၇.၇.၉။ သိက္ခာပိုဒ်နဝမ
646) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ဂဇအ်ဒၟံၚ်ပ္ဍဲသၞာမသဝ်တုဲ တွံဓရ် ကုညးမဂဇအ်ဒၟံၚ်ပ္ဍဲသၞာမသၠုၚ်အိုတ်ရ ။ ပ ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ဂဇအ်ဒၟံၚ်ပ္ဍဲသၞာမသဝ်တုဲ တွံဓရ်ကုညးမဂဇအ်ဒၟံၚ် ပ္ဍဲသၞာမသၠုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ၊ “ယွံခမဳတအ် ဂဇအ်ဒၟံၚ်ပ္ဍဲသၞာမသဝ်တုဲ ကုညးမဂဇအ်ဒၟံၚ်ပ္ဍဲသၞာမသၠုၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ဂဇအ်ဒၟံၚ်သၞာမသဝ်တုဲ တွဓရ် ကုညးဟွံမဂဇအ်ဒၟံၚ်ပ္ဍဲသၞာမသၠုၚ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂ။ သ္ဂးတိုန်ကဵုခမဳ ဂမၠိုၚ်ရ။
647) ယွံခမဳတအ် ကေၚ်ကတဵုဒှ်ကၠုၚ်ဗွဲကိုပ်ကၠာတုန် ပ္ဍဲဍုၚ်ဗာရာဏသဳ သမ္ဘာဒေါၚ်စၞာမွဲ မၞုံကဵုဂၠမ်ဂဝ် (ပဋိသန္ဓိ) ရ။ ယွံခမဳတအ် ပ္ဍဲအခိၚ်ဂှ် ဗြဴဒေါၚ်စၞာဂှ် “ယွံကောန်နာဲ အဲမၞုံကဵုဂၠမ်ဂဝ်ရတုဲ သၟိက်ဂွံစသတ်ကြုက်ရ” ရဴဝွံ ဟီုကဵုတြုံဒေါၚ်စၞာဂှ်ရ။ သတ်ကြုက်ဟွံမွဲရ၊ အခိၚ်ကြုက်သတ် ဟွံသေၚ်ရ ရဴဝွံ (သ္ဂးတဴမ္ဂး) ‘ဟဂွံစသတ်ကြုက်မ္ဂး ကြက်သ္ဒးချိုတ်ရ’ ရဴဝွံ (ဟီုသ္ဂးရ)။ ပ္ဍဲအဃောအခိၚ်ဂှ် တၞံကြုက်သၟိၚ်ဂှ် သတ်ဒၟံၚ်လၟိုန်ရ။ ယွံခမဳတအ် ပ္ဍဲအခိၚ်ဂှ် ဒေါၚ်စၞာဂှ် ပြာပ်အာဇရေၚ်တၞံကြုက်တုဲမ္ဂး တိုန်အာတုဲ အောပ်ဗ္ဒဒၟံၚ်ရ၊ ယွံခမဳတအ် ပ္ဍဲအခိၚ်ဂှ် သၟိၚ်မွဲဟာန်ကေုာံပြောဟိတ် ပြာပ်အာဇရေၚ်တၞံကြုက်တုဲမ္ဂး သီုမဂဇအ်ဒၟံၚ် ပ္ဍဲဒၞဲါမသၠုၚ်ဂှ် ဂိုၚ်ကတ်မန်ယန်ရ။ ယွံခမဳတအ် ပ္ဍဲအခိၚ်ဂှ် ကသပ်ရဴဝွံ ကတဵုဒှ်ကုဒေါၚ်စၞာရ။ ‘သၟိၚ်ဂှ် ဂဇအ်ဒၟံၚ်ပ္ဍဲဒၞဲါမသၠုၚ်တုဲ ဂိုၚ်ကတ်ကေတ်မန်ယန်ရ၊ သၟိၚ်ဝွံတုန် ဟွံမွဲကဵုဓရ် ဗွဲမလောန်ရ။ ဗဗၞးဂှ် ဂဇအ်ဒၟံၚ် ပ္ဍဲဒၞဲါမသဝ်တုဲ ဗတောန်ကဵုမန်ယန် ကုသၟိၚ်မဂဇအ်ဒၟံၚ် ပ္ဍဲဒၞဲါမသၠုၚ်ရ၊ ဗဗၞးဝွံလေဝ် ဟွံမွဲကဵုဓရ် ရသွံ၊ အဲဂှ် ဟိုတ်နူဗြဴတုဲ ဂိုၚ်ကၠတ်ဒးသတ်ကြုက်သၟိၚ်ရ၊ အဲဂှ်လေဝ် ဒှ်ညးဟွံမွဲကဵုဓရ်ရ၊ မၞိဟ် သီုဖအိုတ်ဝွံ ဒှ်ညးဟွံမွဲကဵုစေဝ်ပၞောန်ဟေၚ်ရ’ ရဴဝွံ ချပ်တုဲပ္ဍဲကြဴ (ဒေါၚ်စၞာဂှ်) ဆၚ်စှေ်ကၠုၚ်နူတၞံကြုက် ပ္ဍဲအကြာသၟိၚ်ကဵုဗဗၞးဂှ်ဟေၚ်ရ။ ဗဗၞးဂှ် နဟွံမဗွဲကဵုဓရ် ဖျေံပတိုန်ဒၟံၚ်မန်ယန်ရ၊ သၟိၚ်လေဝ် နဟွံဗဗွဲကဵုဓရ် ဂိုၚ်ကတ်ကေတ်မန်ယန်ရ၊ သၟိၚ်,ဗဗၞးသီုၜါတၠဂမၠိုၚ်ဝွံဟေၚ် ဟွံတီကေတ်ဖဵုအိုတ်ရ။ သၟိၚ်,ဗဗၞးသီုၜါတၠဂမၠိုၚ်ဝွံဟေၚ် ဟွံညာတ်ကေတ် ဟိုတ်အိုတ်ရ ရဴဝွံ (ဒေါၚ်စၞာဂှ် ဟီုရ)။ (ဟိုဲဒေါၚ်စၞာ) အဲဂှ် သ္ဂောံစဒၟံၚ်ပုၚ်သာလဳ မသအးဇ္ၚး မနှဴရဴနအမာဲသွဖျုန်ရ၊ ဟိုတ်ဂှ်ရ အဲဟွံဒ္ဂေတ်တဴ ပ္ဍဲဓရ်အရဳ ဂမၠိုၚ်မဂပ်ဝ်ထိုၚ်သးရောၚ် ရဴဝွံ (ဗၞးဂှ် ဟီုရ)။ ယွံဗဗၞး ဂြပ်ရတ် (တၠအဲ) မကလိဂွံ သကအ်တွဳဝါရ (တၠအဲ) မကလိဂွံဂမၠိုၚ် ဒှ်ထေက်ကဵုက္ဍုဟ်မၠေံ အိုတ်ဟေၚ်ရ။ ဂြပ်ရတ်သကအ်တွဳဝါရ မကလိဂွံလဝ်ဂမၠိုၚ်ဂှ် (ပ္ဍဲသံသာကြဴလေဝ်) ဒှ်ပွမဂယိုၚ်လမျီု ဒှ်ဟိုတ်စှေ်အပါယ်တုဲ (ပ္ဍဲဘဝလၟုဟ်လေဝ်) ဒှ်ပွမဂယိုၚ်လမျီု မဟွံဒ္ဂေတ်ဓရ်ဂမၠိုၚ်ဟေၚ်အိုတ်ရ။ ယွံဗဗၞးဇၞော် ဩဝ်ဂြိပ်တိတ် (နူဌာန်ဝွံ) ညိ၊ သတ်ဂမၠိုၚ်မွဲသအာၚ် မသအာၚ်နူဗၞးတအ်ညးဂမၠိုၚ်လေဝ် ဖျိန်ၜိုဟ် (စသုၚ်အိုတ်ရ)။ တၟအ်ဂှ် သၟဟ်ရဴဗကးကၠေံနုၚ်ကီု ဒ္ဂေတ်မဟွံမွဲကဵုဓရ် တၠအဲမဒ္ဂေတ် ဒၟံၚ်ဂှ်လေဝ် လ္ပကဵုပါ်ဗကးတၠအဲညိ ရဴဝွံ (ဒေါၚ်စၞာဂှ် ဟီုရ)။ ယွံခမဳတအ် အဲ ပ္ဍဲအခိၚ်ဒှ်ဒေါၚ်စၞာတေံလေဝ် ဟွံသ္ဍိုက်မၠိုက်ကၠုၚ် ဂဇအ်ဒၟံၚ်ပ္ဍဲဒၞဲါမသဝ် ပွမဖျေံပတိုန်မန်ယန် ကုညးမဂဇအ်ဒၟံၚ် ပ္ဍဲဒၞဲါမသၠုၚ်ရ။ ပ္ဍဲအခိၚ်လၟုဟ်တုန် မုသဇက်သ္ဂးနွံဏီရော? ဟွံသ္ဍိုက်မၠိုက် ဂဇအ်ဒၟံၚ်ပ္ဍဲဒၞဲါမသဝ်တုဲ ပွမတွံဓရ် ကုညးမဂဇအ်ဒၟံၚ် ပ္ဍဲဒၞဲါမသၠုၚ်ဟေၚ် ကြက်ဒှ်ရ။ ယွံခမဳတအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံ ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ (၆၉) “ဂဇအ်ဒၟံၚ်ပ္ဍဲသၞာမသဝ်တုဲ ကြက်ဟွံတွံဓရ် ကုညးဟွံဂိယဲ မဂဇအ်ဒၟံၚ်ပ္ဍဲသၞာမသၠုၚ်ရ ရဴဝွံ သ္ဒးသ္ပပွမဒ္ဂေတ်လ္ၚတ် ပတိတ်ဇြဟတ်ရ” ရဴတွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ဂဇအ်ဒၟံၚ်ပ္ဍဲသၞာမသဝ်တုဲ ဟဂပ်ဝ်တွံဓရ် ကုညးဟွံဂိယဲ မဂဇအ်ုဒၟံၚ် ပ္ဍဲသၞာမသၠုၚ်ရ၊ ယြဴခမဳမွဲ သ္ပဟိုတ်ကဵုပွမဟွံရှေ်သှေ်ရဴဂံ (ပ္ဍဲသိက္ခာပိုဒ်) တုဲ ဂဇအ်ဒၟံၚ်ပ္ဍဲသၞာမသဝ်တုဲ တွံဓရ်ကုညးဟွံဂိယဲ မဂဇအ်ပ္ဍဲသၞာမသၠုၚ်မ္ဂး၊ ဒးအာပတ်ဒုက္ကဋ်ရ။ ကုခမဳမဟွံမွဲကဵုစေတနာ ။ ပ ။ ကုခမဳကလိလောန်ကၠာတဲဂှ် ဟွံဒအာပတ်ရ။ သိက္ခာပိုဒ် နဝမ တုဲရ။
