၁.၁.၁။ ပဌမပါရာဇိကသိက္ခာပိုဒ်
656) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် သာဠှ မဒှ်ကောန်စဴမိဂါရသေဌဳ မိက်ဂွံသိုၚ်ခၞံဘာဘိက္ခုနဳသၚ် ‘သၚ်ခမဳဗြဴ’ တုဲ ပြာပ်အာဇရေၚ် ခမဳဗြဴဂမၠိုၚ်တုဲမ္ဂး— “ယွံနာဲဗြဴတအ် အဲဍိက် နွံပၟိက်မိက်ဂွံသိုၚ်ခၞံဘာဘိက္ခုနဳသၚ်ရ၊ ဩဝ်ကဵုတဴ ခမဳဗြဴ မလေပ်စဳရေၚ်ကေၚ်ကာတၟိအိုတ်ညိ” ရဴဝွံ ဂရၚ်ပတီရ။ ပ္ဍဲအဃောအခိၚ်ဂှ် နန္ဒာ နန္ဒဝတဳ သုန္ဒရဳနန္ဒာ ထုလ္လနန္ဒာ ၝဲဒေံဂမၠိုၚ်ပန်တၠဝွံ ဒှ်ခမဳဗြဴ ပ္ဍဲဇရေၚ်ခမဳဗြဴဂမၠိုၚ်အိုတ်ရ။ ပၞောဝ်ကဵုပန်တၠဂမၠိုၚ်ဂှ် ခမဳဗြဴသုန္ဒရဳနန္ဒာဂှ် ဒှ်ခမဳဃောဍောတ်သွတ်ရ၊ ရုပ်သာ်ကျေဝ်ဂေါဝ်တုဲ ထေက်ကဵုဗဵုသ္ၚေဝ် ထေက်ကဵုလျုၚ်ရ၊ မၞုံကဵုပညာတုဲ ကေုာံအစောံသတ္တိလေဝ် ဍိုက်ပေၚ်ရ၊ ဉာဏ်ပညာမကေက်သကာလေဝ်နွံရ၊ စဳကၠးဆိုက်ဗ္ဒက်တုဲ ပွမလၞုဟ်ဒကုဲလေဝ် ဟွံမွဲရ၊ ဍိုက်ပေၚ်တဴကေုာံပွမဂၠိုက်ဂၠာဲစမ်ၜတ်ဟိုတ် ပ္ဍဲကမၠောန်ဂှ်ဂှ်တုဲ တၞဟ်နပွမကၠောန် သ္ပစဳရေၚ်ဖန်ဖက်လေဝ် သၟဟ်အစောံရ၊ ပ္ဍဲအခိၚ်ဂှ် ဘိက္ခုနဳသၚ် သၟိတ်ပတိုန် ခမဳဗြဴသုန္ဒရဳနန္ဒာတုဲမ္ဂး ကဵုတဴခမဳဗြဴ မလေပ်သ္ပကေၚ်ကာတၟိ ကုသာဠှ ကောန်စဴမိဂါရသေဌဳရ။ ပ္ဍဲအခိၚ်ဂှ် ခမဳဗြဴသုန္ဒရဳနန္ဒာ (သွက်ဂွံအာတ်) ရဴဝွံမ္ဂး “ဩဝ်ကဵုဝါစဳ (ဗဗဴ) ညိ၊ ဩဝ်ကဵုမုဲညိ၊ ဩဝ်ကဵုမြပံၚ်ညိ၊ ဩဝ်ကဵုကွဵုဇၜံက်ညိ၊ ဩဝ်ကဵုပၞုတ်ညိ” ဂှ် သ္ဒးက္ညအာ သ္ၚိသာဠှ ကောန်စဴမိဂါရသေဌဳ ဟွံပိုတ်ဟွံပိုတ် (မနှေံမနှေံ) ရ။ သာဠှ ကောန်စဴမိဂါရသေဌဳလေဝ် သွက်ဂွံတီကေတ် အရာမကၠောန်သ္ပတုဲ အရာမဟဂွံကၠောန်သ္ပဏီ သ္ဒးအာတဴ ဘာခမဳဗြဴဂမၠိုၚ် ဟွံပိုတ်ဟွံပိုတ်ရ။ သုန္ဒရဳနန္ဒာ ကေုာံသာဠှ ဂမၠိုၚ် ဟိုတ်မဂွံညာတ်ဒၟံၚ်ဟွံပိုတ်ဟွံပိုတ်ဂှ်ရ မၞုံကဵုစိုတ် (ဆာန်) ဒက်ဂြေန်အာအိုတ်ရ။ ပ္ဍဲကြဴနူဂှ် သာဠှ ကောန်စဴမိဂါရသေဌဳ သွက်ဂွံပလီုပလာ် ခမဳဗြဴသုန္ဒရဳနန္ဒာ ဟွံကလိအခေါၚ်တုဲ တၞဟ်နသွက်ဂွံပလီုပလာ်ဂှ်ဟေၚ် တရာပ်ဖာပ်ဗ္စပိဏ္ဍပါတ် ကုဘိက္ခုနဳသၚ်ရ။ ပ္ဍဲအခိၚ်ဂှ် သာဠှ ကောန်စဴမိဂါရသေဌဳ လးပဠေဝ်ဒၞဲါဂဇအ် ပ္ဍဲဇြပ်ကဵုပိုဉ်မ္ဂး “ခမဳဗြဴဂမၠိုၚ် မၞုံဗၞတ်ဝွံ ဇၞော်လတူနာဲဗြဴသုန္ဒရဳနန္ဒာအိုတ်ရ” ရဴဝွံ ပၠုပ်စိုတ်တုဲ လးလဝ်သၞာဂဇအ် ပ္ဍဲဌာန်မွဲရ၊ “ခမဳဗြဴဂမၠိုၚ် မၞုံဗၞတ်ဝွံ ဍောတ်သွဝ်နာဲဗြဴသုန္ဒရဳနန္ဒာအိုတ်ရ” ရဴဝွံ ပၠုပ်စိုတ်တုဲ လးလဝ်သၞာဂဇအ် ပ္ဍဲဌာန်မွဲရ၊ ပ္ဍဲဌာန်အကြာသကဲမဂြောပ်ဗ္ဒန်မွဲတုန် လးလဝ်သၞာဂဇအ် သွက်နာဲဗြဴသုန္ဒရဳနန္ဒာရ၊ နအကာဲအရာ ခမဳဗြဴဇၞော်ဂမၠိုၚ် တီကေတ် (သုန္ဒရဳနန္ဒာ) ဂဇအ်ဒၟံၚ်ဇရေၚ် ခမဳဗြဴသၟတ်ဂမၠိုၚ်ရကီု နအကာဲအရာ ခမဳဗြဴသၟတ်ဂမၠိုၚ် တီကေတ် (သုန္ဒရဳနန္ဒာ) ဂဇအ်ဒၟံၚ်ဇရေၚ် ခမဳဗြဴဇၞော်ဂမၠိုၚ်ရကီုဂှ် သာဠှ လးလဝ်သၞာရ။
ပ္ဍဲကြဴနူဂှ် သာဠှ ကောန်စဴမိဂါရသေဌဳဂှ် “ယွံနာဲဗြဴတအ် ဒးအခိၚ်ကဵုပိုဉ်ရ၊ ပဠေဝ်လဝ်ပိဏ္ဍပါတ်တုဲရ” ရဴဝွံ ကဵုဂရၚ်ပတီအခိၚ် ကုခမဳဗြဴဂမၠိုၚ်ရ။ ခမဳဗြဴသုန္ဒရဳနန္ဒာတုန် “သာဠှ ကောန်စဴမိဂါရသေဌဳဂှ် နွံပၟိက်ရာဒနာမိက်ကဵုပွကုသိုလ်ထၟိက် ဗွဲမဂၠိုၚ်တုဲ တရာပ်ဖာပ်ဗ္စပိဏ္ဍပါတ်ကုဘိက္ခုနဳသၚ် ဟွံသေၚ်ရ၊ သာဠှ ဂှ် သၟိက်ပလီုပလာ်အဲရ၊ ယဝ်အဲက္ညအာမ္ဂး၊ ဗရုရမျာၚ်မပၠန်ဂတး ကြက်ကတဵုဒှ်ကုအဲရ” ရဴဝွံ သမ္တီကေတ်တုဲ “ဩဝ်အာညိ၊ ရၚ်တၠုၚ်နၚ်ပိဏ္ဍပါတ်သွက်အဲညိ၊ သာဠှ ဂှ် သၟာန်အဲမ္ဂး ‘ဂိယဲဒၟံၚ်ရ’ ရဴဝွံ ဩဝ်ဟီုသ္ဂးညိ” ရဴဝွံ (ဗလးဏာ) ခမဳဗြဴမဒှ်ကွးပဒတဴဇရေၚ်ရ။ “ခိုဟ်သန်ရ ယွံနာဲဗြဴ” ရဴဝွံ သ္ဂးတုဲ ခမဳဗြဴဂှ် ဒုၚ်ဝန် ကုခမဳဗြဴသုန္ဒရဳနန္ဒာရ။ ပ္ဍဲအခိၚ်ဂှ် သာဠှ ကောန်စဴမိဂါရသေဌဳ သီုမဒတူဒၟံၚ် ပ္ဍဲလပါ်မ္ၚးပါၚ်မုက်တြၚ် “ယွံနာဲဗြဴတအ် နာဲဗြဴသုန္ဒရဳနန္ဒာဂှ် ညးဍေံရော? (ဣလဵုရော)၊ ယွံနာဲဗြဴတအ် နာဲဗြဴသုန္ဒရဳနန္ဒာဂှ် ညးဍေံရော?” ရဴဝွံ သၟာန်သၟာန်တဴ ခမဳဗြဴသုန္ဒရဳနန္ဒာဟေၚ်မ္ဂး ခမဳဗြဴမဒှ်ကွးပဒတဴဇရေၚ် ခမဳဗြဴသုန္ဒရဳနန္ဒာဂှ် “ယွံဒကာ ဂိယဲဒၟံၚ်ရ၊ ပိဏ္ဍပါတ်ဟေၚ် ကြက်ရၚ်တၠုၚ်ဏာညိ” ရဴဝွံ သ္ဂးကဵုသာဠှ ကောန်စဴမိဂါရသေဌဳရ။ ပ္ဍဲအခိၚ်ဂှ် သာဠှ ကောန်စဴမိဂါရသေဌဳဂှ် “တၞဟ်နဖဵုနာဲဗြဴသုန္ဒရဳနန္ဒာဟေၚ် အဲဒှ်တရာပ်ဖာပ်ဗ္စပိဏ္ဍပါတ် ကုဘိက္ခုနဳသၚ်ရ” ရဴဝွံ (ဗှ်ဗၞုဟ်ကေတ်တုဲ) “ဩဝ်ကၠောန်ၜိုတ်ဥပကာကုဂကောံခမဳဗြဴ နကဵုပိဏ္ဍပါတ်အိုတ်ညိ” ရဴဝွံ ဖအောဝ်စကာမၞိဟ်ဂမၠိုၚ်တုဲမ္ဂး ပြာပ်အာဘာခမဳဗြဴရ။ အဃောဂှ် ခမဳဗြဴသုန္ဒရဳနန္ဒာ သီုမစၟဳမၚ်ဒၟံၚ် သာဠှ ကောန်စဴမိဂါရသေဌဳဂှ် ဒတူမၚ်ဒၟံၚ်ပ္ဍဲပါၚ်မုက်တြၚ်အာရှာမ်ရ၊ ခမဳဗြဴသုန္ဒရဳနန္ဒာ ညာတ်ကေတ် သာဠှ ကောန်စဴမိဂါရသေဌဳ မကၠုၚ်ဒၟံၚ်နူဇမ္ၚောဲဟေၚ်တုဲ လုပ်အာအပ္ဍဲဘာတုဲ သီုမဓလီုလဝ်က္ဍိုပ် တိတ်လ္ၚာဒၟံၚ်ပ္ဍဲလတူဇံၚ်ရ။
ပ္ဍဲအခိၚ်ဂှ် သာဠှ ကောန်စဴမိဂါရသေဌဳ ပြာပ်အာဇရေၚ်ခမဳဗြဴသုန္ဒရဳနန္ဒာတုဲမ္ဂး “ယွံနာဲဗြဴ ပွမဟွံဒှ်တသိုခ်တၠအဲဂှ် ပသာ်ရော? တၠအဲ မုဟိုတ် တိက်ဒၟံၚ်ရော?” ရဴဝွံ သၟာန်ခမဳဗြဴသုန္ဒရဳနန္ဒရ၊ “ယွံဒကာ ကုဗြဴမနွံပၟိက်သ္ဍိုက်မၠိုက်ဒၟံၚ် ညးဟွံမွဲပၟိက်ဟွံသ္ဍိုက်မၠိုက်ဇကုဂှ် လေပ်ဒှ်အတိုၚ်ဏအ်ရ” ရဴဝွံ ဟီုသ္ဂးရ။ “ယွံနာဲဗြဴ အဲဍိက် မုဟိုတ် ဟွံမွဲပၟိက်ဟွံသ္ဍိုက်မၠိုက်တၠအဲ ဂွံနွံရော? ၜိုန်ဂှ် အဲဍိက်ဟွံကလိဂွံအခေါၚ် သွက်ဂွံပလီုပလာ်တၠအဲရ” ရဴဝွံ (ဟီုဟီုဂးဂး) မဍုက်ဍေက်တဴ (ကာယသံသဂ္ဂရာဂ) ဒှ်တုဲ အာစိုပ်ပွမနှဴရဴဇကုကာယ ကေုာံခမဳဗြဴသုန္ဒရဳနန္ဒာ မဍုက်ဍေက် (ကာယသံသဂ္ဂရာဂ) ရ။
