအလေံဟီုသ္ဂးရဴဝွံ။ ခမဳဗြဴဂမၠိုၚ် မ္ဂးဂှ် ခမဳဗြဴသအာၚ်ဂမၠိုၚ်။ ခမဳဗြဴမဆဵုညာတ်မမိၚ်ဂမၠိုၚ် “ယွံနာဲဗြဴတအ် မၞးတအ်ဂမၠိုၚ် နှဴရဴကေုာံခရှ်ဂမၠိုၚ်ဟေၚ်တုဲ ဩဝ်ပဒတဴအိုတ်ညိ၊ မၞးတအ်ညးဂမၠိုၚ် ဩဝ်လ္ပပဒတဴ တၞဟ်တၞဟ်အိုတ်ညိ၊ ခမဳဗြဴသအာၚ်ဂမၠိုၚ်လေဝ် နွံပ္ဍဲသၚ်အိုတ်ရ ။ ပ ။ ယွံနာဲဗြဴတအ် ဩဝ်ပဒတဴ ဗွဲလ္ၚုအာအိုတ်ညိ၊ ပွမပဒတဴဗွဲမလ္ၚုအာ ဒေဴဗြဴ, ၝဲတအ်ညးဂမၠိုၚ်ဟေၚ် သၚ်ထိုၚ်သးရ’ ရဴဝွံ သၚ်ဟီုသ္ဂးရတုဲ လ္ပဟီုသ္ဂးညိ ရဴဝွံ သ္ဒးဟီုရ။ မရနုက်ကဵုၜါဝါလေဝ် သ္ဒးဟီုဒၠောံဗတောန်ရ၊ မရနုက်ကဵုပိဝါလေဝ် သ္ဒးဟီုဒၠောံဗတောန်ရ။ ယဝ်သၠးကၠေံကွေတ်ဂှ်မ္ဂး၊ ပွမသၠးကၠေံဂှ် ခိုဟ်သန်ရ၊ ယဝ်ဟွံသၠးကၠေဴမ္ဂး၊ ဒးအာပတ်ဒုက္ကဋ်ရ။ မိၚ်တုဲ ဟွံဟီုသ္ဂးမ္ဂး၊ ဒးအာပတ်ဒုက္ကဋ်ရ။ ခမဳဗြဴဂှ် တံၚ်ဓဇက်ဏာ လဒေါဝ်သၚ်တုဲလေဝ် “ယွံနာဲဗြဴတအ် မၞးတအ်ဂမၠိုၚ် နှဴရဴကေုာံခရှ်ဂမၠိုၚ်ဟေၚ်တုဲ ဩဝ်ပဒတဴအိုတ်ညိ၊ မၞးတအ်ညးဂမၠိုၚ် ဩဝ်လ္ပပဒတဴ တၞဟ်တၞဟ်အိုတ်ညိ၊ ခမဳဗြဴသအာၚ်ဂမၠိုၚ်လေဝ် နွံပ္ဍဲသၚ်အိုတ်ရ ။ ပ ။ ယွံနာဲဗြဴတအ် ဩဝ်ပဒတဴ ဗွဲလ္ၚုအာအိုတ်ညိ၊ ပွမပဒတဴ ဗွဲမလ္ၚုအာ ဒေံဗြဴ, ၝဲတအ်ညးဂမၠိုၚ်ဟေၚ် သၚ်ထိုၚ်သးရ’ ရဴဝွံ သၚ်ဟီုသ္ဂးရတုဲ လ္ပဟီုသ္ဂးညိ ရဴဝွံ သ္ဒးဟီုရ။ မရနုက်ကဵုၜါဝါလေဝ် သ္ဒးဟီုဒၠောံဗတောန်ရ၊ မရနုက်ကဵုပိဝါလေဝ် သ္ဒးဟီုဒၠောံဗတောန်ရ။ ယဝ်သၠးကၠေံကွေတ်ဂှ်မ္ဂး၊ ပွမသၠးကၠေံဂှ် ခိုဟ်သန်ရ၊ ယဝ်ဟွံသၠးကၠေံမ္ဂး၊ ဒးအာပတ်ဒုက္ကဋ်ရ။ ဒးဒၠောံဗတောန် ခမဳဗြဴဂှ် နဉတ်ကမ္မဝါစ် ဗွဲမဒးရးရ၊ ယွံခမဳတအ် ရဴဝွံဟေၚ် သ္ဒးဒၠောံဗတောန်ဗွဲမဒးရးရ၊ ခမဳဗြဴ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
