၇.၄.၈။ သိက္ခာပိုဒ်အဋ္ဌမ

614) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် သၟိက်မိက်ဂွံဟီုဂရိုဟ်တုဲ သ္ၚေဝ်ရံၚ်ဗဗေၚ်ညးသအာၚ်ဂမၠိုၚ်အိုတ်ရ ။ ပ ။ (၃၈) “သၟိက်မိက်ဂွံဟီုဂရိုဟ်ဒှ်တုဲ ကြက် (အဲ) ဟွံသ္ၚေဝ် ဗဗေၚ်ညးသအာၚ်ဂမၠိုၚ်ရ ရဴဝွံ သ္ဒးသ္ပပွမဒ္ဂေတ်လ္ၚတ် ပတိတ်ဇြဟတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ သၟိက်မိက်ဂွံဟီုဂရိုဟ်တုဲ ဟဂပ်ဝ်သ္ၚေဝ်ရံၚ် ဗဗေၚ်ညးသအာၚ်ဂမၠိုၚ်ရ၊ ယြဴခမဳမွဲ သ္ပဟိုတ်ကဵု ပွမဟွံရှေ်သှေ်ရဴဂဴ (ပ္ဍဲသိက္ခာပိုဒ်) တုဲ သၟိက်မိက်ဂွံဟီုဂရိုဟ်တုဲ သ္ၚေဝ်ရံၚ်ဗဗေၚ်ညးသအာၚ်ဂမၠိုၚ်မ္ဂး၊ ဒးအာပတ်ဒုက္ကဋ်ရ။ ကုခမဳမဟွံမွဲကဵုစေတနာ ခမဳမဝိုတ်အာသတိ ခမဳမဟွံတီ၊ ဟွံဒးအာပတ်ရ၊ ကြက်ကဵုဒါန်ရ ရဴဝွံကီု ကြက်ကဵုကဵုဒါန်ရ ရဴဝွံကီု သ္ၚေဝ်ရံၚ်မ္ဂး၊ ဟွံဒးအာပတ်ရ၊ ကုခမဳဟွံမွဲပၟိက်ကဵုပွမဟီုဂရိုဟ်၊ ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ် ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ် အဋ္ဌမ တုဲရ။