၇.၄.၃။ သိက္ခာပိုဒ်တတိယ

608) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ဇွိတ်သပေါတ် ပ္ဍဲဌာန်ဂှ်ဂှ်တုဲ ‘ဂၠံက်ကေတ်တေံဏအ်ညိတုဲ’ သ္ပပြဘိုဂ်ပိဏ္ဍပါတ်အိုတ်ရ ။ ပ ။ (၃၃) “ကြက်သ္ပပြဘိုဂ် ပိဏ္ဍပါတ် ဗွဲလၟေၚ်လၟေၚ်ရ ရဴဝွံ သ္ဒးသ္ပပွမဒ္ဂေတ်လ္ၚတ် ပတိတ်ဇြဟတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ဂပ်ဝ်သ္ပပြဘိုဂ်ပိဏ္ဍပါတ် ဗွဲလၟေၚ်လၟေၚ်ရ၊ ယြဴခမဳမွဲ သ္ပဟိုတ်ကဵုပွမဟွံရှေ်သှေ်ရဴဂဴ (ပ္ဍဲသိက္ခာပိုဒ်) တုဲ ဇွိတ်သပေါတ် ပ္ဍဲဌာန်ဂှ်ဂှ်တုဲ ‘ဂၠံက်ကေတ်တေံဏအ်ညိတုဲ’ သ္ပပြဘိုဂ်ပိဏ္ဍပါတ်မ္ဂး၊ ဒးအာပတ်ဒုက္ကဋ်ရ။ ကုခမဳမဟွံမွဲကဵုစေတနာ ခမဳမဝိုတ်အာသတိ ခမဳမဟွံတီ ခမဳမဂိယဲ၊ ဟွံဒးအာပတ်ရ၊ မိက်ကဵုကုညးသအာၚ်ဂမၠိုၚ်တုဲ ဇွိတ်သပေါတ်မ္ဂး၊ မိက်လံၚ်စုတ် ပ္ဍဲဗဗေၚ်ခရော်ညးသအာၚ်တုဲ ဇွိတ်သပေါတ်မ္ဂး၊ ဟွံဒးအာပတ်ရ၊ ပ္ဍဲပွေက်ကီု၊ ဟိုတ်နူပရိုက်ဘဲဂမၠိုၚ် ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ် တတိယ တုဲရ။