ပ္ဍဲအဃောအခိၚ်ဂှ် ခမဳဗြဴဇၞော်မွဲ အဝယ်ဗျုဟွံထတ်ဂှ် ဟိုတ်နူဇိုၚ်ဂိတုဲ တိက်သတၚ်ဒၟံၚ် ပ္ဍဲဇရေၚ်ခမဳဗြဴသုန္ဒရဳနန္ဒာရ။ ခမဳဗြဴဇၞော်ဗျုဂှ် ဆဵုညာတ်ဒး သာဠှ ကောန်စဴမိဂါရသေဌဳ မဍုက်ဍေက်တဴ (ကာယသံသဂ္ဂရာဂ) အာစိုပ်ပွမနှဴရဴဇကုကာယ ကေုာံခမဳဗြဴသုန္ဒရဳနန္ဒာ မဍုက်ဍေက် (ကာယသံသဂ္ဂရာဂ) တုဲ “မုဟိုတ် နာဲဗြဴသုန္ဒရဳနန္ဒာ ဍုက်ဍေက် (ကာယသံသဂ္ဂရာဂ) ဒှ်တုဲ သာယျေန် သ္ဍိုက်မၠိုက် ပွမနှဴရဴဇကုကာယ ကေုာံတြုံမဍုက်ဍေက်တဴ (ကာယသံသဂ္ဂရာဂ) ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ပ္ဍဲအခိၚ်ဂှ် ခမဳဗြဴဇၞော်ဗျုဂှ် ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်ရ။
ခမဳဗြဴပၟိက်အောန် မတရိုပ်စိုတ်လောဲသွာ (အေၚ်သတှေ်) မလေပ်ဂွပါပ်ပွသရာံပါပ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ မၞုံပၟိက်ကဵုသိက္ခာပိပြကာဂမၠိုၚ်ဂှ် “မုဟိုတ် နာဲဗြဴသုန္ဒရဳနန္ဒာ မဍုက်ဍေက်တဴ (ကာယသံသဂ္ဂရာဂ) ဒှ်တုဲ သာယျေန်သ္ဍိုက်မၠိုက် ပွမနှဴရဴဇကုကာယ ကေုာံတြုံမဍုက်ဍေက်တဴ (ကာယသံသဂ္ဂရာဂ) ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲကြဴနူဂှ် ခမဳဗြဴဂမၠိုၚ် ဂရၚ်ပတီဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ။ ခမဳတြုံပၟိက်အောန် မတရိုပ်စိုတ်လောဲသွာ (အေၚ်သတှေ်) မလေပ်ဂွပါပ်ပွသရာံပါပ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ မၞုံပၟိက်ကဵုသိက္ခာပိပြကာဂမၠိုၚ်ဂှ်လေဝ် “မုဟိုတ် ခမဳဗြဴသုန္ဒရဳနန္ဒာ ဍုက်ဍေက်တဴ (ကာယသံသဂ္ဂရာဂ) ဒှ်တုဲ သာယျေန်သ္ဍိုက်မၠိုက် ပွမနှဴရဴဇကုကာယ ကေုာံတြုံမဍေက်ဍေက်တဴ (ကာယသံသဂ္ဂရာဂ) ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဗြဴသုန္ဒရဳနန္ဒာ နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ် ကောံဓရီုတုဲမ္ဂး— “ယွံခမဳတအ် ခမဳဗြဴသုန္ဒရဳနန္ဒာ ဍုက်ဍေက်တဴ (ကာယသံသဂ္ဂရာဂ) ဒှ်တုဲ သာယျေန်သ္ဍိုက်မၠိုက် ပွမနှဴရဴဇကုကာယ ကေုာံတြုံမဍုက်ဍေက်တဴ (ကာယသံသဂ္ဂရာဂ) ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက် ခမဳဂမၠိုၚ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြြ မပတၠပိုဉ်တြဴပြကာ ဟီုဂရိုဟ်ရ၊ “ယွံခမဳတအ် (ကမၠောန်ပွ) ခမဳဗြဴသုန္ဒရဳနန္ဒာ (သ္ပဒး) ဝွံ ဟွံထေက်ကဵုခမဳဗြဴဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အကာဲအရာ ခမဳဗြဴဂမၠိုၚ်ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ ယွံခမဳတအ် မုဟိုတ် ခမဳဗြဴသုန္ဒရဳနန္ဒာ ဍုက်ဍေက်တဴ (ကာယသံသဂ္ဂရာဂ) ဒှ်တုဲ သာယျေန်သ္ဍိုက်မၠိုက် ပွမနှဴရဴဇကုကာယ ကေုာံတြုံမဍုက်ဍေက်တဴ (ကာယသံသဂ္ဂရာဂ) ရော? ယွံခမဳတအ် (ကမၠောန်ပွ) ခမဳဗြဴသုန္ဒရဳနန္ဒာ (သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်ဂၠိုၚ်တိုန်ကီု ကဵုကတဵုဒှ်ဟွံမာန်ရ၊ ယွံခမဳတအ် ဍာံဍာံစၟတ်စၟတ် (ကမၠောန်ပွမခမဳဗြဴသုန္ဒရဳနန္ဒာ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမဟွံကဵုလျုၚ်ဇြုၚ်သ္ဍိုက်ကီု ကုညးဟွံလျုၚ်ဇြုၚ်သ္ဍိုၚ်တုဲလ္ၚဵုဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်လီုလာ်ကီု ကဵုကတဵုဒှ်ရ ရဴဝွံ (ဟီုဂရိုဟ်ရ) ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟီုဂရိုဟ်တၚ်ဒုဟ် ခမဳဗြဴသုန္ဒရဳနန္ဒာ နဟိုတ်မဂၠိုၚ်တုဲမ္ဂး ဟီုဂလာန်ဂရိုဟ်မဟွံမွဲဂုဏ် ဒဒက်တဴဇကုဇကုပွမဇြိုၚ်ကဵုလွဳမြိမြန်ဇကုဇကု ညးသအာၚ်ဂမၠိုၚ် ပွမဇြိုၚ်ကဵုလွဳမြိမြန် ပွမပၟိက်ဇၞော် ပွမဟွံအေၚ်သတှေ် (ဟွံတရိုပ်စိုတ်) ပွမမိပ်လဟိၚ် ပ္ဍဲဂကောံသကအ်ပွံၚ် ပွမလၞုဟ်လၞန်ဂမၠိုၚ်တုဲ နဟိုတ်မဂၠိုၚ်ဂၠၚ် ဟီုသ္ဂးတဴဂုဏ် ဒဒက်တဴဇကုဇကု ပွမလွဳမြိမြန်ဇကုဇကုလောဲသွာ ညးသအာၚ်ဂမၠိုၚ် လွဳမြိမြန်လောဲသွာ ပွမပၟိက်အောန် ပွမအေၚ်သတှေ် (တရိုပ်စိုတ်) ပွမတှေ်တြဳထောံကိလေသ ပွမခါလယှ်ထောံကိလေသ ပွမၞုံကဵုလျုၚ်ဇြုၚ်သ္ဍိုက် ပွမဟွံဆန်ၜန် ကိလေသ ပွမပတိတ်ဇြဟတ် နဝဳရိယဂမၠိုၚ်တုဲမ္ဂး ဟီုတွံတဴဂလာန်ဓရ် မဗဗွဲညဳသၟဟ်ကဵုဗီုဒဒှ်ဂှ် ကုခမဳဂမၠိုၚ်တုဲ ပ္ဍဲကြဴ—
