၁.၂.၁.၂။ ပွံက်ဒုတိယပါရာဇိကသိက္ခာပိုဒ်
666) ယြဴ မ္ဂးဂှ် ယြဴဍေံမၞုံသဘဴမဖှ်သာလဵု ။ ပ ။ ခမဳဗြဴ မ္ဂးဂှ် ။ ပ ။ ပ္ဍဲအရာဝွံ ဗြဴမဒှ်ပယျၚ် နကဵုဉတ္တိစတုတ္ထကမ်ဝွံ ဂပ်ဝ်နွံပၟိက် ရဴဝွံမ္ဂး ခမဳဗြဴရ။ တီရ မ္ဂးဂှ် အလဵုဇကုလေဝ် တီရ၊ ညးသအာၚ်ဂမၠိုၚ်လေဝ် ဟီုလဴကုခမဳဗြဴဂှ်အိုတ်ရ၊ ခမဳဗြဴဂှ်လေဝ် ဟီုလဴရ။ မအာစိုပ်အာပတ်ပါရာဇ် မ္ဂးဂှ် ပၞောဝ်ကဵုအာပတ်ပါရာဇ်ဂမၠိုၚ်ဒ္စာံ အာစိုပ်အာပတ်ပါရာဇ်မွဲမွဲရ။ အလဵုဇကုလေဝ် ဟွံစောဒနာ မ္ဂးဂှ် ဇကုလေဝ် ဟွံစောဒနာမ္ဂး။ ကုဂကောံဂိုဏ်လေဝ် ဟွံဂရၚ်ပတီလဴဗ္စရ မ္ဂးဂှ် ကုခမဳဗြဴသအာၚ်လေဝ် ဟွံဂရၚ်ပတီလဴဗ္စမ္ဂး။ ပ္ဍဲအရာ ယြဴပ္ဍဲအခိၚ်မွဲ ခမဳဗြဴမစှေ်ပါရာဇိကတုဲဂှ် တန်တဴဒၟံၚ် (ပ္ဍဲအာယောၚ်အလာ ခမဳဗြဴ) လေဝ် ဒှ်ရ ဂှ် တန်တဴဒၟံၚ် မ္ဂးဂှ် သ္ဂးတဴ တန်တဴဒၟံၚ်ပ္ဍဲအယောၚ်အလာဇကုရ။ စုတိချိုတ် မ္ဂးဂှ် သ္ဂးတဴ စုတိကလိလောန်စဴအာရ။ ဂပ်ဝ်ပြာမ်ကၠေံ (ပလီုပလာ်ကၠေံ) မ္ဂးဂှ် အလဵုဇကုလေဝ် ရာမ်တိတ်ခရှ်ရ၊ ညးသအာၚ်ဂမၠိုၚ်လေဝ် ဂပ်ဝ်ပလီုပလာ် ‘ဂပ်ဝ်ကဵုရာမ်တိတ်ခရှ်’ ရ။ ပြံၚ်အာဘာတဳ မ္ဂးဂှ် သ္ဂးတဴ ပွမပြံၚ်အာပဒတဴမံၚ်စံၚ် ဘာတဳရ။ ခမဳဗြဴမတီဂှ် မ္ဂးဂှ် “ယွံနာဲဗြဴတအ် ဒေံဗြဴဂှ် မၞုံသဘဴရဴဝွံရ၊ မၞုံသဘဴရဴဝွံရ” ရဴဝွံ ပ္ဍဲကိုပ်ကၠာဟေၚ် အဲဍိက်တီဒၟံၚ်ရ ရဴဝွံ လက်ကရဴမှ ဟီုသ္ဂးမ္ဂး။ ၜိုန်ဂှ်လေဝ် အလဵုဇကုလေဝ် ဟွံစောဒနာ မ္ဂးဂှ် ဇကုလေဝ် ဟွံစောဒနာမ္ဂး။ ကုဂကောံဂိုဏ်လေဝ် ဟွံဂရၚ်ပတီလဴဗ္စရ မ္ဂးဂှ် ကုခမဳဗြဴသအာၚ်လေဝ် ဟွံဂရၚ်ပတီလဴဗ္စမ္ဂး။ ခမဳဗြဴဝွံလေဝ် မ္ဂးဂှ် ထံက်ရံၚ်ကဵုခမဳဗြဴ မအာစိုပ်ပါရာဇိကမဒှ်ကိုပ်ကၠာဂှ် ဂပ်ဝ်သ္ဂးရ။ ခမဳဗြဴဝွံလေဝ် မ္ဂးဂှ် ထံက်ရံၚ်ကဵုခမဳဗြဴ မအာစိုပ်ပါရာဇိကမဒှ်ကိုပ်ကၠာတုဲ ဂပ်ဝ်သ္ဂးရ။ ဒးအာပတ်ပါရာဇ်ရ မ္ဂးဂှ် ဗွဲဥပမာတုန် တၞးဆုသာ်ဖျိုဟ် မပြဟ်စှေ်နူတဝ်ဂှ် သၟဟ်ညံၚ်ရဴဟွံထေက်ကဵုတၞဟ်နကလေၚ်ဍိုပ်ဍဴကီု တုပ်သၟဟ်သာ်ဝွံ ခမဳဗြဴမွဲ သီုကဵုမတီတဴ ခမဳဗြဴမအာစိုပ်အာပတ်ပါရာဇ်ဂှ် အလဵုဇကုလေဝ် ဟွံစောဒနာရ၊ ကုဂကောံဂိုဏ်လေဝ် ဟွံဂရၚ်ပတီလဴဗ္စရ ရဴဝွံ ပ္ဍဲအယာံမာတ်ဖျေံကၠေံသဇိုၚ်ဝန်ဂှ် ခမဳဗြဴဟွံသေၚ်ရ၊ တၞောဝ်ကျာ်ကောန်သၟိၚ်ဗြဴသာကျဝၚ်ဟွံသေၚ်ရ၊ ဟိုတ်ဂှ်ရ ကော်ခဴဂး အာစိုပ် ပွမကျနူသာသနာရ။ ပ္ဍဲအရာ ဟွံမွဲကဵုပွမပံၚ်ဖက် ကေုာံခမဳဗြဴခိုဟ်ဆာဲဂမၠိုၚ်မွဲစွံဂှ် ပွမပံၚ်ဖက်မ္ဂးဂှ် ပွမသ္ပဝိနယ်ကမ်မွဲစွံ ပွမစၞောန်ထ္ၜး (ဖ္ဍောတ်) ပါတိမုက်မွဲစွံ ပွမဒ္ဂေတ် လ္ၚတ်ပဒတဴမွဲစွံရောၚ်၊ သီုဖအိုတ်ဝွံ ပွမပံၚ်ဖက်မ္ဂးရ၊ ပွမပံၚ်ဖက်ဂှ် ဟွံမွဲမွဲစွံ ကေုာံခမဳဗြဴမစှေ်ပါရာဇိကဂှ်ရ၊ ဟိုတ်ဂှ်ရ ကော်ခဴဂး “ဟွံမွဲကဵုပွမပံၚ်ဖက် ကေုာံခမဳဗြဴခိုဟ်ဆာဲဂမၠိုၚ်မွဲစွံ” ရ။
667) “ပွမကတဵုဒှ်သေက်ဇဵု ပွမကယျာန်ဓဝါတ် ပွမဂိုၚ်ကေတ်ကွေတ်မစှေ်စး ပွမဟီုဂလာန်စှေ်စး ဒဒက်တဴသၚ် ကြက်ကတဵုဒှ်ရ” ရဴဝွံ (ပၠုပ်စိုတ်တုဲ) ဟွံဟီုလဴဗ္စမ္ဂး၊ “သၚ်ပါ်ဒကးကီု စရိတ်သၚ် (သၚ်ကရောန်) ကီု ကြက်ကတဵုဒှ်ရ” ရဴဝွံ (ပၠုပ်စိုတ်တုဲ) ဟွံဟီုလဴဗ္စမ္ဂး၊ “ခမဳဗြဴဝွံ သအဵုသအာ်ရ၊ ကြမ်ကြသကာတ်မြဟ်ရ၊ ကြက်သ္ပတဴအန္တရာယ်လမျီုကီု အန္တရာယ်သာသနာကီုရ” ရဴဝွံ (ပၠုပ်စိုတ်တုဲ) ဟွံဟီုလဴဗ္စမ္ဂး၊ ဟိုတ်မဟွံညာတ် ခမဳဗြဴသအာၚ်ဂမၠိုၚ် မဗဗွဲတုဲ ဟွံဟီုလဴဗ္စမ္ဂး၊ သီုဟွံမွဲပၟိက်ဂြောပ်ဗ္ဒန် ဟွံဟီုလဴဗ္စမ္ဂး၊ “နပွကမၠောန်ဇကု ကြက်ပြာကဋ်ရ” ရဴဝွံ (ပၠုပ်စိုတ်တုဲ) ဟွံဟီုလဴဗ္စမ္ဂး၊ ဟွံဒးအာပတ်ရ၊ ကုခမဳဗြဴကြအ်ဥမ္မတ် ခမဳဗြဴကလိလောန်ကၠာတဲဂှ် ဟွံဒးအာပတ်ရ။ ဒုတိယပါရာဇိက သိက္ခာပိုဒ် တုဲရ။
