၇.၆.၅။ သိက္ခာပိုဒ်ပဥ္စမ

631) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဂြိုပ်ၜဲလပေါၚ်ဒှ်ဒၞဲါ ကဵုမသက္ကုဘဲကဵုသတ်ဂမၠိုၚ် မပ္တံဒြာဲ ဇရေၚ်ဍုၚ်သုသုမာရဂိရ လုပ်လၟိဟ်ဘဂ္ဂရးဂှ် ပ္ဍဲပြာသာဒ် မၞုံယၟုကောကနဒ ခမဳဂမၠိုၚ် ရပ်ကေတ်ခရော်ဍာ်သုၚ် နကဵုတဲ မကၠေဝ်ဗာန်ဒၟံၚ်မပ္တံပိဏ္ဍပါတ်အိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ညံၚ်ရဴမၞိဟ်ဒုၚ်စသိုၚ်ကာမဂုဏ်ဂမၠိုၚ်ကီု ရပ်ကေတ်ခရော်ဍာ်သုၚ် နကဵုတဲ မကၠေဝ်ဗာန်ဒၟံၚ်မပ္တံပိဏ္ဍပါတ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ် “မုဟိုတ် ခမဳဂမၠိုၚ် ရပ်ကေတ်ခရော်ဍာ်သုၚ် နကဵု မကၠေဝ်ဗာန်ဒၟံၚ်မပ္တံပိဏ္ဍပါတ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ “ယွံခမဳတအ် မၞးတအ်ညးဂမၠိုၚ် ရပ်ကေတ်ခရော်ဍာ်သုၚ် နကဵုတဲ မကၠေဝ်ဗာန်ဒၟံၚ် မပ္တံပိဏ္ဍပါတ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် ရပ်ကေတ်ခရော်ဍာ်သုၚ် နကဵုတဲ မကၠေဝ်ဗာန်ဒၟံၚ်မပ္တံပိဏ္ဍပါတ်အိုတ်ရော? ယွံခမဳတအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ (၅၅) “နကဵုတဲ မကၠေဝ်ဗာန်ဒၟံၚ်မပ္တံပိဏ္ဍပါတ် ကြက်ဟွံရပ်ခရော်ဍာ်သုၚ်ရ ရဴဝွံ သ္ဒးသ္ပပွမဒ္ဂေတ်လ္ၚတ် ပတိတ်ဇြဟတ်ရ” ရဴတွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ နကဵုတဲ မကၠေဝ်ဗာန်ဒၟံၚ်မပ္တံပိဏ္ဍပါတ် ဟဂပ်ဝ်ရပ်ခရော်ဍာ်သုၚ်ရ၊ ယြဴခမဳမွဲ သ္ပဟိုတ်ကဵုပွမဟွံရှေ်သှေ်ရဴဂဴ (ပ္ဍဲသိက္ခာပိုဒ်) တုဲ ရပ်ကေတ်ခရော်ဍာ်သုၚ် နကဵုတဲ မကၠေဝ်ဗာန်ဒၟံၚ်မပ္တံပိဏ္ဍပါတ်မ္ဂး၊ ဒးအာပတ်ဒုက္ကဋ်ရ။ ကုခမဳမဟွံမွဲကဵုစေတနာ ခမဳမဝိုတ်အာသတိ ခမဳမဟွံတီ ခမဳမဂိယဲ၊ ဟွံဒးအာပတ်ရ၊ ကြက်ကြာတ်ကြဴရ ရဴဝွံကီု ကြက်ကဵုကြာတ်ကြဴရ ရဴဝွံကီု ရပ်မ္ဂး၊ ဟိုတ်နူပရိုက်ဘဲဂမၠိုၚ် ရပ်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ် ပဉ္စမ တုဲရ။