၇.၃.၉။ သိက္ခာပိုဒ်နတမ

604) ပ္ဍဲအခၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ပ္ဍဲအရာဒုၚ်ဂိုၚ်ကေတ်ပိဏ္ဍပါတ်ဂမၠိုၚ် သွၜဲဟေၚ် ဒုၚ်ဂိုၚ်ကေတ် ဗွဲမဂၠိုၚ်အိုတ်ရ ။ ပ ။ (၂၉) “ကြက်ဒုၚ်ဂိုၚ်ကေတ်ပိဏ္ဍပါတ် မညဳသၟဟ်သၟန်ကဵုသွၜဲရ ရဴဝွံ သ္ဒးသ္ပပွမဒ္ဂေတ်လ္ၚတ် ပတိတ်ဇြဟတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ သွၜဲ မ္ဂးဂှ် သွၜဲမုက်ဂၠံက်ကဵုတဲဂွံ သွၜဲမး (ၜဲဇၞော်) ဂၠံက်ကဵုတဲဂွံ ရဴဝွံ သွၜဲမၞုံၜါဂကူဂမၠိုၚ်ရ၊ ပိဏ္ဍပါတ် မညဳသၟဟ်သၟန်ကဵုသွၜဲဂှ်ဟေၚ် ဂပ်ဝ်ဒးဒုၚ်ဂိုၚ်ကေတ်ရ။ ယြဴခမဳမွဲ သ္ပဟိုတ်ကဵု ပွမဟွံရှေ်သှေ်ရဴဂဴ (ပ္ဍဲသိက္ခာပိုဒ်) တုဲ သွၜဲဟေၚ် ဒုၚ်ဂိုၚ်ကေတ် ဗွဲမဂၠိုၚ်မ္ဂး၊ ဒးအာပတ်ဒုက္ကဋ်ရ။ ကုခမဳမဟွံမွဲကဵုစေတနာ ခမဳမဝိုတ်အာသတိ ခမဳမဟွံတီ ခမဳမဂိယဲ၊ ဟွံဒးအာပတ်ရ၊ ပ္ဍဲဍာ်သွ မပ္တံကဵုကဖျုန် မၞုံကဵုရှ်သာဂှ် ဟွံဒးအာပတ်ရ။ ကုခမဳဒုၚ်ဂိုၚ်ကေတ်သွ ညးမဒှ်ကဠော ညးမဘိက်နိမန်လဝ်ဂမၠိုၚ် ခမဳဒုၚ်ဂိုၚ်ကေတ် တၞဟ်နဖဵုညးသအာၚ် ခမဳဒုၚ်ဂိုၚ်ကေတ် နဂြပ်ဇကု၊ ဟွံဒးအာပတ်ရ၊ ဟိုတ်နူပရိုက်ဘဲဂမၠိုၚ် ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သိက္ခာပိုဒ် နဝမတုဲရ။