၆.၄။ စတုတ္ထပါဋိဒေသနိက်သိက္ခာပိုဒ်
573) ပ္ဍဲအရာယြဴဘာဂြိုပ်ဂမၠိုၚ် နွံအိုတ်ရဂှ် ဘာဂြိုပ် မ္ဂးဂှ် ဗွဲတွဵုယုတ် ဘာမသ္ၚောဲခရာ မသုန်ကၠံဇဵုတ္ၚရောၚ်။ မၞုံကဵုသၠေဟ်ပၟာ မ္ဂးဂှ် ပ္ဍဲအာရှာမ်ကီု ပ္ဍဲဥပစာအာရှာမ်ကီု ဌာန်လုပ်ကမၠတ်ဒမၠဂမၠိုၚ် ပြာကဋ်ရ၊ ဌာန်စ ပြာကဋ်ရ၊ ဌာန်တန်တဴ ပြာကဋ်ရ၊ ဌာန်ဂဇအ် ပြာကဋ်ရ၊ ဌာန်တိက် ပြာကဋ်ရ။ ဍေံမဒ္ဂေတ်တဴမွဲဟာန်ကေုာံပရိုက်ဘဲ မ္ဂးဂှ် ပ္ဍဲအာရှာမ်ကီု ပ္ဍဲဥပစာအာရှာမ်ကီု သ္ဂောံညာတ်ကေတ် ကမၠတ်ဒမၠဂမၠိုၚ် ပြိုက်ဂစိုတ်လဝ် မၞိဟ်ဂမၠိုၚ်အိုတ်ရ၊ သ္ဂောံညာတ်ကေတ် ပၠံၚ်ဗတိုက်ဂမၠိုၚ်အိုတ်ရ၊ သ္ဂောံညာတ်ကေတ် ၜုၚ်တက်ဂမၠိုၚ်အိုတ်ရ။ ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ပ္ဍဲဘာဂမၠိုၚ် မၞုံသဘဴမဖှ်သာ်ဂှ် မ္ဂးဂှ် ပ္ဍဲဘာဂမၠိုၚ် မၞုံသဘဴမဖှ်ရဴဝွံ။ သီုမဟဂပ်ဝ်ကဵုတီ ပ္ဍဲကိုပ်ကၠာ မ္ဂးဂှ် ဂရၚ်ပတီလဴဗ္စ ကုသဟဓရ်ဂမၠိုၚ်မသုန်တၠမ္ဂး၊ ပွမကဵုတီကေတ်သာ်ဝွံ မဟဂပ်ဝ်ကဵုတီမ္ဂးရ။ ပါဲကၠေံအာရှာမ်ကီု ဥပစာအာရှာမ်ကီုတုဲ ဂရၚ်ပတီလဴဗ္စမ္ဂး၊ ပွမကဵုတီကေတ်သာ်ဝွံ ဟမဂပ်ဝ်ကဵုတီမ္ဂးရ။ မဂပ်ဝ်ကဵုတီ မ္ဂးဂှ် ညးဗြဴကီု ညးတြုံကီု မမိက်ကဵုမွဲမွဲ ကၠုၚ်တဴအာရှာမ်ကီု ဥပစာအာရှာမ်ကီုတုဲ “ယွံတဳလပိုဉ် သွက်ခမဳမၞုံယၟုဝွံ ကြက်ရၚ်တၠုၚ်ပလံၚ်နၚ် စၞအာဟာရဘောဇိုန်ဂမၠိုၚ်အိုတ်ရ” ရဴဝွံ ဂရၚ်ပတီလဴဗ္စမ္ဂး၊ ယဝ်မၞုံကဵုသၠေဟ်ပၟာမ္ဂး “မၞုဴကဵုသၠေဟ်ပၟာရ” ရဴဝွံ သ္ဒးဟီုလဴဗ္စရ၊ ယွံမၞုံကဵုပရိုက်ဘဲမ္ဂး “မၞုံကဵုပရိုက်ဘဲရ” ရဴဝွံ သ္ဒးဟီုလဴဗ္စရ။ “ယွံတဳလပိုဉ် နွံသဍေံရ ကြက်ရၚ်တၠုၚ်ပလံၚ်နၚ်ရ” ရဴဝွံ သ္ဂးမ္ဂး၊ “မၞိဟ်ဂမၠိုၚ် ဂ္ၚေၚ်အာကၠုၚ်ဒၟံၚ် ပ္ဍဲဗ္ဒာဲဇရေၚ်ဝွံဂှ်ရ ဩဝ်ပါဲမံၚ်ကဵုအိုတ်ညိ” ရဴဝွံ ထေက်ကဵုသ္ဒးဟိုကဵုကမၠတ်ဒမၠဂမၠိုၚ်ရ။ ပ္ဍဲအရာဂရၚ်ပတီလဴဗ္စ စပ်ကေုာံယာဂုဂှ် တွဳတွိုၚ် (စၞပါကၠုၚ်ကရောံ) ယာဂုလေဝ် ရၚ်တၠုၚ်ပလံၚ်နၚ်မ္ဂး၊ သီုဖအိုတ်ဂှ် မဂပ်ဝ်ကဵုတီကေတ်မ္ဂးရ။ ပ္ဍဲအရာဂရၚ်ပတီလဴဗ္စ စပ်ကေုာံပုၚ်ပိဏ္ဍပါတ်ဂှ် တွဳတွိုၚ် (စၞပါကၠုၚ်ကရောံ) ပုၚ်ပိဏ္ဍပါတ်လေဝ် ရၚ်တၠုၚ်ပလံၚ်နၚ်မ္ဂး၊ သီုဖအိုတ်ဂှ် မဂပ်ဝ်ကဵုတီကေတ်မ္ဂးရ။ ပ္ဍဲအရာဂရၚ်ပတီလဴဗ္စ စပ်ကေုာံစၞစဂှ် တွဳတွိုၚ် (စၞပါကၠုၚ်ကရောံ) စၞစလေဝ် ရၚ်တၠုၚ်ပလံၚ်နၚ်မ္ဂး၊ သီုဖအိုတ်ဂှ် မဂပ်ဝ်ကဵုတီကေတ်မ္ဂးရ။ ပ္ဍဲအရာဂရၚ်ပတီလဴဗ္စ စပ်ကေုာံဂကူဂှ် ပ္ဍဲဂကူဂှ် ယြဴညးမွဲ ရၚ်တၠုၚ်ပလံၚ်နၚ် စၞစဘောဇိုန်ဂမၠိုၚ်မ္ဂး၊ သီုဖအိုတ်ဂှ် မဂပ်ဝ်ကဵုတီကေတ်မ္ဂးရ။ ပ္ဍဲအရာဂရၚ်ပတီလဴဗ္စ စပ်ကေုာံကွာန်ဂှ် ပ္ဍဲကွာန်ဂှ် ယြဴညးမွဲ ရၚ်တၠုၚ်ပလံၚ်နၚ် စၞစဘောဇိုန်ဂမၠိုၚ်မ္ဂး၊ သီုဖအိုတ်ဂှ် မဂပ်ဝ်ကဵုတီကေတ်မ္ဂးရ။ ပ္ဍဲအရာဂရၚ်ပတီလဴဗ္စ စပ်ကေုာံဂကောံဂှ် ပ္ဍဲဂကောံဂှ် ယြဴညးမွဲ ရၚ်တၠုၚ်ပလံၚ်နၚ် စၞစဘောဇိုန်ဂမၠိုၚ်မ္ဂး၊ သီုဖအိုတ်ဂှ် မဂပ်ဝ်ကဵုတီကေတ်မ္ဂးရ။ စၞစ မ္ဂးဂှ် ပါဲကၠေံ ဘောဇိုန်ဂမၠိုၚ်မသုန်သာ် ယာမကာလိက သတ္တာဟကာလိက ယာဝဇဳဝိကတုဲ သှေ်ဂှ် စၞစမ္ဂးရ။ ဘောဇိုန် မ္ဂးဂှ် ပုၚ် ကွာၚ်ဒလောမ် ကွာၚ်ဝိုဟ် က ဖျုန် ရဴဝွံ ဘောဇိုန်ဂမၠိုၚ်နွံမသုန်သာ်အိုတ်ရ။ သီုဟွံဂိယဲ မ္ဂးဂှ် တၞဟ်နဂေတ်ၚေၚ်ပိဏ္ဍပါတ် သၟဟ်ရထရ။ ဂိယဲ မ္ဂးဂှ် တၞဟ်နဂေတ်ဂ္ၚေၚ်ပိဏ္ဍပါတ် ဟွံသၟဟ်ရထရ။ သီုမဟဂပ်ဝ်ကဵုတီ သီုဟွံဂိယဲ “ကြက်သ္ၚာဲရ ကြက်ပြဘိုဂ်ရ” ရဴဝွံ ဒုၚ်ဂိုၚ်ကေတ်မ္ဂး၊ ဒးအာပတ်ဒုက္ကဋ်ရ၊ ဇၟာပ်မၚိတ်ဖျေံ ဇၟာပ်မၚိတ်ဖျေံ ဒးအာပတ်ပါဋိဒေသနိက်ရ။
574) ပ္ဍဲအရာမဟဂပ်ဝ်ကဵုတီ (ဟွံဂရၚ်ပတီလဴဗ္စ) မၞုံကဵုစၟတ်သမ္တီ မဟဂပ်ဝ်ကဵုတီဒှ်တုဲ နကဵုတဲဇကု ဒုၚ်ဂိုၚ်ကေတ် စၞစကီု ဘောဇိုန်ကီု ပ္ဍဲအပ္ဍဲအာရှာမ်တုဲ သီုဟွံဂိယဲ သ္ၚာဲလေဝ်သ္ၚာဲမ္ဂး၊ စလေဝ်စမ္ဂး၊ ဒးအာပတ်ပါဋိဒေသနိက်ရ။ ပ္ဍဲအရာမဟဂပ်ဝ်ကဵုတီ မၞုံကဵုသၠေဟ်ပၟာဒှ်တုဲ နကဵုတဲဇကု ဒုၚ်ဂိုၚ်ကေတ်စၞစကီု ဘောဇိုန်ကီု ပ္ဍဲအပ္ဍဲအာရှာမ်တုဲ သီုဟွံဂိယဲ သ္ၚာဲလေဝ်သ္ၚာဲမ္ဂး၊ စလေဝ်စမ္ဂး၊ ဒးအာပတ်ပါဋိဒေသနိက်ရ။ ပ္ဍဲအရာမဟဂပ်ဝ်ကဵုတီ မၞုံကဵုစၟတ်သမ္တီ မဂပ်ဝ်ကဵုတီဒှ်တုဲ နကဵုတဲဇကု ဒုၚ်ဂိုၚ်ကေတ် စၞစကီု ဘောဇိုန်ကီု ပ္ဍဲအပ္ဍဲအာရှာမ်တုဲ သီုဟွံဂိယဲ သ္ၚာဲလေဝ်သ္ၚာဲမ္ဂး၊ စလေဝ်စမ္ဂး၊ ဒးအာပတ် ပါဋိဒေသနိက်ရ။ တၞဟ်နဖဵုအာဟာရ ဒုၚ်ဂိုၚ်ကေတ် ယာမကလိက သတ္တာဟကာလိက ယာဝဇဳဝိကမ္ဂး၊ ဒးအာပတ်ဒုက္ကဋ်ရ။ ဇၟာပ်မၚိတ်ဖျေံ ဇၟာပ်မၚိတ်ဖျေံ ဒးအာပတ်ဒုက္ကဋ်ရ။ ပ္ဍဲမဂပ်ဝ်ကဵုတီတုဲ မၞုံကဵုစၟတ်သမ္တီ မဟဂွံကဵုတီဏီမ္ဂး၊ ဒးအာပတ်ဒုက္ကဋ်ရ။ ပ္ဍဲမဂပ်ဝ်ကဵုတီတုဲ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲမဂပ်ဝ်ကဵုတီတုဲ မၞုံကဵုစၟတ်သမ္တီ မဂပ်ဝ်ကဵုတီတုဲမ္ဂး၊ ဟွံဒးအာပတ်ရ။ 575) ပ္ဍဲအရာမဂပ်ဝ်ကဵုတီ (ဂရၚ်ပ္တီလဴဗ္စ) ကီု၊ ကုခမဳမဂိယဲကီု၊ ဟွံဒးအာပတ်ရ၊ စတဴစၞသှေ်သၟေဟ် ခမဳမဂပ်ကဵုတီလဝ် ခမဳမဂိယဲဂမၠိုၚ်မ္ဂး၊ ဟွံဒးအာပတ်ရ၊ ဒုၚ်ဂိုၚ်ကေတ် ပ္ဍဲမ္ၚးအာရှာမ်တုဲ စပ္ဍဲအပ္ဍဲအာရှာမ်မ္ဂး၊ စတဴ ရိုဟ် သကောဝ်ခၞော် တၞး ပ္ကဴ သတ်ဂမၠိုၚ် မကတဵုဒှ်ပ္ဍဲအာရှာမ်ဂှ်မ္ဂး၊ ဟိုတ်နွံတုဲ စတဴ ယာမကာလိက သတ္တာဟကာလိက ယာဝဇဳဝိကမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ စတုတ္ထပါဋိဒေသနိက်သိက္ခာပိုဒ်တုဲရ။
ယွံတၠဇမၠိုၚ်အာယုက်တအ် အာပတ်ပါဋဒေသနိက်ဂမၠိုၚ်ပန်ဝွံ ဂပ်ဝ်စၞောန်ထ္ၜး ဗွဲသရုပ်တုဲအိုတ်ရ၊ ပ္ဍဲအာပတ်ပါဋိဒေသနိက်ပန်ဂှ် သၟာန်တဳလပိုဉ်ဂမၠိုၚ်ရ၊ သအးဇ္ၚးနူအာပတ်အိုတ်ရဟာ၊ မရနုက်ကဵုၜါဝါလေဝ် သၟာန်ရ၊ သအးဇ္ၚးနူအာပတ်အိုတ်ရဟာ၊ မရနုက်ကဵုပိဝါလေဝ် သၟာန်ရ၊ သအးဇ္ၚးနူအာပတ်အိုတ်ရဟာ၊ တၠဇမၠိၚ်အာယုက်တအ်ညးဂမၠိုၚ် ပ္ဍဲအာပတ်ပါဋိဒေသနိက်ဂမၠိုၚ်ပန်ဝွံ သအးဇ္ၚးနူအာပတ်အိုတ်ရ၊ ဟိုတ်ဂှ်ရ ဒၟံၚ်သ္ၚိတ်သ္ၚိတ်ဇြဇြအိုတ်ရ၊ ရဴဝွံ နမဒၟံၚ်သ္ၚိတ်သ္ၚိတ်ဇြဇြဂှ် ဂွံသမ္တီကေတ် ဒဒှ်မသအးဇ္ၚးနူအာပတ်ဝွံရ။
ခဏ်ပါဋိဒေသနိက်တုဲရ။
