၇.၄.၄။ သိက္ခာပိုဒ်စတုတ္ထ

609) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် သ္ပပြဘိုဂ်ပိဏ္ဍပါတ်အိုတ်မ္ဂး သွၜဲဟေၚ် သ္ပပြဘိုဂ် ဗွဲမဂၠိုၚ်အိုတ်ရ ။ ပ ။ (၃၄) “ကြက်သ္ပပြဘိုဂ်ပိဏ္ဍပါတ် မညဳသၟဟ်သၟန်ကဵုသွၜဲရ ရဴဝွံ သ္ဒးသ္ပပွမဒ္ဂေတ်လ္ၚတ် ပတိတ်ဇြဟတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ သွၜဲ မ္ဂးဂှ် သွၜဲမုက်ဂၠံက်ကဵုတဲဂွံ သွၜဲမး (ၜဲဇၞော်) ဂၠံက်ကဵုတဲဂွံ သွၜဲမၞုံၜါဂကူဂမၠိုၚ်ရ၊ ပိဏ္ဍပါတ် မညဳသၟဟ်သၟန်ကဵုသွၜဲဂှ်ဟေၚ် ဂပ်ဝ်ဒးသ္ပပြဘိုဂ်ရ။ ယြဴခမဳမွဲ သ္ပဟိုတ်ကဵု ပွမဟွံရှေ်သှေ် (ပ္ဍဲသိက္ခာပိုဒ်) တုဲ သွၜဲဟေၚ် သ္ပပြဘိုဂ် ဗွဲမဂၠိုၚ်မ္ဂး၊ ဒးအာပတ်ဒုက္ကဋ်ရ။ ကုခမဳမဟွံမွဲကဵုစေတနာ ခမဳမဝိုတ်အာသတိ ခမဳမဟွံတီ ခမဳမဂိယဲ၊ ဟွံဒးအာပတ်ရ၊ ပ္ဍဲဍာ်သွ မပ္တံကဵကဖျုန် မၞုံကဵုရှ်သာဂှ် ဟွံဒးအာပတ်ရ၊ သ္ပပြဘိုဂ်သွ ညးမဒှ်ကဠော ညးမဘိက်နိမန်လဝ်ဂမၠိုၚ် နဂြပ်ဇကု ဗွဲမဂၠိုၚ်မ္ဂး ဟိုတ်နူပရိုက်ဘဲဂမၠိုၚ် သ္ပပြဘိုဂ်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ် စတုတ္ထတုဲရ။