730) “ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴမၞုံယၟုဝွံ ဟီုသ္ဂးကဵု ခမဳဗြဴဂမၠိုၚ် သၚ်မဂပ်ဝ်ဒၠောံဗတောန်လဝ် နဉတ်ကမ္မဝါစ် ‘ယွံနာဲဗြဴတအ် မၞးတအ်ဂမၠိုၚ် နှဴရဴကေုာံခရှ်ဂမၠိုၚ်ဟေၚ်တုဲ ဩဝ်ပဒတဴအိုတ်ညိ၊ မၞးတအ်ညးဂမၠိုၚ် ဩဝ်လ္ပပဒတဴတၞဟ်တၞဟ်အိုတ်ညိ။ ခမဳဗြဴသအာၚ်ဂမၠိုၚ် သီုမၞုံကဵုဒ္ဂေတ်ဗြဴသာ်ဝွံ ဗရုဒယှ်တှ်မြဴသာ်ဝွံ ပွမဂယိုၚ်လမျီုမြဴသာ်ဝွံ ပြိုက်ဖ္ဍောၚ်ကုဘိက္ခုနဳသၚ်တုဲမ္ဂး မလေပ်ဂြောပ်ဗ္ဒန်ဒုဟ် ကေုာံရၚ်သကအ်လေဝ် နွံပ္ဍဲသၚ်အိုတ်ရ၊ သၚ် ဟွံဟီုသ္ဂးကဵုခမဳဗြဴဂမၠိုၚ်ဂှ် မမိက်ကဵုညိညတုဲ မၞးတအ်ညးဂမၠိုၚ်ဟေၚ် ဗွဲမဗ္ဒေက်ဖျဝ်ဍဵုဖျေံကီု ဗွဲမဍဵုဍိုက်ရာန်သကိုတ်ကို ဗွဲမဟွံအေၚ်ဒုၚ်ကီု ဗွဲဒဒှ်ဂလာန်ဇကုဇၞော်ကဵုဇြဟတ်ကီု ဗွဲဒဒှ် (နာဲဗြဴတအ်) ဍိုန်ကဵုဇြဟတ်ကီု ဒေံဗြဴ, ၝဲတအ်ဂမၠိုၚ်ဟေၚ် နှဴရဴကေုာံခရှ်ဂမၠိုၚ်တုဲ သီုမၞုံကဵုဒ္ဂေတ်မယုတ်မာ ဗရုဒယှ်တှ်မယုတ်မာ ပွမဂယိုၚ်လမျီုမယုတ်မာဂှ် ပြိုက်ဖ္ဍောၚ် ကုဘိက္ခုနဳသၚ်တုဲမ္ဂး လေပ်ဂြောပ်ဗ္ဒန်ဒုဟ် ကေုာံရၚ်သကအ်အိုတ်ရ၊ ယွံနာဲဗြဴတအ် ဩဝ်ပဒတဴဗွဲလ္ၚုအာအိုတ်ညိ၊ ပွမပဒတဴ ဗွဲမလ္ၚုအာ ဒေံဗြဴ, ၝဲတအညးဂမၠိုၚ်ဟေၚ် သၚ်ထိုၚ်သးရ’ ရဴဝွံ ဟီုသ္ဂးရဴဝွံရဂှ် ဟီုသ္ဂးရ၊ ခမဳဗြဴဂှ် ဟွံသၠးကၠေံဝတ္ထုဂှ်ရ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး၊ တၞဟ်နကဵုသၠးကၠေံဝတ္ထုဂှ် သၚ် သ္ဒးဒၠောံဗတောန် ခမဳဗြဴမၞုံယၟုဝွံ နဉတ်ကမ္မဝါစ်ဗွဲမဒးရးရ၊ ဣဝွံတုန် ပွမကဵုတီရောၚ်။ ယွံနာဲဗြဴတအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဗြဴမၞုံယၟုဝွံ ဟီုသ္ဂးကဵုခမဳဗြဴဂမၠိုၚ် သၚ်မဂပ်ဝ်ဒၠောံဗတောန်လဝ် နဉတ်ကမ္မဝါစ် ‘ယွံနာဲဗြဴတအ် မၞးတအ်ဂမၠိုၚ် နှဴရဴကေုာံခရှ်ဂမၠိုၚ်ဟေၚ်တုဲ ဩဝ်ပဒတဴအိုတ်ညိ၊ မၞးတအ်ညးဂမၠိုၚ် ဩဝ်လ္ပပဒတဴတၞဟ်တၞဟ်အိုတ်ညိ၊ ခမဳဗြဴသအာၚ်ဂမၠိုၚ် သီုမၞုံကဵုဒ္ဂေတ်မြဴသာ်ဝွံ ဗရုဒယှ်တှ်မြဴသာ်ဝွံ ပွမဂယိုၚ်လမျီုမြဴသာ်ဝွံ ပြိုက်ဖ္ဍောၚ်ကုဘိက္ခုနဳသၚ်တုဲမ္ဂး မလေပ်ဂြောပ်ဗ္ဒန်ဒုဟ် ကေုာံရၚ်သကအ်လေဝ် နွံပ္ဍဲသၚ်အိုတ်ရ၊ သၚ် ဟွံဟီုသ္ဂးကဵုခမဳဗြဴဂမၠိုၚ်ဂှ် မမိက်ကဵုညိညတုဲ မၞးတအ်ညးဂမၠိုၚ်ဟေၚ် ဗွဲမဗ္ဒေက်ဖျဝ်ဍဵုဖျေံကီု ဗွဲမဍဵုဍိုက်ရာန်သကိုတ်ကီု ဗွဲမဟွံအေၚ်ဒုၚ်ကီု ဗွဲဒဒှ်ဂလာန်ဇကုဇၞော်ကဵုဇြဟတ်ကီု ဗွဲဒဒှ် (နာဲဗြဴတအ်) ဍိုန်ကဵုဇြဟတ်ကီု ဒေံဗြဴ, ၝဲတအ်ဂမၠိုၚ်ဟေၚ် နှဴရဴကေုာံခရှ်ဂမၠိုၚ်တုဲ သိုမၞုံကဵုဒ္ဂေတ်မယုတ်မာ ဗရုဒယှ်တှ်မယုတ်မာ ပွမဂယိုၚ်လမျီုမယုတ်မာဂှ် ပြိုက်ဖ္ဍောၚ်ကုဘိက္ခုနဳသၚ်တုဲမ္၈း လေပ်ဂြောပ်ဗ္ဒန်ဒုဟ် ကေုာံရၚ်သကအ်အိုတ်ရ၊ ယွံနာဲဗြဴတအ် ဩဝ်ပဒတဴဗွဲလ္ၚုအာအိုတ်ညိ၊ ပွမပဒတဴ ဗွဲမလ္ၚုအာ ဒေံဗြဴ, ၝဲတအ်ညးဂမၠိုၚ်ဟေၚ် သၚ်ထိုၚ်သးရ’ ရဴဝွံ ဟီုသ္ဂးရဴဝွံရဂှ် ဟီုသ္ဂးရ၊ ခမဳဗြဴဂှ် ဟွံသၠးကၠေံဝတ္ထုဂှ်ရ၊ တၞဟ်နကဵုသၠးကၠေံဝတ္ထုဂှ် သၚ်ဒၠောံဗတောန် ခမဳဗြဴမၞုံယၟုဝွံ (နဉတ်ကမ္မဝါစ်) ဗွဲမဒးရးရ၊ ယြဴကုနာဲဗြဴမွဲ တၞဟ်နကဵုသၠးကၠေံဝတ္ထုဂှ် သ္ဍိုက်မၠိုက် ပွမဒၠောံဗတောန် ခမဳဗြဴမၞုံယၟုဝွံ ဗွဲဒးရးရ၊ နာဲဗြဴဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုနာဲဗြဴမွဲ ဟွံမွဲကဵုပွမသ္ဍိုက်မၠိုက်ရ၊ နာဲဗြဴဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ ။ ပ ။ တၞဟ်နကဵုသၠးကၠေံဝတ္ထုဂှ် သၚ်ဂပ်ဝ်ဒၠောံဗတောန် ခမဳဗြဴမၞုံယၟုဝွံ ဗွဲမဒးရးတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုၚ်ဂှ်ရ” ရဴဝွံ (သ္ဒးကဵုတီရ)။ ပ္ဍဲလအိတ်ဉတ် ဒးအာပတ်ဒုက္ကဋ်ရ၊ ပ္ဍဲလအိတ်ကမ္မဝါစ်ဂမၠိုၚ်ၜါဝါ ဒးအာပတ်ထုလ္လစ္စယ်ရ၊ ပ္ဍဲလအိတ်ကမ္မဝါစ် ဒးအာပတ်သံဃာဒိသေသ်ရ။ ကုခမဳဗြဴ မဒးအာပတ်သံဃာဒိသေသ်ဂှ် အာပတ်ဒုက္ကဋ်မ္ဒးပ္ဍဲလအိတ်ဉတ် ထုလ္လစ္စယ်မ္ဒးပ္ဍဲလအိတ်ကမ္မဝါစ်ဂမၠိုၚ်ၜါဝါဂမၠိုၚ်ဂှ် လလမ်အိုတ်ရ။ ခမဳဗြဴဝွံလေဝ် မ္ဂးဂှ် ထံက်ရံၚ်ကဵုခမဳဗြဴ မ္ဒးအာပတ်မဒှ်ကိုပ်ကၠာဂမၠိုၚ်တုဲ ဂပ်ဝ်သ္ဂးရ။ စဵုကဵုပေၚ်ပိဝါ မ္ဂးဂှ် ဒးအာပတ် ဟိုတ်နူပွမဒၠောံဗတောန် နဉတ်ကမ္မဝါစ်စဵုကဵုပေၚ်ပိဝါရ၊ မွဲဒမြိပ်ကေုာံပွမကလိလောန်ဝတ္ထုဂှ် ဒးဟွံသေၚ်ရ။ မလေပ်ကဵုဗက်ပတိတ် မ္ဂးဂှ် မလေပ်ကဵုဗက်ပတိတ် နူဂကောံသၚ်ရ။ သံဃာဒိသေသ် မ္ဂးဂှ် သွက်အာပတ်ဂှ် သၚ်ဟေၚ် သ္ဒးကဵုမာနတ်ရ၊ သ္ဒးတံၚ်ဓဇက်တမ်ရ၊ သ္ဒးပၠုပ်အဗ္ဘာန်ရ၊ ခမဳဗြဴၜါဇကုပိဇကုကီု၊ မွဲဇကုကီု၊ ကဵုမာနတ်ဟွံဂွံရ၊ တံၚ်ဓဇက်တမ်ဟွံဂွံရ၊ ပၠုပ်အဗ္ဘာန်ဟွံဂွံရ၊ ဟိုတ်ဂှ်ရ ကော်ခဴဂး ရဴဝွံမ္ဂး “သံဃာဒိသေသ်” ရ၊ (ယၟုမတွံဂး သံဃာဒိသေသ်ဂှ်) ယၟုဂကောံအာပတ်ဂှ်ဟေၚ်ရ၊ ဟိုတ်ဂှ်လေဝ် ကော်ခဴဂး ရဴဝွံမ္ဂး “သံဃာဒိသေသ်” ရ။
731) ပ္ဍဲဓမ္မကမ် မၞုံကဵုစၟတ်သမ္တီ ဓမ္မကမ်ဒှ်တုဲ ဟွံသၠးကၠေံကွေတ်မ္ဂး၊ ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံကဵုသၠေဟ်ပၟာဒှ်တုဲ ဟွံသၠးကၠေံကွေတ်မ္ဂး၊ ဒးအာပတ်သံဃာဒိသေသ်ရ။ ပ္ဍဲဓမ္မကမ် မၞုံကဵုစၟတ်သမ္တီ အဓမ္မကမ်ဒှ်တုဲ ဟွံသၠးကၠေံမ္ဂး၊ ဟွံသၠးကၠေံကွေတ်မ္ဂး၊ ဒးအာပတ် သံဃာဒိသေသ်ရ။ ပ္ဍဲအမ္မကမ် မၞုံကဵုစၟတ်သမ္တီ ဓမ္မကမ်မ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုစၟတ်သမ္တီ အဓမ္မကမ်မ္ဂး၊ ဒးအာပတ်ဒုက္ကဋ်ရ။
