၆.၄။ စတုတ္ထပါဋိဒေသနိက်သိက္ခာပိုဒ်
570) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာနိဂြောဓာရာမ် ဇရေၚ်ဍုၚ်ကပ္ပိလဝှ် လုပ်လၟိဟ်သက္ကရးဂှ် ဍိက်သၟိၚ်သာကျဝၚ်ဂမၠိုၚ် ကၟာတ်လဝ်ဂၠံၚ်တရဴအိုတ်ရ။ ကောန်သၟိၚ်ဗြဴသာကျဝၚ်ဂမၠိုၚ် နွံပၟိက်တၞဟ်နကဵုဒါန်ပိဏ္ဍပါတ် ပ္ဍဲဘာဂြိုပ်ဂမၠိုၚ်အိုတ်ရ။ ဍိက်သၟိၚ်သာကျဝၚ်ဂမၠိုၚ် “ကောန်သၟိၚ်ဗြဴသာကျဝၚ်ဂမၠိုၚ် နွံပၟိက်တၞဟ်နကဵုဒါန်ပိဏ္ဍပါတ်ပ္ဍဲဘာဂြိုပ်ဂမၠိုၚ်ရဂး” ရဴဝွံ သ္ဂောံမိၚ်ကေတ်တုဲ သ္ပရုသံၚ်ကၠိုက်ကၟဵုကတဵုဒၟံၚ် ပ္ဍဲဂၠံၚ်တရဴအိုတ်ရ။ ကောန်သၟိၚ်ဗြဴသာကျဝၚ်ဂမၠိုၚ် ဂိုၚ်ကေတ်စၞအာဟာရဘောဇိုန်မပြဲပြဲဂမၠိုၚ်တုဲ အာတဴဘာဂြိုပ်ဂမၠိုၚ်အိုတ်မ္ဂး ဍိက်သၟိၚ်သာကျဝၚ်ဂမၠိုၚ် တိတ်ကၠုၚ် ပၠံၚ်ဗတိုက်လေဝ်ပၠံၚ်ဗတိုက်ကောန်သၟိၚ်ဗြဴသာကျဝၚ်ဂမၠိုၚ်အိုတ်ရ၊ ပလီုပလာ်လေဝ်ပလီုပလာ်အိုတ်ရ၊ သၟိၚ်သာကျဝၚ်ဂမၠိုၚ် တိတ်ကၠုၚ်တုဲ ဂိုၚ်ရပ်ကေတ် ဒမၠမတာဂမၠိုၚ် မွဲဟာန်ကေုာံကပေါတ်ဂြပ်တုဲမ္ဂး “မုဟိုတ် တဳလပိုဉ်မဆာဲဂမၠိုၚ် ဒမၠမတာဂမၠိုၚ် ဗဒိုပ်ဒၟံၚ် ပ္ဍဲအာရှာမ်ဘာအိုတ်ဂှ် ဟွံဟီုလဴဗ္စအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ၚောံမိၚ်ကေတ် ဂလာန်သၟိၚ်သာကျဝၚ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ— “ယွံခမဳတအ် ဒှ်သာ်ဂှ်မ္ဂး သ္ပဟိုတ်ကဵု ဖဵုတၟေၚ်ဂမၠိုၚ်စှ်ပြကာမတွံဂး (၁) သွက်သ္ဂောံဒ္ဂေတ်လ္ၚတ်ဒုၚ်ဝန်မ္ဂး ဒးရးသန်ရ ဒဒက်တဴကဵုသၚ် ။ ပ ။ ပညပ်တဴသိက္ခာပိုဒ် ကုခမဳဂမၠိုၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတညိ။ “ယြဴဘာဂြိုပ်ဂမၠိုၚ် မဂပ်ဝ်သၟိတ်ဂး ရဴဝွံမ္ဂးမၞုံကဵုသၠေဟ်ပၟာ မဒ္ဂေတ်တဴမွဲဟာန်ကေုာံပရိုက်ဘဲမွဲ နွံအိုတ်ရ၊ ယြဴခမဳမွဲ ပ္ဍဲဘာဂမၠိုၚ် မၞုံသဘဴမဖှ်သာ်ဂှ် သီုမဟဂပ်ဝ်ကဵုတီ ပ္ဍဲကိုပ်ကၠာနတဲဇကု ဒုၚ်ဂိုၚ်ကေတ် စၞစကီု ဘောဇိုန်ကီု ပ္ဍဲအပ္ဍဲအာရှာမ်တုဲ သ္ၚာဲလေဝ်သ္ၚာဲမ္ဂး၊ စလေဝ်စမ္ဂး၊ ခမဳဂှ် ‘ယွံကောန်တၠတအ် အဲ အာစိုပ်အာပတ်ပဋိဒေသနိက် မဂပ်ဝ်ဂရိုဟ် မဟွံဗဗွဲသပ္ပါယ်တုဲရ၊ ဟီုလၟိၚ်ဒေသနာအာပတ်ပါဋိဒေသနိက်ဂှ်ရ’ ရဴဝွံ သ္ဒးဟီုလၟိၚ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
571) ပ္ဍဲအခိၚ်ဂှ် ခမဳမွဲဇကု ဂိယဲဒၟံၚ် ပ္ဍဲဘာဂြိုပ်ဂမၠိုၚ်ရ၊ မၞိဟ်ဂမၠိုၚ် ဂိုၚ်ကေတ်စၞအာဟာရဘောဇိုန်ဂမၠိုၚ်တုဲ အာတဴ ဘာဂြိုပ်တုဲမ္ဂး “ယွံတဳလပိုဉ် ဩဝ်ကဵုပိုဉ်ညိ” ရဴဝွံ ဂရၚ်ပတီ ခမဳဂှ်အိုတ်ရ။ ပ္ဍဲအခိၚ်ဂှ် ခမဳဂှ် “နတဲဇကု ဒုၚ်ဂိုၚ်ကေတ် စၞစကီု ဘောဇိုန်ကီု ပ္ဍဲဘာဂြိုပ်ဂမၠိုၚ်တုဲ ပွမသ္ၚာဲပွမစဂှ် ဟိုတ်နူတဳလမၞုံပိုဉ်ကျာ်တြဲ ဆေဝ်ဒဝ်လဝ်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ ဟွံဒုၚ်ဂိုၚ်ကေတ်ရ။ တၞဟ်နအာဂ္ၚေၚ်ပိဏ္ဍပါတ်လေဝ် ဟိုတ်မဟွံသၟဟ်ရထဂှ်ရ ပိုဉ်သကုတ်အာရ။ ပ္ဍဲအခိၚ်ဂှ် ခမဳဂှ် ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်အိုတ်ရ။ ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ “ယွံခမဳတအ် ခမဳမဂိယဲဂှ် နတဲဇကု ဒုၚ်ဂိုၚ်ကေတ် စၞးစကီု ဘောဇိုန်ကီု ပ္ဍဲဘာဂြိုပ်ဂမၠိုၚ်တုဲ ပွမသ္ၚာဲပွမစဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ 572) “ယြဴဘာဂြိုပ်ဂမၠိုၚ် မဂပ်ဝ်သၟိတ်ဂး ရဴဝွံမ္ဂးမၞုံကဵုသၠေဟ်ပၟာ မဒ္ဂေတ်တဴမွဲဟာန်ကေုာံပရိုက်ဘဲမွဲ နွံအိုတ်ရ၊ ယြဴခမဳမွဲ ပ္ဍဲဘာဂမၠိုၚ် မၞုံသဘဴမဖှ်သာ်ဂှ် သီုဟမဂပ်ဝ်ကဵုတီပ္ဍဲကိုပ်ကၠာ နတဲဇကု ဒုၚ်ဂိုၚ်ကေတ် စၞစကီု ဘောဇိုန်ကီု ပ္ဍဲအပ္ဍဲအာရှာမ်တုဲ သီုဟွံဂိယဲ သ္ၚာဲလေဝ်သ္ၚာဲမ္ဂး၊ စလေဝ်စမ္ဂး၊ ခမဳဂှ် ‘ယွံကောန်တၠတအ် အဲ အာစိုပ်အာပတ်ပဋိဒေသနိက် မဂပ်ဝ်ဂရိုဟ် မဟွံဗဗွဲသပ္ပါယ်တုဲရ၊ ဟီုလၟိၚ်ဒေသနာ အာပတ်ပါဋိဒေသနိက်ဂှ်ရ’ ရဴဝွံ သ္ဒးဟီုလၟိၚ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