ဟိုတ်ဂွံပညပ်ဝိနယ်စှ်သာ်
"ယွံခမဳတအ် ဒှ်သာ်ဂှ်မ္ဂး သ္ပဟိုတ်ကဵု ဖဵုတၟေၚ်ဂမၠိုၚ်စှ်ပြကာမတွံဂး (၁) သွက်သ္ဂောံဒ္ဂေတ်လ္ၚတ်ဒုၚ်ဝန်မ္ဂး ဒးရးသန်ရ ဒဒက်တဴကဵုသၚ်၊ (၂) သွက်ဂွံကဵုဒှ်သၚ်ဂမၠိုၚ်ဒှ်တသိုခ် (၃) သွက်ဂွံလၞိန်ဗပိန်ကၠေံ ညးဖံက်ပလီုပလာ်ဒ္ဂေတ်သဳလဂမၠိုၚ်၊ (၄) သွက်ခမဳဗြဴ မသ္ဍိုက်မၠိုက်သၞေံသၞဴဒ္ဂေတ်သဳလဂမၠိုၚ် ဂွံပဒတဴဗွဲတသိုခ်မာန်၊ (၅) သွက်ဂွံသ္ၚဳလလမ်မၚ်မွဲကၟာတ်လဒဵု ဒဒိုခ်တၟေၚ်ဂမၠိုၚ် မကတဵုဒှ်ပ္ဍဲဂတမတ်၊ (၆) သွက်ဂွံပဲါကၠေံဒဒိုခ်တၟေၚ်ဂမၠိုၚ် ကြက်ကတဵုဒှ်လက်ကရဴ၊ (၇) သွက်ညးဟွံလျုၚ်ဇြုၚ်သ္ဍိုက်ဂမၠိုၚ်ဏီ ဂွံလျုၚ်ဇြုၚ်သ္ဍိုက်၊ (၈) သွက်ညးလျုၚ်ဇြုၚ်သ္ဍိုက်တုဲဂမၠိုၚ် ဂွံလျုၚ်ဇြုၚ်သ္ဍိုက်ဂၠိုၚ်တိုန်၊ (၉) သွက်ဓရ်ညးသပ္ပုရိုဟ် ‘သာသနာပိပြကာ’ ဂွံတန်တဴအာ၊ (၁၀) သွက်ဂွံယိုက်ဒိုက် ‘ဝိနယ်’ စေဝ်ပၞောန်တုဲ ပညပ်တဴသိက္ခာပိုဒ် ကုခမဳဗြဴဂမၠိုၚ်ရ”
ရဴဝွံ သ္ဂးရ။
ယွံခမဳတအ် ရဴဝွံဟေၚ် ဩဝ်ကဵုခမဳဗြဴဂမၠိုၚ်စၞောန်ထ္ၜး သိက္ခာပိုဒ်ဝွံအိုတ်ညိ။
657) “ယြဴခမဳဗြဴမွဲ ဍုက်ဍေက်တဴ (နကာယသံသဂ္ဂရာဂ) ဒှ်တုဲ သာယျေန်တဴ ပွမဇွိတ်သပေါတ်တူရူကီု ပွမဇွိတ်သပေါတ်ပြံၚ်အာပြံၚ်ကၠုၚ်ကီု ပွမရပ်ဒးကီု ပွမလုက်စုက်ဒးကီု ပွမပ္ဍဵုပတ်ကီု ပ္ဍဲသၟဝ်ဇုတ်ကၞၚ်ကအ်ၜါ ကေုာံလတူဗၞဳအဝဏ်တၚ်က္ၜံၚ် (ဇကု) ၜါ ဒဒက်တဴပူဂိုလ်မဒှ်တြုံမၞိဟ် မဍုက်ဍေက်တဴ (နကာယသံသဂ္ဂရာဂ) မ္ဂး၊ ခမဳဗြဴဝွံလေဝ် သာယျေန်ပွမဇွိတ်သပေါတ် ပ္ဍဲလတူဗၞဳအဝဏ်တၚ်က္ၜံၚ်ၜါဒှ်တုဲ ဒးအာပတ်ပါရာဇ် (မၞုံယၟုဥဗ္ဘဇာဏုမဏ္ဍလိကာ) ရ၊ ဟွံမွဲကဵုပွမပံၚ်ဖက် ကေုာံခမဳဗြဴခိုဟ်ဆာဲဂမၠိုၚ်မွဲစွံရ” ရဴဝွံ (ဩဝ်ကဵုစၞောန်ထ္ၜးအိုတ်ညိ ရဴဝွံ သ္ဂးရ)။