732) ကုခမဳဗြဴ မဟွံဒးဒၠောံဗတောန်ဗွဲမဒးရး (နဉတ်ကမ္မဝါစ်) ခမဳဗြဴသၠးကၠေံကွေတ် ခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ ဒသမသံဃာဒိသေသ် သိက္ခာပိုဒ်တုဲရ။
*နိဂီုသတ္တရသကဏ် ယွံနာဲဗြဴတအ် ဂပ်ဝ်စၞောန်ထ္ၜးကဵု အာပတ်သံဃာဒိသေသ်ဂမၠိုၚ်စှ်ထပှ် ဗွဲအာပတ်ဒး ပ္ဍဲခဏမကလိလောန်ဗွဲကိုပ်ကၠာဒ္စိတ်, အာပတ်ဒးပ္ဍဲလအိတ်ဒၠောံဗတောန် နဉတ်ကမ္မဝါစ်ဒ္စာံ ဗွဲသရုပ်တုဲအိုတ်ရ၊ ခမဳဗြဴဂှ် ပၞောဝ်ကဵုစှ်ထပှ်ဂမၠိုၚ်ဂှ် အာစိုပ်မွဲမွဲတုဲလေဝ် သ္ဒးဒ္ဂေတ်တဴ ‘ပက္ခမာနတ်’ ပွမဒ္ဂေတ် လုကဴစှ်သုန်တ္ၚဲဂမၠိုၚ် ပ္ဍဲသၚ်ၜါလပါ်မတွံဂးသၚ်ခမဳတြုံ သၚ်ခမဳဗြဴရ။ ခမဗြဴမဒ္ဂေတ်ပက္ခမာနတ်တုဲဂှ် သ္ဒးကော်ပၠုပ်အဗ္ဘာန် ပ္ဍဲသိမ် မၞုံကဵုလၟိဟ်ဘိက္ခုနဳသၚ်ၜါစှော်ဇကုရ၊ ဘိက္ခုနဳသၚ်ၜါစှော် ယုတ်နမွဲဇကုလေဝ် ကော်ပၠုပ်အဗ္ဘာန် ခမဳဗြဴဂှ်မ္ဂး၊ ခမဳဗြဴဂှ်လေဝ် ဟဂပ်ဝ်ကော်ပၠုပ်အဗ္ဘာန်မ္ဂးရ၊ ခမဳဗြဴ (မကော်ပၠုပ်အဗ္ဘာန်) ဂမၠိုၚ်ဂှ်လေဝ် ဂပ်ဝ်ဂရိုဟ်အိုတ်ရ၊ ဣဝွံတုန် ဒ္ဂေတ်ထေက်ကဵုဒ္ဂေတ်ဗက် (ပ္ဍဲအရာဒးအာပတ်သံဃာဒိသေသ်) ရောၚ်။ ပ္ဍဲအာပတ်သံဃာဒိသေသ်ဂမၠိုၚ်စှ်ထပှ်ဂှ် သၟာန်နာဲဗြဴဂမၠိုၚ်ရ၊ သအးဇ္ၚးနူအာပတ်အိုတ်ရဟာ၊ မရနုက်ကဵုၜါဝါလေဝ် သၟာန်ရ၊ သအးဇ္ၚးနူအာပတ်အိုတ်ရဟာ၊ မရနုက်ကဵုပိဝါလေဝ် သၟာန်ရ၊ သအးဇ္ၚးနူအာပတ်အိုတ်ရဟာ၊ နာဲဗြဴတအ်ညးဂမၠိုၚ် ပ္ဍဲအာပတ်သံဃာဒိသေသ်ဂမၠိုၚ်ဝွံ သအးဇ္ၚးနူအာပတ်အိုတ်ရ၊ ဟိုတ်ဂှ်ရ ဒၟံၚ်သ္ၚိတ်သ္ၚိတ်ဇြဇြအိုတ်ရ၊ ရဴဝွံ နမဒၟံၚ်သ္ၚိတ်သ္ၚိတ်ဇြဇြဂှ် ဂွံသမ္တီကေတ် ဒဒှ်မသအးဇ္ၚးနူအာပတ်ဝွံရ။ ခဏ်သတ္တရသကဏ် ‘စှ်ထပှ်’ တုဲရ။ ဘိက္ခုနဳဝိဘၚ် ခဏ်သံဃာဒိသေသ်တုဲရ။
