၇.၆.၆။ သိက္ခာပိုဒ်ဆဋ္ဌ

632) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဂြိုပ်ၜဲလပေါၚ်ဒှ်ဒၞဲါကဵုမသက္ကုဘဲ ကဵုသတ်ဂမၠိုၚ်မပ္တံဒြာဲ ဇရေၚ်ဍုၚ်သုသုမာရဂိရ လုပ်လၟိဟ်ဘဂ္ဂရးဂှ် ပ္ဍဲပြာသာဒ် မၞုံယၟုကောကနဒ ခမဳဂမၠိုၚ် ကိုဟ်ချာဲစုတ် ဍာ်ကြဴဗဗေၚ်မွဲဟာန်ကေုာံမပုၚ် ပ္ဍဲအပ္ဍဲကွာန်အိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ညံၚ်ရဴမၞိဟ်ဒုၚ်စသိုၚ်ကာမဂုဏ်ဂမၠိုၚ်ကီု ကိုဟ်ချာဲစုတ် ဍာ်ကြဴဗဗေၚ်မွဲဟာန်ကေုာံမပုၚ် ပ္ဍဲအပ္ဍဲကွာန်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂမၠိုၚ် ကိုဟ်ချာဲစုတ် ဍာ်ကြဴဗဗေၚ်မွဲဟာန်ကေုာံမပုၚ် ပ္ဍဲအပ္ဍဲကွာန်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ “ယွံခမဳတအ် မၞးတအ်ညးဂမၠိုၚ် ကိုဟ်ချာဲစုတ် ဍာ်ကြဴဗဗေၚ် မွဲဟာန်ကေုာံမပုၚ် ပ္ဍဲအပ္ဍဲကွာန်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် ကိုဟ်ချာဲစုတ် ဍာ်ကြဴဗဗေၚ်မွဲဟာန်ကေုာံမပုၚ် ပ္ဍဲအပ္ဍဲကွာန်အိုတ်ရော? ယွံခမဳတအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ (၅၉) “ကြက်ဟွံကိုဟ်ချာဲစုတ် ဍာ်ကြဴဗဗေၚ်မွဲဟာန်ကေုာံမပုၚ် ပ္ဍဲအပ္ဍဲကွာန်ရ ရဴဝွံ သ္ဒးသ္ပပွမဒ္ဂေတ်လ္ၚတ် ပတိတ်ဇြဟတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ဟဂပ်ဝ်ကိုဟ်ချာဲစုတ် ဍာ်ကြဴဗဗေၚ်မွဲဟာန်ကေုာံမပုၚ် ပ္ဍဲအပ္ဍဲကွာန်ရ၊ ယြဴခမဳမွဲ သ္ပဟိုတ်ကဵု ပွမဟွံရှေ်သှေ်ရဴဂဴ (ပ္ဍဲသိက္ခာပိုဒ်) တုဲ ကိုဟ်ချာဲစုတ် ဍာ်ကြဴဗဗေၚ်မွဲဟာန်ကေုာံမပုၚ် ပ္ဍဲအပ္ဍဲကွာန်မ္ဂး၊ ဒးအာပတ်ဒုက္ကဋ်ရ။ ကုခမဳမဟွံမွဲကဵုစေတနာ ခမဳမဝိုတ်အာသတိ ခမဳမဟွံတီ ခမဳမဂိယဲ၊ ဟွံဒးအာပတ်ရ၊ ရၚ်တၠုၚ်ပတိတ်မပုၚ်တုဲကီု ချိုန်သၠေဟ်ကၠေံမပုၚ်တုဲကီု ဒုၚ်ဂိုၚ်ကေတ်(နထၟာဲဂစှ်၊ ထၟာဲတဲ) တုဲကီု ကိုဟ်ချာဲမ္ဂး၊ ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ်၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ် ဆဋ္ဌ တုဲရ။