၁.၂.၁။ ဒုတိယပါရာဇိကသိက္ခာပိုဒ်
664) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗြဴသုန္ဒရဳနန္ဒာ ဟိုတ်နူသာဠှ မဒှ်ကောန်စဴမိဂါရသေဌဳဂှ် မၞုံကဵုဂၠမ်ဂဝ်ရ၊ လုကဴကာဗၞတ်ဂၠမ်ဂဝ်ဂှ်တ္ၜတ်ဒၟံၚ်ဂှ် ဂြောပ်ဗ္ဒန်စွံလဝ်တုဲ ပ္ဍဲကြဴ ပ္ဍဲအခိၚ်ဂၠမ်ဂဝ်ကြံၚ်က္ဍုဟ်ဂှ် ရာမ်တိတ်ခရှ်တုဲ သၠးကောန်ရ။ ခမဳဗြဴဂမၠိုၚ် “ယွံနာဲဗြဴ သုန္ဒရဳနန္ဒာတုန် ရာမ်တိတ်ခရှ်တုဲ ခြာဟွံလအ်ဟေၚ်ဏီ သၠးကောန်ရ၊ ပသာ်ရော? သုန္ဒရဳနန္ဒာဂှ် ဃောဒှ်ခမဳဗြဴတေံဟေၚ် မၞုံကဵုဂၠမ်ဂဝ်ဟာ” ရဴဝွံ သၟာန်တဴ ခမဳဗြဴထုလ္လနန္ဒာအိုတ်ရ။ ယွံနာဲဗြဴတအ် အတိုၚ်ထေၚ်ဂှ် ဍာံပြရ ရဴဝွံ (သ္ဂးရ)။ ယွံနာဲဗြဴ တၠအဲ သီုကဵုမတီတဴ ခမဳဗြဴမအာစိုပ်အာပတ်ပါရာဇ်ဂှ် မုဟိုတ် အလဵုဇကုလေဝ် ဟွံစောဒနာရော? ကုဂကောံဂိုဏ်လေဝ် ဟွံဂရၚ်ပတီလဴဗ္စရော? ရဴဝွံ (သ္ဂးအိုတ်ရ)။ ပွမဟွံမွဲကဵုဂုဏ် သုန္ဒရဳနန္ဒာဂှ် ဒှ်မဟွံမွဲကဵုဂုဏ်အဲဟေၚ်ရ၊ ဟွံမွဲကဵုဒယှ်တှ် သုန္ဒရဳနန္ဒာဂှ် ဒှ်ဟွံမွဲကဵုဒယှ်တှ် အဲဟေၚ်ရ၊ ဟွံမွဲကဵုသအာၚ်တွဳဝါရ သုန္ဒရဳနန္ဒာဂှ် ဒှ်ဟွံမွဲကဵုသပအ်တွဳဝါရအဲဟေၚ်ရ၊ ဟွံမွဲကဵုလာဘ် သုန္ဒရဳနန္ဒာဂှ် ဒှ်ဟွံမွဲကဵုလာဘ်အဲဟေၚ်ရ၊ ယွံနာဲဗြဴတအ် အဲဍိက်ဂှ် ဟွံမွဲကဵုဂုဏ်ဇကု ဟွံမွဲကဵုဒယှ်တှ်ဇကု ဟွံမွဲကဵုသကအ်တွဳဝါရဇကု ဟွံမွဲကဵုလာဘ်ဇကုဂှ် ပသာ်ဂွံဟီုလဴ ကုညးသအာၚ်ဂမၠိုၚ်မာန်ရော? ရဴဝွံ (သ္ဂးရ)။ ခမဳဗြဴပၟိက်အောန်ဂမၠိုၚ်ဂှ် “နာဲဗြဴထုလ္လနန္ဒာ သီုကဵုမတီတဴ ခမဳဗြဴ မအာစိုပ်အာပတ်ပါရာဇ်ဂှ် မုဟိုတ် အလဵုဇကုလေဝ် ဟွံစောဒနာရော? ကုဂကောံဂိုဏ်လေဝ် ဟွံဂရၚ်ပတီလဴဗ္စရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ဂရၚ်ပတီဟီုပရူပရာဝွံ ကုခမဳတြုံဂမၠိုၚ်အိုတ်ရ၊ ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ ခမဳဗြဴမအာစိုပ်အာပတ်ပရာဇ်ဂှ် အလဵုဇကုလေဝ် ဟွံစောဒနာရ၊ ကုဂကောံဂိုဏ်လေဝ် ဟွံဂရၚ်ပတီလဴဗ္စရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက် ခမဳဂမၠိုၚ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ “ယွံခမဳတအ် မုဟိုတ် ခမဳဗြဴထုလ္လနန္ဒာ သီုကဵုမတီတဴ ခမဳဗြဴမအာစိုပ်အာပတ်ပါရာဇ်ဂှ် အလဵုဇကုလေဝ် ဟွံစောဒနာရော? ကုဂကောံဂိုဏ်လေဝ် ဟွံဂရၚ်ပတီလဴဗ္စရော? ယွံခမဳတအ် (ကမၠောန်ပွမခမဳဗြဴထုလ္လနန္ဒာသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ်စၞောန်ထ္ၜး သိက္ခာပိုဒ်ဝွံအိုတ်ညိ။
665) “ယြဴခမဳမွဲ သီုကဵုမတီတဴ ခမဳဗြဴမအာစိုပ်အာပတ်ပါရာဇ်ဂှ် အလဵုဇကုလေဝ် ဟွံစောဒနာမ္ဂး၊ ကုဂကောံဂိုဏ်လေဝ် ဟွံဂရၚ်ပတီလဴဗ္စမ္ဂး၊ ယြဴပ္ဍဲအခိၚ်မွဲ ခမဳဗြဴမစှေ်ပါရာဇိကတုဲဂှ် တန်တဴဒၟံၚ် (ပ္ဍဲအယောၚ်အလာခမဳဗြဴ) လေဝ် ဒှ်ရ၊ စုတိချိုတ်အာလေဝ် ဒှ်ရ၊ ဂပ်ဝ်ပြာမ်ကၠေံ (ဂပ်ဝ်ပလီုပလာ်ကၠေံ) တုဲလေဝ် ဒှ်ရ၊ ပြံၚ်အာဘာတဳတုဲလေဝ် ဒှ်ရ၊ ပ္ဍဲအခိၚ်ဂှ် ခမဳဗြဴမတီဂှ် ‘ယွံနာဲဗြဴတအ် ဒေံဗြဴဂှ် မၞုံသဘဴရဴဝွံရ၊ မၞုံသဘဴရဴဝွံရ’ ရဴဝွံ ပ္ဍဲကိုပ်ကၠာဟေၚ် အဲဍိက်တီဒၟံၚ်ရ၊ ၜိုန်ဂှ်လေဝ် အလဵုဇကုလေဝ် ဟွံစောဒနာဒးရ၊ ကုဂကောံဂိုဏ်လေဝ် ဟွံဂရၚ်ပတီလဴဗ္စရ’ ရဴဝွံ လက်ကရဴမှ ဟီုလဴဗ္စမ္ဂး၊ ခမဳဗြဴဝွံလေဝ် ဂြောပ်ဗ္ဒန်ဒုဟ်ဒှ်တုဲ ဒးအာပတ်ပါရာဇ် (မၞုံယၟုဝဇ္ဇပ္ပဋိစ္ဆာဒိကာ) ရ၊ ဟွံမွဲကဵုပွမပံၚ်ဖက် ကေုာံခမဳဗြဴခိုဟ်ဆာဲဂမၠိုၚ်မွဲစွံရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
