၇.၇.၁၄။ သိက္ခာပိုဒ်စုဒ္ဒသမ

652) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ပ္ဍဲဌာန်မၞုံကဵုတၞံဆု ချောဲမလမ္စံက်ဍိုပ်ဍဴ သၠးတဴ တရဴဇၞော်ကီု တရဴသၟတ်ကီု ချဟ်ဍာ်ပါၚ်ကီုအိုတ်ရ ။ ပ ။ (၇၄) “သီုဟွံဂိယဲ ပ္ဍဲဌာန်မၞုံကဵုတၞံဆုချောဲမလမ္စံက်ဍိုပ်ဍဴ ကြက်ဟွံသ္ပးတဴ တရဴဇၞော်ကီု တရဴသၟတ်ကီု ချဟ်ဍာ်ပါၚ်ကီုရ ရဴဝွံ သ္ဒးသ္ပပွမဒ္ဂေတ်လ္ၚတ် ပတိတ်ဇြဟတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ သီုဟွံဂိယဲ ပ္ဍဲဌာန်မၞုံကဵုတၞံဆုချောဲမလမ္စံက်ဍိုပ်ဍဴ ဟဂပ်ဝ်သၠးတဴ တရဴဇၞော်ကီု တရဴသၟတ်ကီု ချဟ်ဍာ်ပါၚ်ကီုရ၊ ယြဴခမဳမွဲ သ္ပဟိုတ်ကဵုပွမဟွံရှေ်သှေ်ရဴဂဴ (ပ္ဍဲသိက္ခာပိုဒ်) တုဲ သီုဟွံဂိယဲ ပ္ဍဲဌာန်မၞုံကဵုတၞံဆုချောဲမလမ္စံက်ဍိုပ်ဍဴ သၠးတဴ တရဴဇၞော်ကီု တရဴသၟတ်ကီု ချဟ်ဍာ်ပါၚ်ကီုမ္ဂး၊ ဒးအာပတ်ဒုက္ကဋ်ရ။ ကုခမဳမဟွံမွဲကဵုစေတနာ ခမဳမဝိုတ်အာသတိ ခမဳမဟွံတီ ခမဳမဂိယဲ၊ ဟွံဒးအာပတ်ရ၊ တရဴဇၞော်တရဴသၟတ်ဍာ်ပါၚ် မသၠးစုတ် ပ္ဍဲဌာန်မဟွံမွဲကဵုတၞံဆုချောဲမလမ္စံက်ဍိုပ်ဍဴဂှ် ဓလီုဍိုက်အာဌာန်ပ္ဍဲဌာန်မၞုံကဵုတၞံဆုမလမ္စံက်ဍိုပ်ဍဴမ္ဂး၊ ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ် ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ် စုဒ္ဒသမ တုဲရ။